vun Behrend Böckmann

Dei Wahl-o-Mat, 'n Wurt, dat nå'n Duden in'n drüdden un vierten Fall kein Ennung kennt un blot so un nich anners schräben ward, ok wenn hier un dor Wahl-o-Mat® tau läsen is, wobi dat ® dei Bedüdung hett, dat sik dat üm 'n inschräben Markenprodukt hanneln deit. Dormit is œwer noch nich klar, wat denn son'n
Wahl-o-Mat is. Un dor finn ik as Verklorung: Dei Wahl-o-Mat is 'n "Tool" mit Frågen un Antwurten, dat einen wiesen deit, wecker von all taun Wåhl taulåten Parteien dicht mit dien eigen politischen Ansichten œwerein kümmt. Œwer wat is nu 'n "Tool"? Wedder son'n "dinglisch" Wurt? Dat Wurt sülben hett inne inglisch Språk dei Bedüdung von "Warktüch", un so is 'n 14er-Schlœtel äbenso as 'n Håmer orrer 'n Såch 'n "Tool". "Tool" is œwer ok dei Nåm von'n amerikan'sch Heavy Metal Band, 'n Urt in Texas — un in uns digitale Welt 'n Programm, dat Upgåwen mit Hülp von'n Klappräkner, sotauseggen informatschonstechnisch, afarbeiten un lösen kann. Un dat "Tool" Wahl-o-Mat is 'n Programm, dat den Wähler helpen sall, dat Krüz up 'n Wahlzeddel bi dei Kannedaten un Parteien tau måken, dei mit sien eigen Ansichten œwerein kåmen.

Af 2002 ward dei Wahl-o-Mat in't Internet vonne Bundszentrål för Politisch Billung ünnerhollen un is af disse Tiet för Europa-, Bundsdach- un Landdachswåhlen in Betrieb. Informatiker basteln ut 100 Thesen, wecker 29 Parteien sülben vörgäben, in'n tweiten Gang 80 Thesen. In'n drüdden Gang warden denn 38 Thesen ut alle wichtigen Bereiche utsöcht, dei denn in'n stimmig Ordung bröcht warden, dat Programm utmåken, un dei Njuser (User = Benutzer) kœnen sik up disse Wies politisch verorten. Studenten sünd denn dei iersten Versäukskarnickel, un kriegen dei dat hen, denn geit dei Wahl-o-Mat onlein. Jedein Wähler kann den Wahl-O-Mat upmåken un bi jede These, also 38 mål mit "stimme zu", "neutral" orrer "stimme nicht zu" anklicken. Denn kann man dat, wat einen besonners wichtig is, noch taun tweiten Mål anklicken un denn deit dat Räknerprogramm dat mit dörch dei Klicks angäben eigen Denken un Befinnen tau dei Thesen vonne Parteien verglieken un gifft denn an, mit wecker Partei dat dei gröttst Œwereinstimmung gifft. Ik heff dat mål dörchspält un kreech denn tau weiten, dat mien Ansichten tau 53 Purzent mit dei vonne AfD œwerein sünd. Gott wäs Dank, secht mi dei Räkner noch nich "Du möst jetzt dei AfD wählen, denn all dei annern Parteien sünd in ehr Denken un Hanneln wiet af von dien eigen Vörstellungen." Man möt nich mihr grot denken, sondern blot anklicken, wat man sik so denkt, un man weit, weckern man wählen süll. As dei Nåm al secht: Dat geiht automaatsch. Nomen est omen.

Wenn bi di en Schruuv locker sitt, fråg den Wahl-o-Mat!

Un wecker nich ganz so plietsch is, för den gifft dat den Wahl-o-Mat ok in lichte Språk un ok mit Läs-Schablonen för Minschen, dei nich gaut seihn kœnen. Dei Macher näumen dat "barrierefreie Gestaltung" un den richtigen Schritt in Richtung "Inklusion un Teilhabe" för den Ümgang mit'n Wahl-o-Mat.

Näbenbi anmarkt, dei Wahl-o-Mat-Redakschon söcht dei Parteien ut, dorünner tauierst dei teihn Parteien in Bundsdach. In't Rennen gåhn sünd noch 31 anner, dorünner Piraten-, Tierschutz-, Naturschutz- orrer Gornpartei, Bayernpartei, Friee Sassen, Volt, Werteunion orrer ok "Exoten" as dei Vegetarier- un Veganer-Partei un dei Partei för Verjüngungsforschung... Väle annere oewer finnen sik as Minnerheitenpartei in'n Wahl-o-Mat nich wedder.

Œwer in unsen Wahlkampf dit Johr hemm dei ganzen "Exoten" wisslich ok Kanzlerkannedaten opstellt.

Dei Mikropartein hemm wi afraseert!