Ernst Pagels 2004

Ernst Pagels un de Pagels-Goorns

vun Thomas Seemann, Stefan Siegmund-Schultze un Marlou Lessing


Se köönt de Fotos per Klick vergröttern. Trüch kaamt Se denn mit den Zurück-Knoop op de Browser-Symboolliest.


Verleden Johr hebbt wi en Kalenner mit Bottervagels wiest, de meist all in'n Pagels-Goorn in Leer knipst woorn. Ok de Fotos ut den aktuellen Klenner "Luftakrobaten" stammt meist all ut düssen Goorn. Wat is dat denn för'n Goorn? Is Pagels de Nahver vun Familie Seemann in Oostfreesland?


Een vun de Bottervagels in Pagels' Goorn: De lütte Füerfalter

Nee, nix vun dat. De Pagels-Goorn orr ok Pagels'sche Goorn in Leer is na Ernst Pagels (1913 - 2007) nöömt, un düsse Mann is en weltberopen Goorner west — op de stille Aart vun de Goorners. Dat gifft ok nich bloots in Leer en Pagels-Goorn, sünnern ok in Potsdam un Bad Zwischenahn. Aver de in Leer is de originale, denn Ernst Pagels is en Leeraner Jung west. Hier is he opwussen, hier hett he lehrt, warkt un wirkt. Hier hett he vun 1928 af an op Goorner lehrt un sik dorbi sünnerlich för Stauden begeistert. As he den tweten Weltkrieg överstahn harr, hett he hier in Leer sien egen Goornerie gründt. Siendaag is he dorna Oostfreesland besünners innig verbunnen bleven. He hett hier mennig Goorns as Landschapsarchitekt nieg plaant un anleggt.


In Pagels' Goorn in't Fröhjohr: All Planten sünd noch sied

Bavento hett Pagels vele Planten ünnersöcht, klassifizeert un tücht. Sien Liedenschap gell dorbi de Gräser un Stauden.


Dat Vörjohr is ok hier en beten gries,
avers dat süht na Arbeit ut — Goornarbeit!

Stauden un Gräser

Wat sünd denn eentlich Stauden? So betekent wi Planten, de nich afstarvt, nadem dat se utsaamt hebbt. Tominnst dree Johr mööt se överleven, de mehrsten leevt länger. Stauden överwintert as Wöttelstock orr Knoll un drievt in't Fröhjohr wedder ut. Se kaamt in all Grötten vör, vun lütte Krüder bet lütte Bööm. Mennig Stauden breedt sik sülven ut un wokert reinweg. Akelei, Funkien, Rittersporn, Duftnessel, Salbei, Schafgarbe — wi all kennt schöne Staudenplanten, un bi mennig Goornleevhebbers staht se hooch in'n Kurs vunwegen ehr Pleeglichtigkeit.


Chinaschilf — welk vun Ernst Pagels' leevste Planten

Un Gräser? Wi all meent ehr to kennen. De Blöden vun Gräser maakt tomehrst nich veel her, avers de langen, dünnen Spieren orr Bläder sünd en schöne Anblick, wenn en sachte Wind in de Büschel fohrt. Mennig Gräser tellt ok to de Stauden. Ernst Pagels hett sik sünnerlich üm de Aart Miscanthus sinensis, dat Chinaschilf, verdeent maakt. He hett ehr systematisch ünnersöcht un ca. 50 niege Sorten tücht.


Ok en Labyrinth gifft dat in Pagels' Goorn. Wenn de Planten hier hooch wasst,
is de Weg nich so licht to finnen!


Bambus in Pagels' Goorn

Överhaupt sünd dat sien Leistungen as Tüchter, de Ernst Pagels unvergeten maakt un em mennig Ehrungen inbröcht hebbt. 50 Johr lang hett he Planten tücht — tomehrst "sien" Stauden un Gräser, över 130 niege Sorten — un dorbi de Gelegenheit nütt, sien Leevde to sien oostfreesch Heimat uttodrücken. Sien schönste Salbei-Tüchtung nööm he "Oostfreesland". Ok anner Tüchters hebbt ehr Bewunnern för Pagels utdrückt, indem dat se ehr Tüchtungen na em nöömt hebbt.


Late Sommer in Pagels' Goorn

De Pagels-Goorn in Leer


Arbeitsgelänn in Pagels' Goorn

Wenn een en Goorn na de Wies vun Ernst Pagels anplant, kümmt meist vun sülvst en veelfach Natuurwunner tostann: en in sik veelfältig, pleeglichte Goorn, en Biotop för mennig Deertenaarten, sünnerlich ok rore, en Oase un Ogenweid. So woor ok de Pagels-Goorn in Leer buut, deelwies noch mit Planten, de Pagels sülven utsöcht harr.


Plaan vun den Goorn

Dat Gelänn is dat vun Pagels' ehmalige Goornerie. Pagels sülven hett den Goorn-Opbu in sien letzte Levensjohrn mitbeleevt un begleit, de Höövdarbeit leeg in de Hannen vun de Goorngestalterin Anke Mattern, de ok Mitarbeitersche vun Pagels west weer. — Ernst Pagels weer dat wichtig, dat "sien" Goorn en soziale Inrichten weer, för all Minschen apen un togänglich, sünnerlich för solk, de sik sünst keen Goorn leisten kunnen. All schullen sik de Natuur neeg föhlen.


Nettelkönig in Pagels' Goorn — för em is dat sien Königriek


Een kloppt sik so dör: Buntspecht in Pagels' Goorn


Un ok de Stieglitz wahnt hier — un kiekt en beten verdreihtlich


Arbeitsgelänn in Pagels' Goorn

Dat sik rore Deertenaarten hier tohuus föhlt, is keen Wunner. To Pagels' Leevtieden geev dat noch keen "natürlichen" Diek in den Goorn. Nu woor en Diek anleggt. Libellen un anner Water-Insekten un ok waterleven Vagels hebbt sik instellt. De Fördervereen Ernst Pagels Goorn e.V. un vele Friewillige doot veel Godes. Pagels' Goorn is vundaag de reine Lung in Leer. Giftfrieheit! Aartenveelfalt! Roh un Stillnis! Reines Brunnenwater! Wo sünst finnst dat allens tohoop? Un dorto överall de Sporen vun Ernst Pagels' egen Hand un Wirken, den groten Visionär för dat Tosamenleven vun Minsch un Natuur in den Goorn. Sien Geist un sien Natuurleevde kannst hier överall föhlen. De Pagelssche Goorn in Leer is in düsse Hinsicht eenzigaardig.


Ole Backaven bi't Gewächshus


Foto Ernst Pagels: Dieter Pommerening/Wikimedia Commons
16.4.2019


na baven