Sneewittchen
un de söben Zwerge
De Afhörprotokolle vun Hillgendamm
Nu de Gipfel toenn is, wüllt wi mal en lütt beten in de
Privatrüüm vun de Deelnehmers luschern. Ja, dat köönt
wi. Ach, dat hebbt Se nich wüßt? Dat Hotel weer natüürlich
verwanzt. Ok un besünners de Stuven vun de wichtigen Gäst.
Nee, de
olen Wanzen ut de DDR-Tieden weern dat nich mehr. De nagelniegen Wanzen
hett Angie Merkel sülvst installeern laten; se wull ganz seker
ween, dat dat ehr Gäst ok goodgeiht, se wull sik sülven
övertügen. Hier nu de Mitsnitt ut de enkelten Stuven.
Merkel: "Uff, endlich en Momang för mi. All sünd op
ehr Stuven gahn. Mal höörn, wat sik so deit in de Apartements."
Se sett sik den Kopphörer op un dreiht an de Knööp
vun de Afhööranlaag.
Sarkozy: "He is lütter! Putin is lütter as ik! Ach,
wat kann ik den Keerl good lieden! Un düsse niegen Plateauschoh
sünd fabelhaft!"
Merkel: "Zwerg!" Se dreiht wieder.
Bush: "Putin, düt Aas vör de Journalisten mutt
ik jümmers Wladimir op em seggen wat de sik utfunnen hett,
dat glöövst mi nich, Laura! Echt nich! Aaah, min Buuk! Dat
is mi so op den Maag slaan, segg ik di! Giff mi de Wärmbuddel,
Laura ja, hier mutt se hen! Aaaah!"
Laura Bush: "Quees nich so. Wat hett Wladimir di denn vörslaan?
Doch wiss wat mit de Raketen, nich? Hett he di bi't Woort nahmen un
will he nu doch mitmaken? Da harrst du doch mit reken müßt."
Bush: "Och, Laura, wa kümmt dat, dat du jümmers so
hartlos büst!"
Laura: "Ik bün nich hartlos, ik bün bloots nich hirnlos.
Büst du wiss, dat din Buukpien nich vun de velen Matjeshiern
kümmt, de du gistern avend eten hest?"
Bush: "Oooch, Laura.... aaah..."
Merkel dreiht wieder.
Barroso:
"Uff, wat för'n Dag! De Angie smitt den Laden ja ganz good.
Eentlich harr ik ok tohuus blieven kunnt. Eentlich pass ik mang de
all ja nich so rin. Ik heff ja nich würklich wat to seggen; ik
bün bloots Kommischoonspräsident vun'e EU, en König
Ohneland, un dat kannst vun de annern ja nich seggen. Wat för
reaale Macht de to'n Deel hebbt! Op wat för Länner, op wat
för Atomwaffen de sitt! Un ik, mit min, naja, beters Ehrenamt...
da nimmt mi doch nüms mit eernst. Man vun de Grött
her passt dat; da hebbt se alle etwa min Format!"
Merkel (grient): "Nee, ik bün beten lütter. Bloots
mi maakt dat nix!" Se dreiht wieder. "Wull doch mal
höörn, wat min ole Fründ Romano so denkt."
Prodi: "Endlich alleen! Uch, wat för'n Opstand! Meist weer
mi lever, de gresige Berlusconi weer staats mi hier henkamen! Em harr
dat ok mehr Spaaß maakt, so mang de ganzen annern Zwerge hier.
De groten acht! Dat ik nich lach! Na, ik bün ja ok nich
veel grötter. Man mi maakt dat nix. Berlusconi dorgegen... Man
kann ja w een,
dat he noch maal op so'n Lütt-Acht-Gipfel kümmt; kann ween,
dat se den noch mal wählt. Nich to faten. Dösig noog sünd
se, min Landslü un bloots se. Liekers leev ik ehr. Italien!
Och, min Italien, wat bring ik di för Opper! Sowiso weet ik bi'n
besten Willn nich, wat wi in de G8 to söken hebbt. Sogor dat
italieensche Weder hebbt de Düütschen al, woto denn noch
Italien? Och, harr ik doch noch Barroso sin Job! Fröher! Kommischoonspräsident
vun'e EU! Dat weer doch wat Reelles! Dor harr ik wat in't Krüüz!
Man so, mit Italien, da nimmt mi doch nüms mit eernst. Wat schall
ik hier? Un opneegst kümmt ok noch Bush to mi na Rom. Barroso
brukt sowat nich. Och, de olen Tieden as EU-Präsident, wat weern
de schöön..."
Merkel: "Arme Romano! Wat den een sin Uul, is even den annern
sin Nachtegall! Dat is nu Putin sin Frequenz."
Putin: swiegt still.
Merkel: "Dat Swiegen höört sik tofreden an!"
Se dreiht wieder.
Sarkozy:
"Eentlich sünd de mehrsten nich veel grötter as ik.
Ach, solk Drepen sünd doch wat Fiens! Allens lütte Männer,
un dorto en Fru, de ok noch lütter is as all de lütten Männer.
Ach, ik kann ehr good lieden, düsse Merkel! Bloots den Blair
nich; de hett meist normale Hööcht. He fallt op ünner
us. Man neegst Drepen is he ja gor nich mehr dorbi, denn is da ja
sin Nafolger. Un neegst Drepen bün ik de Baas! Ik, ik, ik!! Un
ik maak dat noch hunnertmaal beter as Merkel hier! Fru Merkel, ji
sünd de Schöönste hier; avers min Gipfel warrt noch
dusendmal schöner as hier! Ach, eentlich kann ik Blair ok good
lieden. Ach, is dat Leven schöön!"
Merkel dreiht wieder.
Blair: "Uff. Uff." (Swiegt lange still.) "Wa
satt ik ehr alle heff. Schaad is dat nich, dat ik nu gah un
liekers, freun kann ik mi ok nich över." (Swiegt still.)
"De Irak, wenn bloots de Irak nich weer." (He blädert
in en Book): "Hm. Hm, hm da. Da is dat Gedicht.
In min Drööm segg ik alltied Adjüs un ried minen
Weg,
neemhen un woso weet ik nich, da denk ik ni an.
Un de Afscheed is schön, un dat Schedenween is noch schöner,
un dat Schönste vun all is de Nacht un de rusen Luft.
In min Drööm winkt se alltied mit Hannen un seggt
mi Adjüs,
un den Afscheedsdrunk geevt se mi, un ik smüüster un drink,
ik bün froh, dat de Reis nu losgeiht, bün froh, dat ik
gah,
ik bün froh, ik bün froh, dat min Frünnen nich weet,
wat ik denk.
Ja, so geiht mi dat al lang. Sietdat dat mit den Irak... Och, wa
satt ik dat all heff!"
Merkel: "Tschüß, Tony. Ik weet ja doch, wat du denkst.
Avers ik segg dat nich wieder. Wees man froh! Man noch en anner
warrt neegst Maal nich dorbi ween. Putin will ja ok aftreden. Wat
he dat wohl wirklich deit...?" Se dreiht wieder.
Putin: swiegt still.
Merkel: "Hm. Hier is een, de wiss wat seggt." Se
dreiht wieder.
Bush: "Auauauauau! Ok min Dööts deit mi meist al weh!
Weer ik doch nich herkamen! Jedereen hier sett mi to! Un nu schall
ik mit Putin wat tosamen maken! Dat will ik gor nich! Wa satt ik ehr
alle heff!"
Laura: "Büst nich undankbor? Denk doch an Tony, den sühst
nich wedder! He is mit di dör dick un dünn gahn, bet rin
in'n Irak, nu tridd he af, un bannig mööd un all süht
he ut. Deit di dat nich leed?"
Bush: "Tony? Och, mit den is doch nix los! Woso schall so en
Waschlappen mi leed doon? Bavento is he grötter as ik! Nee, ik
will vun de all nix mehr weten! Auauau! Och weern wi doch al bi den
lustigen lütten Polen, mit em verstah ik mi so good! Un he is
ok lütter as ik."![Kaczynski (een vun de twee, man welk?)](welt_biller/kaczynski.gif)
Laura: "Welkeen lustigen lütten Polen meenst du?"
Bush: "Na den, de utsüht as de Dings in Disneyland, de söben
Zwerge, du weetst doch!"
Laura: "Welk?"
Bush: "Wat weet ik! De Zwerge seht doch alle liek ut! Mit Knollenneesen.
Jüst so as de Pole even."
Laura: "Ja, de seht liek ut, man dat sünd twee!"
Bush:
"Nee, söben. De söben Zwerge. Un Sneewittchen. Du weetst
doch noch, Laura, nich? Verleden Johr in Disneyland?"
Laura: "Nee, de Polen! Ik meen de Polen!"
Bush: "Wat denn, gifft't in Polen ok en Disneyland? Wüllt
wi hengahn? Ja? Prima, denn mutt ik nich mehr an de Poletik denken
un an den blöden Irak un an Putin! Och laat us doch, Laura, so
geern! Villicht kümmt de Pole ja mit? Hihi, he mang de söben
Zwerge..."
Laura: "Döösbaddel..."
|