vun Behrend Böckmann

Wier't nich anne Tiet, denn gauden ollen Frugensdach ok'n denglischen Nåmen tau gäben, so as dat hüt in Mod' is? Dit güng mi döch'n Kopp, as mi vör 'n Tiet dat Wurt "Veggieday" ünner dei Ogen keem. Dor mösst ik mi ierst mål klauk måken un keem denn dorachter, dat sik dat üm niemodsche Aposteln hanneln deit, dei dorvon predigen, dat 'n an einen Dach inne Wäk, äben an den Veggieday, kein Fleisch äten süll. In Amerika hett dat mit den Veggieday an'n Mondach anfungen, un nu gifft dat hier un dor bi uns in Dütschland ok Lüd, dei dat in Wirtschaften, Kantinen, Schaulen un Jugendhotels dörchsetten willen. Un denk nich, du kunnst einfach "Weggidäi" seggen! Dat dubbelte g will ingelsch utspråken warrn: "Weddschidäi" is dei korrekte Utsprååk! Blameer di man bloots nich!

Un as ik klauk wier, säd ik tau mien Fru: "Weitst wat, hüt måken wi 'n Veggieday." Œwer sei wüsst dormit nich so recht wat antaufangen un antert mi "Dei Hochtietsdach is doch all wäst." Un denn verklor ik ehr disse niedmodsch Såk un verklor ehr, dat dat kåmen künn, dat dat 'n Order gifft, ümmer an'n Dunnersdach inne Wäk Karbonaden, Suerfleisch orrer Pökelbråden gägen Klümp un Pannkauken uttautuschen. "Wenn't so is", säd mien Fru, "denn måken wi ja mit uns Beern un Klümp, Tüffel- un Eierpannkauken, dicken Ries mit Zucker un Kanehl un Armen Ridder nauch Veggiedays."

Un denn fangen wi doch an tau simmelieren, ob dat 'n Dunnersdach sien möt un würklich 'n Bewägung dorför nödig is, den Minschen dorvon aftauhollen, dat hei Fleisch äten deit un sik so as 'n Gaus orrer Kaninken blot noch mit Gräuntüch taufräden gifft. Un denn beläs ik mi un kriech mit, dat dei gräunen Veggieday-Aktivisten Minschen bewägen willen, dorœwer nåtaudenken, ob 'n Minsch würklich in'n Johr so üm dei 60 kg Fleisch äten möt un woans hei dörch weniger Fleisch up'n Töller sien eigen Sundheit un dat Läben vonne Dierten verbädern kann.

Œwer dei Minsch lött sik dat noch nich giern vörschrieben, wennihr hei Fleisch äten un wennihr hei kein Fleisch äten dörf. Œwer uns Demokratie gifft den Spälrum dortau: Liekso as Söder åpentlich Currywust fuddern un dei Fleischindustrie Reklååm för Steak måken kann, kœnen dei Veggie-Aktivisten mit väl Upseihn Reklååm för' n Dach åhn Fleisch måken — un nich jederein möt sik dei Jack antrecken.

Kantüffelpuffer sünd doch noch leckerer as Pannkauken!

Un denn kåm ik in't Gruveln un mi föllt wat in, dat einen plausibel un doch nich plausibel vörkümmt. Wenn't Veggieday gäben sall un den "Girls' day" all gifft, worüm denn nich von 'n "Birthday" för 'n Geburtsdach un den "Womens' day" för' n Frugensdach schnacken? Anners kannst dat dei jungen Minschen doch nich miehr verköpen — nich dei "Generaschon Z" orr "Gen Z" (spreek: "Dschen Si", dat sünd dei twüschen 1995 un 2012 Borenen) un ierst recht nich dei "Gen alpha" (dei siet 2012 Borenen). Allein düsse verdreihten Sülvstbeteiken wiesen, dat dor bloots Ingelsch hülpt.

Wenn'n tau'n Bispill dei Gedenk- un Ehrendååch ut dei DDR (dor gäw dat ja nu jüst kein Knappheit an) dei "Generaschon alpha" smackhaft måken will, dor kunnst väl Fantasie bruken: Dei "Tag der Werktätigen des Post- und Fernmeldewesens" (9. Februar) müss denn "Communications Workers' Day" heiten un dei "Tag der Werktätigen des Bereiches der haus- und kommunalwirtschaftlichen Dienstleistungen" (20.9.) warrt tau'n "Keep Home and Hood Tidy Day" (man dei Warktätigen falln dorbi so'n bäten ünnern Disch). Un so wieder!

Œwer all disse Dåch sünd ja man blot "Akschonsdåch" un noch kein Fieerdåch. Nähmen wi den Frugensdach. Hei hett in Amerika mit'n Akschonsdach sienen Anfang nåhmen, as dor 1909 Frugenslüd taun iersten Mal up'e Stråt güngen, üm för ehr Wahlrecht tau demonstrieren. Von dor ut güng dat œwer Kopenhågen nå Düütschland un anner Länner in Europa un hett sik bet hüt hollen. Låters hett dei UN den 8. März as Frugensdach in ehrn Klenner upnåhmen, as 'n Dach, an weckern Polletikers un Regierungen hollen sünd, sik för dei glieken Rechten von Frugens- un Mannslüd intausetten. Un süh, dor dat Land Berlin weniger rode Dåch in'n Kalenner hett as dei bavarisch Friestaat, is dei Frugensdach af 2019 in Berlin un ok af 2023 in MV 'n nieger Fierdach un nich blot 'n Akschonsdach.

Un nu mål Hand up't Hart: Bruken wi Nuurddüütschen nich all miehr nie'e Fierdåch, üm dei Bayern Kontra tau gäwen? Un vunwägen uns multikulturelle, multiethnische un öwerhaupt multi-dingsda Gesellschåp schulln dat kein religiöse Fierdåch sien. Also mål ran an't Wark un poor schöne Fierdåchnamen up Ingelsch utdrücken — denn kannst dat ok an'n Mann (m/w/d) bringen!