Workeen kennt nich de fröheren "Comic-Böker" mit "Tick, Trick un Track", "De dree lütten Swien", "Goofy" oder ok "De grote, böse Wulf", dee doch so'n lütten, nüüdlichen Jung harr ...

De füünsch' Nåversch

Vertelln vun Klaus-Dieter Tüxen


In de Strååt, in dee Klås opwussen is, geev dat so kort nå den 2. Weltkrieg 'n ganzen Dutt Kinner, un för de Bengels weer to Sommerstiet dat Footballspelen dat Gröttst. En Flach to'n Spelen harrn se noog, denn de Hüüser weern as Omkrink üm een'n groten Placken Eer buet, de eenfach "Platz" heter un dee jüst nå de Mütz vun de Göörn weer.

Los weer dor jümmers wat, un wenn dor blots een vun de Jungs mit 'n Ball so lang gegen den ehemaligen Luftschutzbunker ballern dä, dee an't Enn vun den Platz stünn, bit dat nå un nå Mitspeelers kemen.

Weern denn noog Spelers op'n Dutt, so worr afmählt. Meistto de twee besten vun de Jungs stellern sik in'n Afstand vun rund twee Meters op un güngen Foot för Foot op'nanner to. Een Håken weer allerdings dorbi. Jeder vun de beiden müsst een'n Foot vör den annern setten, "Pissputt — Pissputt" heter dat denn, un workeen as letzt 'n ganzen Foot setten kunn, dee dorv losleggen, een'n Speler för sien Mannschaft uttowählen. Dornå keem de anner an de Reeg, bit dat alltohoop opdeelt weern.

Denn kunn't ja losgåhn. Man so heel un deel ohn' Probleme güng dat nich af. Gegner bi dütt Speel weer nich blots de anner Mannschaft, sonnern ok de een oder anner Nåver, sünnerlich Nåversch. Dat bleev gor nich ut, dat ok mål 'n Ball in de Goorn floog, un mehrstendeels weern de Kinner denn ok vörsichtig achterran, jümmers ornlig op de Weeg vun dat Smuckstück vör't Huus to blieven.

Weern åvers nich all gliek — un den gröttsten Kummer möök een olet Eh'poor, unegåål as "Pat un Pattachon", see 'n Kopp grötter as hee. Dat Fruunsminsch kreeg denÖkelnåmen "Goofy", wieldat se grote Ähnlichkeit mit de Disney-Figur harr, åvers see worr ok "De grote, böse Wulf" nennt, see harr nämlich jüst so'n Nåmen.

Dee beiden also weern de gröttsten Gegner vun beide Mannschaften, denn wenn dor en Ball in den Vörgoorn floog, sprungen se as öölt ut de Döör rut, noch ehr dat de Ball in de Goorn opsetten dä. Dat geev alltiets 'n Wettloop, un dormit worr — nakloor — de gröttst Schåden anricht't, denn nu scherten sik de Jungs 'n Schietwatt üm de Wegen, sonnern söchen sik den körtsten Weg. To gode Letzt müssten se noch dormit reken, dat se vun de ool Hex' 'n Pedd kregen; versöcht hett se dat ehrmåls.
Jungedi, worr dee füünsch, un wunnen hett se wohrhaftig männichmål.

Dat bedüüd't, dat se ehr Schapp all vull vun Bälle hebben müsst. Denn keem se Klås oder sien Kamråden tovör, beheel se dat runne "corpus delicti", wat nich blots ut olet Ledder, sonnern dotomålen ok ut Stoff sien kunn. Klås sien Modder hett dorto 'n Dutt Placken strickt, dee tosåmen neiht un füllt mit ole Plünnen, dat weer denn de Football.

De Bessen vun Nåversch dreep de Jungs jümmers hart dormit, denn in de knappe Tiet weer dat gor nich so licht to, as hüttodåågs, an 'n niegen Ball rantokåmen.

Eens Dåågs stünnen se nu ohn' Ball dor un weern an't Spekeleren, worans se wedder an ehr Footwarktüüch kåmen kunnen.

Een vun de Plietschen hett, as de beiden mål wedder ut de Döör sprungen, dat spitz kregen, dat de konfiszeerten Bälle alltohoop direktemang achter de Huusdöör legen. Hee weer dat ok, dee mit de Idee rutkeem, een'n olen, halven Ball in den Goorn to smieten, un wenn de beiden wedder rutstörten, wull hee achter de open Döör springen un de Bälle gau ruthålen.

Wat keeneen för möglich heel, dat hett funkschoneert, wenngliek dornå ok bannig veel Gedööns vun "Goofy" to hören weer, dee sik bi all de Öllern in'n Omkrink besweern dä.

Dee åvers harrn all lang keen Ohr mehr för dat Geblarr un Krakeel'n vun de Oolsch; Klås un sien Mitspelers kunnen mit all de trüchwunnen Bälle eerstmål 'n Tiet lang wiederspelen — un all'ns güng dorna wedder vun vörn los.

Wenn sik all ok männichmal een'n högen dän över dat erwussen-unwürdige Benehmen vun "den groten, bösen Wulf", wat dat Argern anlangt, hett se de Göörn dat een oder anner Mål allerdings richtig so'n lütte beten vörrut hatt.


23.7.2022

 


na baven