Ik oller Tiedungsläser

vun Behrend Böckmann

Mit mien Tiedung wür ik grot,
un heff dormit nu grote Not,
denn ik as einer von dei Ollen
bün mit Reklåme nich tau hollen.

Ik will läsen, wat passiert,
ok wenn so männig Såk frisiert,
wo hett't 'n Schlägerie denn gäben,
wo kann dei Minsch Kultur beläben,
wier dat Willschwien würklich Schuld
an denn Unfall mit Willem Schuldt,
wier dei dun un hett denn pennt
as lichterloh sien Wåhnhus brennt,
von wo kriech ik 'n jungen Hund,
worüm is Schmöken ungesund,
weck Aanten sünd dat Allerbest
as Bråden tau dat Wihnachtsfest,
wat hett dei Queen för'n Blaum an'n Haut,
worüm deit Fulheit gor nich gaut
un wat möt dei Minsch bedenken,
wenn hei will sien Hus verschenken?

All dees Frågen un noch väl mihr,
dat int'ressiert mi würklich sihr -
blot nie nich dei Reklåmen,
dei von Ünnernähmen kåmen.
Dor läst 'n blot von ganz väl Pien -
in't Knei künn dat Athrose sien,
so gåhn Klabusterbeern furt
bi Qualen inne Achterpurt
un güllen Druppen sall dat gäben,
dei verlängern di dat Läben;
Druppen för denn lütten Mann,
dormit hei bäder upståhn kann...

Ne, wat dat för Reklåme gifft,
mi einfach dor dei Luft wech blifft,
ik bün ümmer wedder platt:
dei Tiedung ward taun Billerblatt!
Ümmer lütter ward dei Urt,
wo ik as Läser keem tau Wurt,
un man öltlings Sieden fünn,
up wecker väl up Plattdüütsch stünn,
as't Stück hett föfteihn Pennings kost
un keem denn meddachs mit dei Post.
Nu sünd dei Biller bunt un grot,
dei Tiedung düer as dat Brot,
un is sei dor, is man sik wiß,
dat dat Klock söss an'n Morgen is.
Weit gliek, wat inne Welt passiert,
wo Charlene sik utkuriert
un Albert mit sien Twäschen spält,
Korona Boris Johnson quält,
dat Putin as ganz böser Mann
wull mit Schröder ganz gaut kann.
Dortau noch ganz väl Geschichten,
dei von't Annersrüm berichten,
worüm sall dat dei nich gäben,
doch möt 'n Tiedung dorvon läben?

Ik läs dei Spalten up un dål,
säuk nå Woren "regional",
läs von't Klima un Ikonen,
von Aktivisten, Riesenbohnen,
dat dei Minsch hüt gennern deit
un nich väl von Auschwitz weit,
dat man hüt up jeden Fall
taun Pries von drei twei köpen sall.
Un denn läs ik up einen Mål
wat von mien Tiedung "digital".
So verännert sik dei Welt,
analog ward afbestellt!