In dei Niejohrsnacht taun'n 01.01.2005 wüür eine Bronzefigur ann Strand von Boltenhagen, vör dei Steilküst up einen Findling, dei int Warer lääch, fastmaakt worrn.

So süht "artgerechte Haltung" von Nixen ut!

Dei Figur uut Bronze stellt eine Frugensfigur mit Fischschwanz dor, dei man as "Meerjungfru" orrer ok "Nixe" beteikend. Datt Awbild von ein hübsch jung Frau wirkte naturgetreu und wier läbensgrot. Dei Figur sitt up denn Findling un kickt in Richtung Strand.

Von vörn is sei licht arrogant

Dei Lüüd dachten taueerst, irgendein Sponsor harr disse hübsche Bronzefigur spendiert. Ganz schnell verbreidte sich dei Meldung döröwer dörch Medien un von Mund tau Uhr und dei Lüüd von Fiern un Nah — Touristen un Einheimische — kämen und freuten sick bannig öwer diesse geheimnisvulle Figur.

Wie dat so inne lütt Worenwirtschaft is, disse mysteriöse Figur wüür dörch dei Gewerbelüüd un Reisünnernehmen för Reklame brukt. In kotte Tied keem dei Hannel ingang mit Miniaturen, Reiseandenken un Gebruuksgegenstänn, dei dei Nix dorstellten orrer ehr Awbild drögen. Dat nöömt sik hüüt "Merchandising", utspraken "Mörtschendeisink".

Ein schön Rücken kann ook entzücken

Al inn März 2005 meldte sick eine nie gründt' Firma "Nymphenworld" mit ein Anwaltsschrieben dorgegen. Dorin wüür verkloort, datt eine Fru N. (ok as "Miss Rheinland-Pfalz 2001" bekannt) un ehr Mann bi dat Münchner Patentamt denn Musterschutz erworben harr. Sei maakten sick öwer Internet un Broschüren öwer dei "Nymphe" bekannt un plägten ehr Mythos.
Sei harrn sick in dei Twüschentied sogor vör dat Landgericht gegen anner Vermarkter dörchsett.

Nanunanu! Hett disse Mann etwa dei Nix tauletzt seihn, ihre sei verswunn is?

Ende Februar 2007 in ein Nacht wier dei Nix nu spurlos verswunnen. Bi dei Polizei inn Kreis Nuurdwestmäkelborg wüür Anzeich' gegen Unbekannt wägen Deiwstahl maakt und ein Schaden mit 20.000 € beteikend. Al 4 Daach spärer — ann 04.03.2006 — schräw Fru N. einen Breif direkt an denn Direktor von datt Landeskriminalamt Mäkelborg-Vörpommern, Herrn Weitemeier persönlich, un beschwerte sick öwer to wenig Arbeit, ja sogor öwer Nixdoon vonne Polizei bi dei Söök na denn Deiw. Ook gegen dei Ünnernähmers un Gemeindeverträders in Boltenhagen hett sei Verdächtigungen uutspraaken. Sei schrääw utdrücklich, datt kein Buntmetalldeiwen annt Wirken wääst wiern, miehr glöwt sei, datt ein Firma mit beupdraacht woorn wiehr, de Nymph up dei Siet to bringen, wiel in dei Befestigungslöcker akkurat Spachtelmasse infüllt worrn wier, dei süll hollen un datt Klauen verhinnern.

Fru N. gääw an, sei wier dei alleinige Besitterin von dei Nymph. Allerdings harr man dorvon vör dat Afhandenkaamen von dei Figur nicks hüürt. Sei lechte oewer kein Nawies vör, dat de Nymph orr Nix sei tauhüür.

Dei Fraach, ob sei — von ein gewisse Ähnlichkeit ut — Modell för disse Nix stahn harr, läät sei apen. Sei betonte, disse Figur harr einen Wiert von 25.000 € un süll weltwiet ein Unikat sien. Disse Figur süll an denn Findling anpasst worrn sien un ein Gewicht von 150 kg hebben. Dei Figur süll dormals von privat beupdraachte Personen upstellt sien.

Eerst Nix, denn nix: Boltenhäger Strand

 

Knapp 14 Monate na datt Verschwinn' von dei Boltenhäger Nix wier plötzlich ann 21.04.2007 ann Strand vonn Priwall in Travemünd ein Bronzefigur tau seihn, dei dei annere Verschollene siehr ähnlich wier. Ein upfällich Ünnerscheid bestünn dorin, datt dei Figur na vörn lehnt säät un vonn Strand wech kääk. Un ok dit full up: dei Nixe II harr ein niech metallisch blank, bronze Körperoberfläch — dei Nixe I wier von ein dunkelbruun, greunlich Patina öwertrocken.

Is sei dat etwa...?

Allerdings güng datt Upstellen vonne Skulptur samt Stein dittmal ein ordentliches Verfohren tau Genähmigung vöruut. Datt Gerücht wüür luut, ob sick nich dei Boltenhäger Nix dorhinner verstääkt harr.

Fru N. gäw deshalw inn Mai 2007 ein eidesstattlich Versekern aww, datt sei na dei ierstmalich int Johr 2005 upduukte Ostsee-Nymph ein tweites Original hett maken laten un ann 21.04.2007 in Travemünd harr upstellen laten. Dei ursprünglich Figur wier ümmer noch verswunnen, sä sei.

Dei verantwuurtlich Staatsantwaltschaft beupdraachte einen Materialkundler un Kriminaltechniker mit dei Klärung. Dei Gautachter kääm in sien Gautachten tau dat Ergäwnis, datt datt bloots ein Figur giwwt — dergestalt, datt sick datt bi dei Travemünner Nix sick üm dei hannelt, dei einmal ann Boltenhäger Strann stahn hett.

Dit is nich artgerechte Haltung! Ganz un gor nich!!

Dei Nix von Travemünn wier wüürklich kein gaud Schicksal beschääden, denn 6 Monat na ehr Upstellung läät ein Sturmflut inn September 2007 dei "arm Nix" bit tau dei Hüft inn Sand versinken. Sei wüür werrer uutbuddelt, up einen niegen Findling ann Strand sett', dei scheiw' Haltung wüür korrigiert, dei Blick int Warer bliew bibehollen. Doch dei niege Position wüür ann 16. Juni 2008 dei arm Nix taun Verhängnis: Ein besaapen Strandkorvvermieter führ nachts mit ein Geländewagen gegen dei 1,50 m hoge Bronzefigur up ehren Findling un dorbi verlüür sei ehren rechten Arm und wüür komplett vonn Stein räten.

Ein Volkskrankheit: Rückenpien dörch ehr verquääst Sitten up denn Stein!

O nee! O nee! "Bodenhaltung" up't dröge Land is tödlich för Nixen!

Inn September 2008 läät dei Staatsanwaltschaft ein Huusdörchsäuken in dei Firma von dei Nixenvermarkters un inn Privatbesitz maaken.
Bestimmt harr datt Gaudachten denn Verdacht verduppelt, datt dei Lüüd von dei Firma woll sülwst för dat Verswinnen von dei Nixe in Boltenhagen sorcht harrn nun deshalw dei Nymph upn Priwall also kein Kopie sien künn. Up dei Fraach, ob ein niege Figur in plaant wier, wüür angäben, datt noch ein Awguss von dei Nymph nich mööchlich wier.

Sääker is woll, dei einzich Figur is siet Juni 2008 tweimaakt, kaputt.
Nu ermiddelt dei Staatsanwaltschaft wägen Vörtäuschung von ein Straftat.
Wülln wi nu dei Ünnersäukung und Entscheidung von dat Gericht awtäuben un weiten denn, ob dat ein Provinzposs, Geschäftemaakerie orrer sünstwatt is. Saaken giwwt datt, dei giwwt datt gor nich!