Dat wier an'n 12.04.1961, dat'n Minsch versöcht hett, dei Ierd un ehr Lufthüll tau verlåten un in't Weltall vörtaustöten. Nådem dei Ami un dei Iwan in'n Besitz von Atombomben wiern, wullen sei sik wiederhen gägensiedig wiesen, wecker wull dei Gröttst is. Un dat künn man wull blot, wenn man dei Ierd verlåten wür. Dat ward mœglich, wenn dei Minsch mit 'n Raket in 'n Rumschipp in'n Häben geiht. Dei Iwan versöcht dat inne Wüst in Kasachstan un dei Ami versöcht datsülwige Späl inne Wüst von Nevada. Einer wull bäder sien as dei anner un denn is dei Iwan denn Ami tauvörkåmen un harr as ierster an'n 4. Oktober 1957 den 83,6 kg schworen Sputnik hochschåten. Dei hett 21 Dåch dörchhollen, denn is hei afsackt un sachtens vergläuht. Disse "Sputnik"wier nich väl mihr as 'n Metallkugel, dei binnen 'n Senner harr unvon denn dei Signalen denn Ami so verduzt hemm', dat em dei "Sputnikschock" œwerkeem. Ok Größing künn dat nich fåten.

Dei Koreakrieg (1950-1953) wier noch nich vergäten un dat Gerangel üm Macht un Vörmacht güng von Niegen los. Wecker is weckern vörut? Größing wüsst nich so recht, wat's dorvon hollen süll, sei wier bi'n Kaiser upwussen, harr dei Weimarer Republik, dat Dusenjohrig Riek un nu dei niege Tiet mit den Sputnik beläwt. Von'n Ami harr sei blot wat hürt, œwer den Iwan in'n Mai 45 in't eigen Hus beläwt.

Immer wedder hett sei wohrschucht, dat dat noch eins wedder anners kümmt. Anner Tieden sünd ehr Drom bläben, doch ihrer sei uns Welt verlåten hett, güng an'n 3. November 1957 "Sputnik 2" mit Hünnin Laika an Buurd in't All. Doch sei kümmt noch nich wedder taurüch. An'n 19. August 1960 bringt Sputnik 5 dei Hunnen Belka un Strelka in't All — un sei kamen taurüch up'e Ierd. Größing hett dat nich miehr beläwt.

Nådem Größing nich mihr wier, güng an ehr Stell' ein leiwe Nåwersch mit Ökelnåmen "Orgoksch" bi uns in un ut. Sei läwte allein, ehr Mann wier storben, ein Sœhn fallen un dei tweit bi Stalingrad vermisst. Ünner't Bedd harr sei 'n Muuskist anlecht, œwer nich mit Geld, sonnern mit 20 Pund Zucker. Sei harr dat sülben beläwt, dat in jeden Krieg tauierst ümmer dei Zucker utgåhn wier — un dat süll nich noch eins so kåmen. Sei weit nich, dat dei Ami un dei Iwan dat nich mihr nödig hemm', Knallnitrat ut Zucker un Salpetersäure tau måken. "Orgoksch" beläwt dat Upstiegen von dei välen Sputniks, dat Belka un Strelka retour kåmen sünd un Chruschtschow den Weltrall-Welpen "Pushinka" Kennedy sien Dochter Caroline taun Geschenk måkt hett.

Denn geiht dei ierst "Pappkosmonaut" mit por Müs inne Hœchte — un all kåmen wedder heil ünnen an; sei harrn dei Ierdümkreisung gaut œwerståhn.

Juri Gagarin — dei ierste Minsch in't All

Nu wier man in'n gauden Globen, dat 'n Minsch dat nu ok œwerståhn künn, un an'n 12. April 1961 is dat so wiet. Dei Fleigerkosmonaut Juri Gagarin sett sik in sien Kapsel un ward mit dei "Wostok 1" för 108 Minuten in't All bröcht. Einmål ümkreist hei uns Ierd. Hei kümmt heil taurüch un lannt inne Stepp, 25 km af von dei Stadt Engels bi Saratow anne Wolga, dor wo eins dei Wolgadüütschen von 1924 bet 1941 ehr eigenstännig Republik harrn. Juri Gagarin ward in't ganze Land un an väle anner Uurten up'e Welt as Held fiert. Hei wier dei ierste Minsch in't All un mit em hett an dissen Dach dei bemannte Ruumfohrt anfungen.

Denn geiht dei ierst "Pappkosmonaut" mit por Müs inne Hœchte, un all kåmen wedder heil ünnen an. Sei harrn dei Ierdümkreisung gaut œwerståhn. Nu wier man in'n gauden Globen, dat 'n Minsch dat nu ok œwerståhn künn — un an'n 12. April 1961 is dat so wiet. Dei Fleigerkosmonaut Juri Gagarin sitt in sien Kapsel un ward mit dei "Wostok 1" för 108 Minuten in't All bröcht. Einmål ümkreist hei uns Ierd. Hei kümmt heil taurüch un ward in't ganze Land un an väle anner Uurten up'e Welt as Held fiert. Hei wier dei ierste Minsch in't All un mit em hett an dissen Dach dei bemannte Ruumfohrt anfungen.

"Nich vergäten: Tauierst wier dei bemuuste Ruumfohrt!"

Nich mål 'n Månd låters besöcht dei amerikan'sche Astronaut Alan Shepard an'n 5. Mai 1961 dat All un bald sall dat nå'n Månd gahn. Ein Lunochodmobil kümmt in'n Februar 1969 dor båben an, un Neil Armstrong sett as ierster Minsch in'n Juli 1969 sienen Faut up den Månd. Siegmund Jähn is dei ierste Düütsche, dei mit 'n Sojus-Ruumschäp in'n August 1978 in't All reist, Ulf Merbold is in'n November 1983 dei tweite Düütsche un Alexander Gerst up Platz elben bestimmt nich dei letzt. Dei ierste düütsche Fru is 2025 ok al flågen — as Privåtgast, denn dei Ruumfohrt is middewiel deils in Privåthannen.

As dei Wettlop vull in'n Gang wier un dei Chinesen ok den Maand besäuken willen, kümmt man sik mit'n Bu von'n Ruumstatschon neeger. Dei hütig ISS is in'n Vergliek tau Gagarin sienen Sputnik riesengrot: Stück för Stück wür dei Statschon ut "Modulen" tausamensett't, un in'n Momang rasen so anne 183 t Gewicht neegtau schwerelos in gaut 400 km Hööchte, verdeilt up 110 x 100 x 30 m in 92 Minuten üm dei Ierd.

Plietsche Köpp sünd all dorbi, ein "Orbitel" min Nåm "Schwerelos" tau bugen. Dit Weltrumhotel ("Orbitel") för ganz rieke Touristen hett denn sotauseggen dei ISS as Bahnhoff, un von dor ut schwäwt dei Gast vör sien eigen Bulloch un kann sik dei Ierd bekieken un beläben, dat sei Sünn twölf mal an'n Dach up- un ünnergeiht. Blot dei Reis kost nich blot 61,00 €, so, as wenn man fix mal von Hamborg nå Paris fleigen will, sonnern man möt so anne 20 Milljonen Dollars berappen.

Dat Hotel "Schwerelos" orrer "Dei Reis in't All"

So männig-ein hett sik vörnåhmen,
Hei wull den Månd mål neeger kåmen
Un spoort up sien ganz eigen Oort
För disse grote Weltallfohrt,
Denn man schnackt all œwerall
Von't ierst Hotel in't Weltenall,
Wohen man mit Raketen reist
Un denn unse Ierd ümkreist,
Kann sei in nich mål twei Stunnen
Ümmer äbenwech ümrunnen,
Un ward so denn sülben wiss,
Dat unse Ierd 'n Kugel is,
Dat man båben åhn Gewicht
Schwäwt as' n Fedder so ganz licht,
Gråd so as eine Fedderpos
Schwäwt 'n dor so schwerelos,
Kann schwerelos dei Ierd bekieken
Wo süss deit kein Blick henrieken,
Wo dat nie nich künn gescheihn
Von Berlin bet München seihn,
Wo dei Sünn geiht sössteihn mål
An einen Dach denn up un dål.

Los geiht dat up disse Tour
Inne Wüst bi Baikonur,
Deit viermål dei Ierd ümrunnen
Un kümmt an in gaut söss Stunnen
Båben an in den hogen Häben,
Wo all Astronauten läben,
Un sei nähmen (Gott sei Dank!)
Dei Besäuker in Empfang,
Up einen Hektar ISS,
Wo dei Minsch kennt keinen Stress,
Un sei lären em ok schnell
In dat "Schwerelos"-Hotel,
Wo dei Blick up Mudder Ierd
Is twinnigdusend Dollar wiert.

Ein ganze Wäk in Vullpangschon
Näben dei IS-Statschon,
Dat is hüt dei niege Schrie,
Dat is Weltruum-Hotellerie:
Dei Gast sall as 'n Forscher schwäben,
Doch komodiger dor läben,
Un ihrer dat taun Upfohrt kümmt,
Ward up "Schwerelos" instimmt:
Schwäwend as'n Kraun tau schnappen
Nå ganz fiene Weltruum-Happen,
Woans man dor in'n Häben drinkt,
Schwerelos dei Nacht verbringt,
As ein Katt sik waschen deit,
Wo man lött ut Bang den Schweit,
Wat dat tau bedenken gifft,
Wo ut dei Näs dei Butze blifft,
Dat dat keine Dusch deit gäben
Un man möt åhn Tant Meier läben,
Wenn ünnen ward all utprobiert,
Woans man båben uriniert,
Denn möt mål einer ut'e Büx,
Geiht dat dor båben nich so fix.
Dat is man so, as dat so is,
Un all sünd sik hier ünnen wiss,
Dat einer, dei dor båben schwäwt,
Nie nich bäten Sex beläwt.

Sorry, no sex in space!