Sik sülvst verdeffendeern

vun Sibilla Frerich

Ik bün in letzte Tied veel an't Diskereern mit Frünnen över den Krieg in Nahoost. Welk Argumenten kaamt jümmer wedder, un ik much de hier geern mal tosamenfaten.

Israel dröff un mutt sik verdeffendeern

Ja. Okay. Dat hebbt se daan. Se sünd al lang fertig dormit. De Defensive is toenn.

Wenn mi een angrippt, kann ik — mutt ik — den Angriep afwehren. Ik kann — mutt villicht — ok den Angrieper k.o. slaan orr so versehren, dat he mi nich foorts wedder angriepen kann. Wat ik nich doon schull, is, em langsaam doodtotrampeln, wieldess he al besiegt orr sogor bewusstlos an'n Borrn liggt, un bavento sien Sippschaft uttorotten. Dat Eerste nöömt wi Sülvstverdeffendeern, dat Letztere nich.

Meddewiel seht all Minschen nau, dat in Gaza Kriegsverbreken passeert, ok wenn dat hier in Düütschland ut histoorsche Schaamhaftigkeit nich so nöömt warrt. Gaza is pulveriseert. De Bevölkern is an'n Borrn. De militäärsche Övermacht vun Israel is so enorm, dat vun en existenzielle Bedrauhn dör de Hungerleiderbande vun överlevende Palästinensers gor nich mehr snackt warrn kann. De Hamas is besiegt, se hebbt bloots noch nich kapituliert. Dat gifft Israel nich dat Recht, över den Lieknaam vun Gaza Amok to lopen.

Ahn den Överfall vun'n 7. Oktober wöör dat den Krieg gor nich geven

Ja, noch nich un nich exakt so. Dat Oktober-Massaker weer de Anlaat. Avers ahn den Överfall wöör dat ok keen Freden geven un keen gerechte Twee-Staaten-Lösung. En anner Anlaat wöör opduken. Dat Oktober-Massaker kann blangenbi bloots den Krieg gegen de Hamas begrünnen, nich den gegen de Zivilbevölkern.

De israeelsche Armee böögt Zivilschäden ut, woneem se kann

Hier fallt mi dat jümmers swoor, ahn Polemik to antern, also so as "Wenn se dat nich kann, kann se nich veel". Dat Zivilisten en Teel in düssen Krieg sünd, is vullkamen apensichtlich, un dat alleen is en Kriegsverbreken. Dat langt nich as Rechtfardigen för den Dood vun Zivilisten, wenn mang 50 Zivilisten 1 Guerillakämper steckt. Wenn militäärsche Ziele överhaupt existeert, rechtfardigt dat nich jeden Ümfang von Krieg gegen de normale Bevölkern. Zivile Dode to verhinnern, mutt een ok mal en militäärsches Ziel torüchstellen.

Leider is nich aftostrieden, dat op beid Sieden dat Tüchten vun Hass dat wichtigste Kriegsteel is. Beid Kriegspartein wüllt so veel Hass tüchten, dat en Freden in de neegsten Generaschonen unmööglich is. Dorwegen hett Netanyahu keen Vermaak an, dat de Geiseln friekaamt. Dorwegen warrt ok de Hamas nienich de Zivilbevölkern toleev inlenken; denn solk Verbreken orr dat Uthungern un dat de Suldaten denn op de hungrigen Minschen scheet, wenn se sik in ehr Noot doch na de Hülps-Utgaav waagt — dat schafft den nödigen Hass. Ünner de israeelschen Siedlers is de Hass ut unerfindlich Grünnen al immens — villicht wieldat se weet, dat se in't Unrecht sünd, eerst recht wenn se nu de Palästineeschen ut dat hele Westjordanland verjagen wüllt. Denn dat kümmt as neegst.

De eenfachen Lüüd in Gaza wöörn ok lever ahn de Hamas leven; man dat Israel en demokraatsch Opposischoon in Palästina ünnerstütt orr jemalen ünnerstütt hett, is ok noch nich vörkamen. Denn de kunn denn ja op en Fredensprozess dringen — orr eenfach dat palästineesche Volk vertreden.

Düütschlands Platz is an de Sied vun Israel, alleen al wegen de Geschichte

Ja, Düütschlands Platz is an de Sied vun en Israel, dat för Demokratie un Minschenrechten steiht; dat grünnt woor as Gegenentwurf to allens, wat de Nazis verbraken harrn; dat in en Region vull fiendselig Diktaturen sien Existenz gegen de Övermacht vun aggressive Navers verdeffendeern müss. Dat is nich dat Israel vun hüüt. De düütsche Solidarität gellt de gemeensamen Weerte, nich de lerrige Hülle dorvun orr den bloten Naam vun den Staat. Israel woor grünnt vun Minschen, de dat satt harrn, dat Juden överall "de Annern" weern. Se wullen endlich en Staat hebben, in den se de Normalen weern, as all Minschen annerwegens in ehr Heimatlänner ok de Normalen weern. Un de Staat schull ok en normale Staat ween. Düsse Gründungsafsicht schullen wi eernst nehmen un an Israel dat Maat anleggen, dat wi an all Staaten leggt (orr leggen schulln) — dat Maat vun Recht un Gesett. Israel anners to behanneln is ok bloots wedder dat ole "Die Juden sind eben anders" — also Rassismus.

Minschen vun jüüdsche Religioon un/orr jüüdsche Herkunft liedt jümmers noch an dat Trauma vun Antisemitismus, dat in de Nazitied to de Katastrophe föhrt hett, dat latent avers lang tovör un lang dorna — ok hüüt noch — ünner de Överflach simmert. Op düsse Laag vun de enkelten Minschen mutt een Rüchsicht nehmen. Dat se t.B. en Wunsch na hoge Sekerheit hebbt. Dat de israeelsche Regeern keen Skrupel hett, düsse Rüchsicht för verbrekerisch Akschonen uttonütten, maakt de Laag för de Minschen in Israel nich beter. In'n Klaartext: Ja, ok de Regeern in Israel feddert den Antisemitismus — sogor bewusst un villicht mit Afsicht, meen ik. Dat entschülligt nich antisemitisch Denken un Hanneln; dat is un blifft falsch. Bloots dumme Minschen hasst Juden överall in de Welt, wieldat de Staat Israel dat Jüdischween pauschaal för sik beansprookt un sik ansünsten benimmt as de Axt in'n Woold. Bloots dumme Minschen spiet op ehren jüüdschen Naver, schamfeert orr slaat em, wieldat in Gaza Bomben fallt. Bloots dumme Minschen bringt dat in en verqueren Kausaaltosamenhang. Bloots dumme Minschen. Vun de de Welt vull is. Israel kunn wat dorgegen doon, düsse Dummheit noch Foder to geven. Nee: Ik segg hier nich, Antisemitismus is de Jüüdschen ehr Problem, geiht mi nix an. De geiht natüürlich uns all an. Wi all rechtlich denken Börgersminschen mööt versöken, den Antisemitismus-Tsunami to stoppen, de jüst wedder in de Welt opkümmt.

Israel kunn uns avers villicht en beten dorbi helpen. Sünst warrt dat nich licht.

P.S. un blangenbi: Doch, ji Kotzbrocken vun de AfD, dat kannst allens seggen in uns Land! Un so schall dat ok blieven.