Maakt Salaat vun Tüften, Nudeln,
Limo laat un Cola sprudeln!
Sleept de Kahlen, maakt ehr hitt!
Nehmt Paprika un Zibbeln mit!
Unsen Hunger schallt se stillen —
grillen wüllt wi! Grillen! Grillen!

An den Grill, dor höört en Mann.
Nich dat ik dat nich ok kann —
man de Mannslüüd köönt dat fiern,
meist andächtig Fleesch befüern.
Ja, dat Fleesch! Üm Gottes willen —
all dat schallt wi grillen, grillen?!

Wüst un Spieße, Karbonaden,
meist en hele Slachterladen!
Dorto Broot mit Krüderbodder —
dat is en kaptaales Fodder!
Sitt in'n Schadden, laat uns chillen,
laat de Mannslüüd grillen, grillen!

Later sünd wi alle satt.
Op den Grill, dor liggt noch wat.
Sünnschien fallt al sied un week —
"'keen will noch dat letzte Steak?"
Nee, dor wüllt wi nix mehr von.
Ik nehm noch en Champignon.
Mehr kannst in mien Maag nich füllen.
Avers schöön weer't doch, dat Grillen.