Wunnerwarken in Mäkelborg, Deel 16:

Dat Kalkhorster Slott un sien Park

vun Hans Jürgen Grebin

Ümmer wenn uns Murrer mit uns Geschwister ehren Brauder Ludwig un uns Tante Emma in Grot Schwansee besäuken hett, mütten wi mit dat Fohrrad von Dörp Reppenhagen dörch denn Kühlensteiner Holl, an denn Bekannten "Blech"-Schröder vörbi, dei in ein lüttes Huus in Borkenhagen hinner dei groot Koppel wahnte.

Buernhus in Kalkhorst. Klick up tau'n Vergröttern!

Dor wüür ierst einmal werrer Nieges bespraken, denn dei Bekannte wahnte ganz einsam un allein hinner denn Kühlensteiner Holl un ein Stück aff von Borkenhagen — afsiets, kann man wohl seggen. Leider hett dat sien Mörder vör väle Johren uutnütt un hett em wägen dei bescheiden Rent üm't Leven bröcht.

Hüütigendaachs is nicks miehr von dit Huus tau seihn, nich mal miehr dei Grundmuuern. Moegen disse Wüürd an einen gauden Minschen erinnern un em ein lütt Denkmal setten.

Slott Kalkhorst schemert dörch dei Bööm

Na dat Verpuusten bi Schröder güng dat wierer dörch denn Park von Slott Kalkhorst, dei nich intüünt wier. Ein Wech führte an'n Rand von'n Park dörch dei Anlaach mit dei groten ollen un unbekannten Bööm, mit ein Kapell as Familiengruft, Steinhügel un in'n Hinnergrund dat Slott. Wi hebben uns uns nich üm dei Herrschaft kümmert un sei sick nich üm uns.

Slottpark in'n Harvst

Mammutboom in't Frühjohr Sommer mang grote un exotische Wipfel

Harvst

Stamm von'n Mammutboom in'n Sommer

Un doch hett uns all dei Johre mit ditt Slott wat Besünneres verbunnen, ganz ahn Weiten un Willn — na mien hüdige Insichten. In de Nääch wier dat Öllernhuus von uns Murrer, dat Forsthuus in Borkenhagen.

Dat Forsthuus Borkenhagen. Upnahm vun 1959. Hüüt is dat Huus verswunnen. — Klick up tau'n Vergröttern!

Hier deinte uns Grotvarrer Wilhelm Wegner siet väle Johr siene Herren, Röttger von Biel, as Gaudsförster, iehrlich un geweitenhaft, bit hei ahn grote Vörahnung von dissen Slottbesitter 1929 entlaten wüür. Mien Murrer un mien Brauder wahnten tau disse Tied noch in't Öllernhuus (Forsthuus Borkenhagen) un mütten 1932 dat Forsthuus verlaten un mit uns Grootöllern Wegner ümtrecken na Neuenhagen. Dor wüür ich gebuurn, sünst harr mien Geburtsurt woll Borkenhagen heiten.

As Oewersicht ein poor dröge Angaben tau datt Slott un sienen Park:

• März 1849 verköfft Major Caspar von Both an Baron Wilhelm von Biel in Zierow dat ritterschaftliche Lehensgut Kalkhorst,
• an'n 7. September 1852 öwergifft hei an sienen vulljöhrigen öllsten Söhn Thomson von Biel.
• Ende Juni 1853 wüür ünner Upsicht von Architekt Schweiger mit denn Buu von dat Haupthuus un Näbengebäude anfungen,
• bit 1874 wüür ein vielgliedriges Backsteinslott in'n neogotischen Stil upbuucht,
• tau glieke Tied wüür ook mit dei in Inrichtung von ein wietläufige Parkanlaach inn englischen Landschaftsgordenstil begunnen,
• 1855 wier al dei Felsenanlaach in ein Grott mit eine schön Blaumenanlaach, dei hüüt nich miehr existiert, farrich,
• 1889 entstünn dei Parkkapell mit Familiengruft, dei von Thomson von Biel persönlich uutmaalt wüür,
• an'n 10. September 1905 verstürw dei Slottherr in Badenweiler, wo hei mit sien Fru tau Kur wier.

Dei Parkkapell mit Gruft — dei pure Historismus mit Türmchen un Spitzbagen

Dei Kapell, kahl un trostlos in't Frühjahr Dat Gemälde stammt von denn Slottherrn sülvst

• An'n 1. Juli 1906 wier Röttger von Biel (ein von dei beiden Lehensanwärter) Besitter von Slott Kalkhorst,
• an'n 20. Oktober 1930 verlüür Röttger von Biel sein Läben up dei Jagd, wohrschienlich ook Sülvstmord; Gaudsförster Westphal harr em funnen.

• Besünnere Bööm överall

  An 14. Oktober 1931 wier na eine Dwangsversteigerung dei Gaudsbesitter Arthur Vidal uut Clausdorf, Kr. Waren dei niege Besitter von Slott Kalkhorst,
• doch al an'n 6. Juni 1934 hett hei dat Gaud un Slott verköfft.
• In dei nafolgen Johren wüür dat Slott as Stiftungseigentum dörch dei Nazis nütt.
• In dei letzt Daach von'n 2. Weltkrieg wiern dei SS un Himmler hier för kotte Tied, in'n Sommer 1939 sall ook woll dei Stellverträder von Hitler, Heß, hier wäsen sein, denn ünner dei Lüüd in Klützer Winkel güng dat Gerücht, wonah hei sick in dei Ümgäbung verloopen harr, kein Geld bi sick harr un ein Buer em blots telefonieren laten harr ("Kann jeder seggen, hei is Heß!"), wenn hei sien Taschenklock dorlött as Pand.
• 1945 wüür dat Slott dörch dei Bodenreform enteigent un deinte bit 1999 as Pläächstätt för dat Gesundheitswäsen, 1946/1947 weer ook dei bekannte DDR-Schriftstellerin Christa Wolf tau Gesundung hier, sei nöömte in ehr Bauk "Kindheitsmuster" dissen Uurt "Winkelhorst".
• Dat güng so, bit an'n 2. Juli 1999 dei Landkreis Nuurdwestmäkelbörg Slott und Park an denn gebürtigen Grevesmöhlner Manfred Rohde, dei in Kalkhorst sien Kindheit toböcht harr, as niegen Eigendömer verköffte un dei sick mit sien Fru üm dei Sanierung von Slott un Park verdeint maken dä.
• So wüür dei Park in ein Wettstried as "Düütschlands schönster Park 2002" mit einen 2. Platz uutteikend. Hier stahn u. a. Mäkelborgs öllste Atlas-Zeder, Gingkos, Douglasien, Zypressen un Mammutbööm.

Mammutboom in'n Harvst... ...un in'n Winter — noch gewaltiger in de ümgeven Kahlheit

Nu aver trüch tau dei schöne grote Parkanlaach, denn noch eine Kleinichkeit verbünd' mi mit denn Park. Vör Johren (na 1945) harrn mien Murrer un ick bi ein Rückfohrt von Grot Schwansee hier in'n Park eine schön utseihende, geel bläuhende Plant utbuddelt, mitnahmen un bi uns in Gorden inplant. Sülwst as uns Murrer na Damshagen ümtröch, nähm sei dissen Struuk, ein Ranunkel (wi nöömten sei einfach nur "geel Röschen") mit, un sogor bit na Rostock in unsen Gorden keem sei na denn Dod von uns Murrer. Ein ganze Gordenheck wier intwüschen ut sei wossen.

Slott Kalkhorst — "Winkelhorst" sä Christa Wolf up den niegotischen Bu mit sien vele Türmchen un Erker

Riesenmammutbööm överraagt sogor denn Winter, dei Einsamkeit un dei Tied

Sei wüür eines Daachs up dei Fohrt von uns Reiseklub "55Plus" in'n Verein Johresringe Rostock na Kalkhorst von mi werrer mitnahmen un in ein lütt würdich Minut in all Andacht as ein lustich "spätes Werrergaudmaaken" an den niegen Besitter, Herrn Manfred Rohde, trüchgäben. Sien Verspräken, dissen Ranunkel-Struuk an einen schönen Platz tau stellen, hett dei Slottbesitter wohrmaakt. So is dat in'n Läben, man dröppt sick ümmer tweimal.

Ick kann blots jeden Besäuker in uns Region vermünnern, denn Wech in dat Slott mit den schönen Park in Kalkhorst tau maaken — ein Erläwnis! Näbenbi secht, hier up dat Gelänn von Slott Kalkhorst kann man mit Ünnerstütten von denn Slottbesitter ook noch dei "lüttst Jugendharbarch von Düütschland" tau seihn kriegen. Laat juch oewerraschen!

Kalkhorst in strahlen Sommer

---

Von Herrn Manfred Rohde heww ick dei Oewersicht kregen, un ein poor Fotos stammen ook von em. Dorför bedank ick mi hartlich.