To Richtfest

vun Sibilla Frerich


De Bulüüd:

Wi staht hier baven op den Böön —
wi Bulüüd! All schallt ji uns sehn.
Den Buherrn un de Gäste hier
begrööt wi hartlich to de Fier.
De Dackstohl steiht, is wohlgeraten,
dat Huus, dat kann sik sehen laten.
De Buherr weer ok ganz kumpabel,
de Bufruu regelrecht spendabel,
se günn uns af un to en Beer,
un de Betahlen weer ok fair,
nich övermaten, man dat langt.
So staht wi nu op't Dack un dankt
un wünscht den Buherrn alltied Spood,
ok sien Familie gah dat good.
Düt Huus schall ween en Huus vull Glück!
Dor drinkt wi op, veel hunnert Slück!

Prost!

De Buherr:

Veel hunnert Slück, juun Döst in Ehren,
dücht mi, dat dat to vele weeren!
För all juun gode Wünsch un Sprüch
segg ik ju Dank un wünsch ehr trüch.
Un ok juun Wark hett Aart un Schick,
meist lett dat as en Meisterstück!
So segg ik nu as letzten Wunsch:
Heevt alle hooch dat Glas mit Punsch!
Ji hebbt hier all juun Bestes geven,
Ik dank ju all un laat ju leven!

Prost!



na baven