vun Behrend Böckmann

Dei 6. Hartmånd (Januar) is nå unsen hütigen Klenner dat Epiphaniasfest, dei Dreikönigsdach, Hogen Niejohr, dat Enn' vonne Twölwen. Un mi is so, as wenn an'n
Hillig Abend un an'n Epiphaniusdach ein un datsülwig passiert is. So as dat hüt Bruk
is, an'n Hillig Abend dei Lichten an'n Dannenbom lüchten tau låten, so is dat ok
Bruk, ierst tau Hogenniejohr orrer den Dreikönigsdach an'n 6. Hartmånd den
Dannenbom tau plünnern, aftauputzen un von em Afschied tau nähmen.

Disse Dach hett siet Tieden den griechischen Namen "Epiphanias" un lött sik düden
as dei Dach, an den Jesus in'n Stall tau Bethlehem up'e Welt keem. In Lukas sien
Apostelgeschicht is dat nåtauläsen, un dorut wür dat Wihnachtsfest. Apostel Matthäus weit mihr œwer Stiernenkieker un Stiernendüder tau berichten, dei wull ierst an'n 6. Hartmånd mit ehr Gåwen för't Jesuskind inne Krüff in Bethlehem ankemen. Noch anner denken, dat dat an den julianschen un gregorianschen Kalenner licht. Dat lücht ok in, denn in Russland un Spanien ward an'n 6. Januar dei Geburt von'n Heiland fiert, un dei Kinner kriegen ok ierst an dissen Dach ehr Geschenken. Noch anner denken, dat Jesus an dissen Dach döfft wür un dat an dissen Dach dei Stiernenkieker ut't Morgenland güllen Schmuck, Wiehrook un Myrrhe as Gåwen för't Kind nå Betlehem bröcht hemm'. (Dat mit de Dööp is natüürlich unbiblisch, Jesus wüür as opwussen Minsch döfft.)

Ok vunwägen dei Antall vun dei drei Wiesen wier man sik nich alltied klor. Bet in't drüdde Johrhunnert wür von stiernkunnig Mannslüd schnackt, un man lecht sik nå dei drei Gåwen up drei fast; in't vierte Johrhunnert warden's tau dei Hilligen Königs måkt, in't 8. Johrhunnert krägens denn dei Namen Caspar, Melchior un Balthasar — un von dei Tiet an ward denn dei Dreikönigsdach fiert. Un as dei Taufall dat so will, warden dei christlichen Fierdåch von'n 24. Julmånd bet hen taun 6. Hartmånd mit dei heidnischen Twölwen vermengeliert, dei Dåch, an dei Odin nå 'n Rechten up Ierden süht.

In't 16. Johrhunnert keem dei Bruk hentau, dat Kinner sik tau Hogenniejohr as Könige verkleeden un denn as Stiernsingers von Hus tau Hus trecken, vonne Geburt un dat Läben von'n Heiland singen un denn gägen por Nœt un Äppel dat Hus den Sägen gäben. Un sei målen dei drei Baukståwen C, M un B anne Dör, wat soväl bedüden sall as "Christus mansionem benedicat — Christus sägen dit Hus" orrer ok Caspar — Melchior — Balthasar.

Un por von disse välen Stiernsingers sünd vull Tauversicht, dat's ok in't Bundskanzleramt singen dörpen un dit Johr mit dei Kanzlerspenn' Akschonen för mihr Kinnerrechten, besonners in Projekten in Kolumbien un Kenia, ünnerstütten kœnen.