 |
Op ole Weeg un Brüchen: Woltersmöhlen: En Diek buddeln vun Antje Heßler Se köönt de Fotos per
Klick vergröttern.
Trüch kaamt Se denn mit den Zurück-Knoop op de Browser-Symboolliest. Nadem Haralds Diek döfft weer un enen Namen kregen harr, hett Harald uns noch vun den Buu vertellt. De Laag is direktemang Nord vun den Woltersteich, kannst hier bi Google Maps sehn. Dat Land weer sien Egen, dat harr he köfft. Aver dat weer för em gar nich so licht, de Genehmigung för den Diekbuu to kriegen. Dat weern so üm un bi 3 Hektar Land. He veränner dormit de Överfläch vun de Eer. De Nabu un dat Waterstratenamt hebbt em groote Schwierigkeiten maakt. Aver Harald leet nich locker. Na taage un lange Verhandlungen füng de Buu vun den Diek an. De verdrömte Lehmkampweg weer mit eens vull Leven. Neescheerig Minschen, grote Bagger un Geräte weern up den Weg. Weer keen Dörchkaamen mehr. Woans de Buuarbeiten in vullen Gang utsehn, kannst noch bi Google Earth sehn. Dat nafolgen Bild is en Screenshot dorvun.
1995, so steiht dat up en Steen an den Ingang na den Diek, weer he endlich fardig woorn.
De Diek is bit to dree Meter deep. Weer allens Torf un Moorbodden. Wat dor ut de Eer ruthalt wöör! Dicke Stämme vun de Moor-Eekbööm ut verleden Tieden; Harald hett de Stämme an't Över vun den Diek wedder upstellt. Grote Findlinge ut de Weichsel-Iestied liegt noch verdeelt up de Wiesch. Welk sünd mit Naams un Bookstaven versehn. Dat Gras üm den Diek wöör vun Schaap kort hollen.
Den nablievenden Bodden hett Harald in de Meern vun den Diek to en Insel upschüffelt. De is mit en lütten Steeg mit dat faste Land verbunnen. Up de Insel hett he Obstbööm anplant. Vun dor kunnst herrlich över den Diek kieken. Lütte Bänke laadt to'n Drömen in. Haralds Diek is en vertövert Land. De Bööm weern in de Twischentied to Boomriesen ranwussen.
Üm sien Land harr Harald mit egen Hannen en Feldsteenmuur upstellt. Steen harr he noog bi dat Utbuddeln vun den Diek funnen. So weer de Lehmkampweg goot to kennen. Wi staunen nich schlecht över dat Enstahn vun den Diek. Dat een överhaupt de Idee harr, sik hier sien egen Märkenland to schaffen! Un denn mit ganze Knööv doran fasthollen! De Figur ut Holt an den Ingang vun den Diek harr uns mit uns Auto anhollen laten. So hebbt wi Haralds Diek un den Lehmkampweg kennen lehrt. To de groot Figur ut Holt kemen noch welk dorto. De harr Harald in't Water stellt. As wi em fraagten, ob he keen Bang harr, dat se klaut wöörn, grien he blots un meen: "Ik heff al de hilligen dree Könige bestellt. De kaamt doch in de neegst Tiet un passt up de Figuren up."
As wi korte Tiet later wedder an Haralds Diek vörbi kemen, stünnen an de Kant to den Lehmkampsweg wohrhaftig dree Stelen ut Feldsteen. Jede Steen harr en Schild mit Naam vun de dree Könige mit de Anfangsbookstaven C, M, B — Caspar, Melchior un Balthasar. De dree sullen nu Haralds Diek as Schutzpatronen bewachen.
De Fotos baven wiest de dree Steen-Hilligen, as se in'n Harvst opstellt woorn. Vörher, in'n Sommer, hett Harald uns noch to de Dööp vun den Diek inlaadt. Natüürlich weern wi dor, un ik heff dat hier beschreven. Haralds Enkel kunnen mit en Boot över den See paddeln. De Groten kregen Grillwuss un Johannisbeersaft to'n Drinken. Wenn wi nu an den Lehmkampweg vörbikaamt, maakt wi ümmer Station un freut uns över Haralds Diek. Villicht köönt wi düssen Winter nochmal över't Ies!
|
||||
|
|
