Wahlrummel

vun Behrend Böckmann

Dor ståhn mål wedder Wahlen an, un dei Kannedaten för dat Europaparlement un dei Kommunalen Parlemente lüchten as ümmer anne Lüchtenpåhls un up grote Upstellers un versäuken up disse Ort, dei Wählers tau verkloren: Ik un mien Partei, wi willen dat Allerbest för den Wähler... Un dormit hei orrer sei von'n Lüchtenpåhl un dei Grotbillerwand ut den Wähler angrienen kann, möten väle Helpers ran un männigein sogor up 'n Ledder kladdern, üm disse Biller mit Kåwelbinner an'n Lüchtenpåhl so fasttaumåken, dat's nich gliek an annern Morgen nå ünnen rutschen.

Wat op eigen Fäuten steiht, kann nich rutschen!

Denn: Rutschen dei Biller rünner, denn künn't angåhn, dat so as Aktivisten von Greenpeace, PETA, Letzt Generatschon u.a. Krings an't Wark gåhn, dat sik ok "Wåhlaktivisten" an't Wark måken un dei Kannedatenaflichtungen nå ehr Vörstellungen verrungenieren: Sei kriegen Tähn von'n Kieler anmålt, Ogen von'n Rodfedder insett't un'n Ogenglös upsett't, dei Näs ward in'n Kreihenschnåbel ümwannelt usw.

Angela Merkel hemm s' dormalen tauminnst bloots den Slogan verkaspert!

Anner dickbrösige "Aktivisten" versäuken sogor, 'n Wåhlhelper wihrend sein Arbeid vonne Ledder tau schupsen un em so einen up'e Näs tau nuschen, dat hei inne Notupnåhm möt. Hemm' disse Lüd, dei as as "Ultrarechte" schullen warden, wat gägen dei Kannedaten, gägen dei Partei un dat Programm — orrer wat dorgägen, dat mit jeden Wåhlrummel Milljonen Euros för denn Ünnerholt von Schaulen un Ollenhüs fläuten gåhn? Orrer hemm's wat gägen uns frieheitlich liberale abendlännisch Demokratie?

Naja, dat gifft dat nich ümsünst! Is dat villicht kein gaud anleggtes Geld?

In Düütschland falln allein för ein Wahl so anne 60 bet 90 Milljonen Euros an Kosten an, dei von'n Bund för den Druck un dat Verschicken von Wåhl- un Breifwahlünnerlågen un dei Erfrischungsgeller för dei Lüd in't Wåhllokal nödig sind un berappt warden möten. Hentau kåmen för dei Europawahl noch EU-Geller un noch väle Milljonen för dei Billerutstellung anne Lichtenpåhls, dei Billerwänn', dei Stänn' vör dei Koophüs un Diskaunter un dei Fohrten œwer Land mit den Wahlbus, wo jede Partei för sik un dei eigen Kannedaten Reklåme måkt.

Wat schall dat Gejammer üm Geld? Dei "Partei" hett dor ein gaude Idee!

Disse Wahlkampfkosten liggen je nå Grött vonne Partei twüschen teihn un sössdig Milljonen Euros un kåmen in Düütschland — tausåmenräkent — up wiet œwer mihr as 120 Milljonen Euros för 'n einzigst Wahl! Un männig Kannedaten leigen as druckt, sei verspräken up't Popier Fräden un böten dat Kriegsfüer inne Ukrain düchtig an, sei verspräken Ümweltschuul un måken jede Menge Kompromissen, sei verspräken soschåle Politik un låten doch dei Scheer twüschen Arm un Riek immer wieder upgåhn.

Dor wunnert dat doch gor nich, dat dat son'n niege Ort Billerstörmer gifft, Börger, dei dei Schnut vull hemm' von't Gesabbel œwer 'n geschlechtsneutrale Språk, dat Seelenläben von't Schwien un Rott un sik bangen, dat's as Soldat in Krieg trecken möten, dat dat gaude Läben barchaf geiht, dat dat Inkåmen nich so is, dat 'n sik gaude Wåhnung leisten kann, un dat dei Kinner, wenn man denn noch weck inne Welt setten deit, nich nåkelt inne Schaul gåhn möten un ehr Öllern up'n Pingstmarkt Zuckerwatte un 'n Fohrt inne Barch- un Dålbåhn betåhlen kœnen.

Un wenn denn disse Minschen noch vonne Medien un ehr Geldgäber inne rechte Eck stellt warden, denn mutt 'n sik nich wunnern, wenn dei Afschreckungskraft von dat Etikett "rechts" miehr un miehr afnimmt...