De Winter kann dat doch nich laten,
nu hett he uns doch noch tofaten,
vun Ost kümmt he mit Stormgebruus,
an'n Besten is, man blifft to Huus!

Fröh musst all mit'n Bessen rut,
un hest denn glieks en kole Snut,
keen Schnee to sehn to Wiehnachtstiet,
un nu op mal, nu hest den Schiet!

Wi hoop tosam, lang ward nich duurn,
wi wulln doch gern op't Fröhjohr luurn,
dor mütt wi noch en beten töben
un in Geduld uns all nu öben!

Doch liekers, de Natur is schön,
op mien lütt Bild kann man dat sehn,
wi schön is dat denn an de See,
allns vull Ies un allns vull Schnee!

Uns Brüüch, de winkt uns ut de Fern,
mien Insel, so heff ik di gern.
So en Spazeergang deit uns goot
un gifft uns weller frischen Moot!

Winter op Fehmarn. Foto: privat. Klick op to'n Vergröttern!