vun Maat Jan

De Regeern hett mal wedder uns Sundheit reformeert un ok al en Dummen Minister funnen, de den Kopp dorför henhollen deit. Wat dat Volk dorvun höllt, wiest düsse tofällig mithöörte Dialoog vun twee Patschenten in de Töövstuuv bi'n Dokter.

A: (Hoost luud)

B: Na, dat höört sik aver gor nich good an.

A: Weet ik. Ik bün dull verköhlt.

B: Nee, ik meen, dat höört sik gor nich good speelt an. Dat klingt noch nich natüürlich. Dat mööt Se tohuus noch orrig öven.

A: Speelt?! Dat is nich speelt! Ik segg doch, de Verköhlen hett mi faatkregen, ik bün klöterig as man wat!

B: Wat?! Un wat maakt Se denn hier?

A: Wat ik hier maken do?! Ik bün süük, ik bruuk en Krankschrieven.

B: Na un? Ik sett mi doch nich in en Töövstuuv mang luder frömde Lüüd, wenn ik weet, dat ik süük bün. Dat is doch nich to verantwoorden is dat! Dor wöör ik mi doch to'n Super-Spreader maken. Also to'n Virenslüder.

A: Man wat schall ik denn maken? Se sitt doch ok hier!

B: Ja, mi fehlt ja ok nix. Ik bün hier bloots vunwegen mien Kumpel, den Schorsch.

A: Ach, kann'n also ok för annere...? Interessant. Wat hett SeEhr Fründ denn?

B: Hochtied. Schorsch friegt. Morgen is Junggesellenafscheed. Dor mutt ik fit ween!

A: Un dorwegen gaht Se vundaag al to'n Dokter?

B: Wennehr denn sünst? Morgen heff ik doch keen Tied. Un wat de Rest vun'e Week is, na, den bruuk ik to'n Regenereern.

A: Un de Dokter speelt dor mit?!

B: Naklaar, de will mi ja ok nich jeden Dag an'n Hals hebben. Se seht ja, de Töövstuuv is vull! Noch en Snapsliek bruukt he dor wiss nich. Mutt ja ok noch beten Tied för de Süken blieven.

A: Hmm, langsam kapeer ik. Se nehmt den Dokter Arbeit af un helpt togliek de Süken — also de wirklich Kranken — bloots indem dat Se krankfiert. Man wat seggt denn Ehr Chef dorto?

B: Em is dat eendoont, wat he een Krankenschien för de Week kriggt orr fief för de enkelten Daag. Mit den Schien för de Week kann he sogor beter planen! Wenn nu en grote Opdrag kümmt, weet he glieks, düsse Week — nee, kannst vergeten!

A: Also en win-win-win-Situatschoon.

Assistentin (kümmt rin) De Neegste, bidde!

A: Gaht Se ruhig vör. Ik gah nocheens na Huus un träneer mienen Hoosten. Dat schall ja bi mi ok för en Week langen!