Pagels-Planten 2020

Al siet 'n Tied maakt de oostfreesche Hobbyfotograf Thomas Seemann Natuurfotos för Fotokalenner, de sien Team "Tandem"/OBW rutgifft. In de twee verleden Johr hebbt wi mit düsse Fotos en Kalenner mit Bottervagels un een mit annere Luftakrobaten in Pagels' Goorn maakt. 2020 wüllt wi en Kalenner de besünnern Planten in den Pagels-Goorn in Leer widmen. Jede Plant warrt vörstellt un to'n Sluss mit en Riemel ehrt. Hier is de Översicht över all Planten.

Se köönt de Fotos per Klick vergröttern. Trüch kaamt Se denn mit den Zurück-Knoop op de Browser-Symboolliest.


August-Plant:
De Fingerstruuk

vun Thomas Seemann un Marlou Lessing


Verleden Maand hebbt wi in Rosen swöögt. De Plant för düssen Maand, de Fingerstruuk, is en Verwandte vun de Roos, he höört to de Familie vun de Rosengewächse. As en Aart Familienwappen un Tüüchnis vun de prominente Verwandtschap wiest he de Fieftall vun sien Blödenbläder.

Togliek is de slichte, unschienbore lütte Plant sowat as dat Gegendeel vun de Roos: bescheiden, ansprookslos, unkomplizeert, licht to hebben. Se is op de ganze Noordhalvkugel tohuus un blöht in de wille Foorm geel. Wieldat se avers so utkaamlich is, hebbt de Goorners sik al vör vele Johren üm ehr annahmen un ehr kultiveert. Nu gifft dat witte, rosa, rood un orange blöhen Blöden. Sünst hett de Struuk sik nich veel verännert, he is noch liekso robust un genöögsam. He wasst hööchstens 1,20 m hooch un kann sik as en Borrndecker utbreden. An den Borrn stellt he keen besünnern Ansprook, he wasst ok an extreme Placken, sogor op Fels. Beten Sünn hett he geern, dat is allens.

Sienen Naam hett de lütte Struuk vun sien Loofbläder, de so as Finger afstaht. Se geevt as düüster Achtergrund en schönen Kontrast för de lüchen gelen Blöden. Un de Struuk blöht vun Juni bet Oktober in eensento dör.

Wegen düsse lange Blödenduer is he för de Insektenwelt besünners wichtig. He levert toverlässig Nohrn ok laat in'n Harvst, un twoors Pollen un ok Nektar, wenn ok nich in ruge Massen — dorför avers stüttig. All Aarten Krimmeldeerten sünd dor Kundschaft, as de Biller hier wiest. Sweevflegen, Immen, Wöpsen, Hummeln, Flegen un ok lütte Kävers sühst in korte Tied. Keen Bild ahn Insekt. In en immenfründlichen Goorn höört de Fingerstruuk also in't Programm.

In't Binnere vun den Fingerstruuk leevt noch wat: en lütte griesgröne Flechte, de sik an de Telgen vun den Struuk ansiedelt. Veel Licht kann se dor nich kriegen, aver dat is sachs nich dat Wichtigste för ehr.

Wat dat nu för en Flechtenaart is, dat kann ik bi'n besten Willn nich seggen. Avers de Flechte deit den Struuk nix, dat is keen Schmarotzer so as Efeu. De Flechte brukt den Struuk as Ünnergrund, sünst nix. Un wenn Se en Flechte seht, is dat en Henwies op gode Luftqualität, denn wieldat de Flechten keen Wötteln hefft, haalt se sik all Nohrenstoffe ut de Luft. Wenn de Luft vull Dreck is, geiht dat nich.

du büst je man en slichten strook,
man kriggst towenden genoog:
so unschienbor du sülven büst,
warrst doch vun mennig deerten küsst.
dien aart un namen kennt meist keen,
man söten kriggst vun all un een:
all besöökt se di mit lüst,
un vun all warrst küsst un küsst,
imm un käver, wat dor is,
allens gifft di dusend küss,
wöps un hummel, mier un fleeg
maakt di leeftallig besöök,
alltohoop dat krimmeltüüg
leevt di mehr as anner strüük.
schöönheit warrt bestaunt, verehrt;
leevde folgt den binnern weert.
slicht ween, avers leevt vun alln —
ja, dat laat ik mi gefalln!


5.8.2020


na baven