Op ole Weeg un Brüchen:

Fohrt na Slott Bothmer: Kalkhorst

vun Antje Heßler

De Kark in Kalkhorst in'n Klützer Winkel

De mächtige Karktoorn vun Kalkhorst

Endlich güng uns Fohrt mal wedder na Meckelnborg. Uns Ziel weer dat Slott Bothmer. Över Kalkhorst güng de Weg wieder na Klütz. In Kalkhorst bewunnern wi de mächtige Kark, de ut dat dörteihnte Johrhunnert stammen schall. An dat Butere, sünnerlich den Toorn, woor avers, as dat schient, ok in later Johrhunnerten noch arbeit'. Romanik un Neoromanik vermengeleern sik harmonisch.

Dicht blangen den Kartoorm full uns de Wegwieser "Schliemann-Straße" up. Schliemann! Weer dat nich de beropen Archäoloog, de sik de ganze Wetenschap sülven bibröcht harr? Un de in de 1870er Johrn dat antike Troja opfunnen un utbuddelt hett, as al nüms mehr an glöven dä, dat dat Troja würklich geven harr?! Liesen pingelt wat in'n Achterkopp: Schliemann weer doch en Meckelnborger Jung west... Weer he etwa in Kalkhorst boren?! — Den Weg müssen wi doch noch eerstmal ankieken!

De Gedenksteen in Kalkhorst

An Anfang stünn en Gedenksteen. De sull wohraftig an Heinrich Schliemann erinnern. Weer also de richtige Schliemann, nich jichenseen Namensvetter! Lütt beten wieder weer en Schild mit en Schliemann-Porträt upstellt. Nee, he weer nich in Kalkhorst boren, man he hett hier en Tiedlang as Kind leevt. He stamm ut en heel povere Familie, un de dormalen Paster vun Kalkhorst weer sien Onkel. De hett den Jungen opnahmen. Kiek, hier harrn wi en Stück Levensgeschicht vun en histoorsches Genie tofaten!

Glieks na de Porträt-Tafel keem en Poort. De stünn apen un laad uns in. De Weg güng in den Pastorengoorn un na den restaureerten "Schliemannpavillon"! Man kunn em al vun de Straat sehn.

Wat harrn wi dor funnen! Natüürlich hebbt wi uns Fohrt na dat Slott Bothmer ünnerbraken. Dat Slott leep uns nich weg. Neescheerig güngen wi dörch de Poort in den verwunschenen Goorn, as güngen wi dörch en Poort in de Tied 200 Johr torüch...

De Pavillon

Dat Pastorat is nich so schön — de Neogotik hett hier huust...

...aver de Blick ut den Goorn op de Kark is en Droom!

Düt weer de Goorn, in den Schliemann as Kind speelt hett. Grote ole Boomriesen leten blots ümmer en lütt Stück vun den Pavillon sehn. Poor vun düsse Bööm hebbt wiss den lütten Heini Schliemann noch spelen sehn...

Sünnenstrahlen fullen up den Pavillon. Wi kemen uns reinweg vertövert vör. Vörsichtig faten wi an de Klink. Aver de Döör vun den Pavillon weer afslaten. Wi müssen nochmal wedderkamen.

Vör den Pavillon kunnen wi enen Diek utmaken. De weer ganz mit Entenflott towussen. Seker weern wi bald wedder hier!

Hett lütt Heini hier dat Froschkönig-Märken naspeelt?

Aver nu güng uns Fohrt eerstmal wieder na Slott Bothmer.