vun Behrend Böckmann

Dei niege Farf as Johrestrend
jeder mod'sche Minsch doch kennt,
blot nich jederein hüt weit,
dat sei "Veri Peri" heit.

Saharagäl un Polarwitt —
dei Autofarf kreech man noch mit,
ok hett Größing in ehr Läben
mit lila Tint väl Breiwen schräben,
'n Kopierstift hett sei nåhmen,
süll't taun Ünnerschrift mål kåmen,
indigo un violett
fünn's in'n Rägenbågen nett,
ehrn Rägenbågen gifft't nich mihr,
hei bedüdt hüt ganz oft "queer",
wüsst nich, wenn't lila schämern deit,
dei Farf nu Veri Peri heit.

Hüttaudåch da gellt nich mihr
von Goethe dei oll Farwenlihr,
Pantone hett dei Farwenmacht:
sœbenteihn-drei-nägen-drei-acht:
Dei Nummer von dat Mischtablett
för dat niege Violett.

Einst säd man tau Karolin:
"Dei letzt Versäuk süll lila sien"
orrer: "Hett man lila Büchsen an,
man nich schwanger warden kann!"
Doch dei Welt hett sik besunnen
un't niege Lila nu erfunnen:
Will man hüt dei Taukunft wågen,
möt 'n lila Tön nu drågen
un mit bätgen Phantasie
gifft disse Farf väl Energie,
gifft denn Minschen niege Kraft,
dat hei mihr as vördem schafft,
ward dei nödig Kraft em gäben
för dat digitale Läben.

Veri Peri för alle Dåch,
dat is dat bleike Lila-blåch,
doch anner finnen Blåch ganz nett
mit Ünnertön rod-violett.
Männig modisch Minsch ok weit,
woans dei Farf denn schämern deit,
wenn dat lichte Purpurbleik
föllt up Violett ganz weik.
Büchsen, Kleeder, Blusen, Schauh,
sülfst 'n Handtasch hürt dortau;
in Veri Peri giff't ok Schlüpper
för grote un ok lütte Hüpper.

Wat steiht dei "All-Over-Look" doch gaut,
dor fählt blot noch dei lila Haut,
'n Haut mit Schleier wier dei Kron
för Kledåschen "Ton in Ton",
"All-Over-Look" — dat is "Outfit" —
un man geiht mit dei Mode mit,
denn dat möt doch Dinglisch klingen,
sall't den nöd'gen Ümsatz bringen.
Un wat dull schlöcht denn dat Hart,
wenn't Outfit ein "Eyecatcher" ward,
'n "Henkieker" för jeden Dach,
den man nich mihr missen mach.

Hüt noch geef ik mi 'n Ruck,
wähl den lila "All-Over-Luk",
un all, dei denn mien Outfit seihn,
ward mien lila "Eyecatcher" freun.
Disse Farf geiht mi tau Sinnen,
lött mi wedder tau mi finnen,
disse Farf ut Blåch un Rod
bringt mi in dat rechte Lood,
dei schönste Farf, ik bün mi wiss
för ümmer Veri Peri ist!