Op ole Weeg un Brüchen:

Över Klütz na dat Slott Bothmer

vun Antje Heßler

Nahdem wi uns den Pavillon vun Schliemann bi Regenweder ankeken harrn, güng uns Fohrt wieder över Klütz na dat Slott Bothmer. Up den Nahuusweg wöörn wi seker nochmal den Pavillon bekieken. Villicht schien denn ok mal de Sünn!

De Karkturm vun Klütz keek al över de Hügel vun den Klützer Winkel. De Meckelnborger nöömt dat Land den "Klützer Winkel" so wiet, as se den Turm vun de Klützer Kark sehn köönt. Dat schöne Winterbild hier wiest Möhl un Kark vun Klütz un is vun Hans-J. Grebin knipst.

Wi föhrn direkt na Klütz un denn de Slottstraat lang na dat Slott Bothmer. De ganze Lüttstadt harr den Binamen "Slottstadt" kregen. Dat Slott weer na den Krieg restaureert woorn. Dor geev dat nu Utstellungen, Konzerte un veel anner Saken. Dat Slott weer en richtiges Event för de Lüttstadt Klütz woorn. Up de Fraag: "Hest du di al dat restaureerte Slott Bothmer ankeken? Nee?" heet dat överall: "Denn warrd dat aver Tied!" Un nu weern wi up den Weg na Slott Bothmer!

Schematische Opsicht op Bothmer, Bild: PodracerHH/Wikimedia Commons

Glieks na de Wenn weern wi al mal dor west. Dor weer dat Slott aver noch in enen böös maroden Tostand. To DDR-Tied wöör dat Slott to en Ollenheim inricht: "Feierabendheim Clara Zetkin" hett dat heten. An de Anlaag wöör nix maakt. Se wöör den Verfall priesgeven.

Alleen de Tofohrt na dat Slott harr sik dull verännert. An de Hauptstraat vun Klütz na Grevesmöhlen weer en groten Parkplacken extra för de Lüüd anleggt woorn, de sik dat Slott Bothmer ankieken wulln. En staatsche Linnenallee güng na dat Slott. De weer aver för den Autoverkehr sparrt. Dat letzte Enn müssen wi to Foot gahn. Ik harr to'n Glück mien Rollator in den Kofferruum packt. Aver up den Kiesweg güng he jümmer sien egen Weg. Mal güngen de Rööd na rechts un mal na links. Wat weer ik froh, as wi endlich vör dat Slott ankemen!

Mit dat Weder harrn wi Glück, de Sünn meen dat goot mit uns. Dat Slott möök sik bi dat schöne Weder besünners prächtig. Dat Slott is de gröttste noch erhollene denkmalschützte Barockanlaag vun Meckelnborg. Dat's en heel wiedlöftig, mehrflögelig Anlaag. In dat Buwark inbuut sünd Wohnrüüm för de Familie Bothmer liekso as för Gäst, "Kavaliere", Riedhallen, Weerschapsrüüm un wat nich allens.

Hööfdingang

Buut wöör dat Slott Bothmer durch den Architekten Johann Friedrich Künnecke von 1726 bit 1732 för den Reichsgrafen Hans Caspar von Bothmer as Stammsitz von sien Familie. Över de Familie Bothmer gifft dat noch veel to berichten.

Südportal

Uns weer nu aver na en godes Meddageten. Buten bi Sünnenschien in de restaureerte Gastronomie vun den Oostflügel vör dat Slott belohn uns nu för den beswoorlichen Weg.

Dat Restaurant in de Orangerie — aver hallo!

Uns beid Meddageten...

...köönt sik sehn un smecken laten!

Dor kümmt Max!

Dor heff ik mi eerstmal klook maakt, ob Gehbehinnerte nich bit na dat Slott ehr Auto nütten kunnen. Ik kreeg en gode Utkunft: dat weer verlöövt!

Vör den Trüüchweg haal nu mien Begleitung uns Auto un wi kunnen föhrn. Wat heff ik mi freut, as ik mien Max — so heet mien Auto — in de Allee wies wöör! Up een vun de witten Bänke vör dat Slott heff ik töövt. Gau harrn wi den Rollator wedder in den Kofferruum verstaut.

De witte Bank vör den Siedenflögel, dorachter de Utstellungsruum

En ole Boom-Methusalem in'n Park

De Seerosen

Vörher hebbt wi uns aver noch den englischen Landschaftspark ankeken. De weer wedder in enen denkmalgerechten Naturpark ümwannelt. Dicke Bööm an de Footweeg krüzen de groten grönen Rasenflächen. En brede Graft mit Seerosen bewussen güng üm de Slottinsel. De Goornansicht von Slott Bothmer lohn sik. An de een Kant vun en Graft sünn sik en Aantenmodder mit lütte Kinner.

Huus för Reedschapen in'n Park

De Aanten vun Bothmer

De Gravens heet hier Graften

Blick ut den Park

De Seerosengraft mit Brüch

Wi weern mächtig beindruckt vun de Butenansicht vun dat Slott. De beiden breden Treppen mit dat kunstvull ut Iesen arbeit Gelänner weer nich to översehn. Över de Trepp na Süden weer en Inschrift in dat Giebelfeld vun dat Corps de Logis (Wahntrakt): "Bedenke das Ende!" En achtersinnig Motto, düch uns. Dat Enn vun so en Reesenbuwark, bi dat jümmer noch en Flögel dortokeem, kunn licht de Pleite vun den Buherrn sien. Hett de sik dat opletzt ok dacht un beten op'n Kaneel passt?

De smucken Gelänner sünd binah modern, nich barock...

...eenfach wat ganz Besünners!

Allee in'n Park

Siedenflögel mit Graft

Dat Museum in dat Slott hebbt wi uns för enen tweten Besöök vörnahmen.

In de Festonallee

Bevör wi uns up de Trüüchfohrt möken, sünd wi noch en lütt Enn de Festonallee lang gahn. Holländsche Linnenbööm rahmen den Weg in. 270 Meter weer de Allee lang un keem von Hofzumfelde. Dat weer dat Versorgungsgoot (Vorwerk) vun Slott Bothmer. De Festonallee weer in Düütschland eenzigordig un stünn ünner Natuurschutz. Alle dree bit veer Johr wöörn de Linnen besneden. Mit de besünnere Form sehgen se en gröne Girlande liek. Dorwegen de Naam "Feston", dat bedüüdt Girlande. Ut Bloom kennt wi as Schoolkinner ok so en Girland. De weer ut Blomen to enen Bloomenbagen bunnen. To dat Vagelscheten güng dat Königspoor ünner solk Bloomenbagen.

Festonallee

Festonstich un Slingstich

Een vun de Linnenbööm

In Handarbeitsünnerricht hebbt wi ok den Festonstich bibröcht kregeen. De groten Deerns harrn en Haandarbeitsbüdel, de weer mit verscheden Zierstiche schmückt, ok mit den Festonstich. Dat Bild baven wiest en oles Stickmuster vun mi. Un hier harrn wi en Feston ut utwussen Linnenbööm!

Up den Nahuusweg sünd wi in Kalkhorst nochmal in den Pastorengoorn inkehrt. Bi Sünnenschien sehg de Goorn richtig smuck ut. De Döör to den Pavillon weer nich verslaten. Wi kunnen uns in Roh de Biller vun de Renovierungsarbeiden ankieken.

Kalkhorst: Achter den lütten Diek: De Schliemann-Pavillon

Wedder to Huus, funnen wi in de Lübecker Nohrichten enen Artikel över Schliemann un den wedder herricht'ten Pavillon. Wi harrn enen geschichtlichen Utfloog maakt!