Dei Valentinsdach

vun Behrend Böckmann

Rode Harten un Schleufen wiesen up den 14. Hornung hen un bedüden dei Mannswelt, Blaumen, Rükels orrer säute Såken ut Schokelor för dei Leiwste tau köpen. Åhn dei egentlich' Bedüdung tau weiten, steiht dat Köpen un Verköpen ganz båben an. Wat gifft dat von dissen Dach tau vertellen?

Dor möt 'n ganz hinnen inne Geschicht anfangen, denn all inne Antik' hemm' dei Römer an' 14. Hornung ehr Göttin Juno in dei Wies Blaumen dorbröcht, dat dei Mannslüd ehr eigen Frugens Blaumen taukåmen leeten.

Dei Hillige Valentin, in't 3. Johrhunnert Bischof vun Terni. Tja, twüschen "Kopp af!" un "Hilligspräken!" hemm dei Lü dormalen keen Middelwech funnen

Ein anner Geschicht is dei von denn Bischoff Valentin von Terni in Italien. Hei hett dat Vertellen nå Leiwende verhäurådt un tworsten uk Soldaten, dei dat tau dei Tied nich dörsten. Dorför hett man em nå'n Order von Kaiser Claudius II. an'n 14. Hornung 269 nå Christi denn Kopp afschlåhn. Späder is hei hillig språken worn.

Noch anner wiesen dorup hen, dat man dissen hilligen Valentin nich verwesseln dörp mit den Valentin von Rätien in Graubünnen, denn dei hett nicks vör Leiwende måkt, sonnern dei Minschen vor dei fallenden Lieden as taun Bispill Åhnmacht bewohrt.

Wiederhen gifft dat denn Schnack, dat dei Anfang von denn Valentinsdach inne christliche Liturgie licht, denn dornå wür inne Kark an'n 14. Hornung dat Kåmen von Jesus Christ as Brüjam för dei Häbenhochtied fieert. Späderhen is dat denn verschütt gåhn.

Valentinsfieern hett dat tauierst an den englischen Hoff gäben. Bekannt worn is, dat König Richard III. son'n Valentinsfier 1383 afhollen hett. Hier wür'n Riemels œwer dei Vågels un ehr Porung vördrågen. Hier sallen dei Vågelhochtieden üm den Valentinsdach in männig Urten von Dütschland ehren Utgang hemm'.Af't 15. Johrhunnert geef dat in England an dissen Dach Verleiwte, dei sik Blaumen schenkten un einanner Geschenke måkten.

Englänner, dei inne "Niege Welt" utwannert sünd, hemm' ehrn Valentinsdach mitnåhmen un so is hei nå den Tweiten Weltkrieg äbenso as Coca-Cola un Kaugummi mit dei Amerikåner nå Dütschland kåmen. Den iersten "Valentinsball" geef dat 1950 in Nürnbarch.

Nich tauletzt warden hier un dor Stimmen lud, dat dei Valentinsdach, so as hei hüt bi uns bet hen nå Japan fieert ward, up dei Globalisatschon taurüchtauführn un äbenso as Halloween ein Import ut Amerikå is.

Dor sik œwer dei Welt in Richtung gräun ännert, sallen nu nich mihr Blaumen, Schokelor un Rükels taun Valentinsdach dat sien, wat's mål wiern, ok wenn dei Hannel dormit giern dat Geschäft twüschen Wihnachten un Ostern beläben will. Dat gräune Denken hett nich blot dei Gräunen tau mihr Anseihn un sogor inne Regierung verhulpen, sonnern bringt ok männig Minschen dortau, sik in Richtung gräun tau wanneln, vegetar'sch orrer vegan tau läben, unverpackt intauköpen, Kledåschen ut Flass, Linnen orrer Kattun antautrecken, Bioeier inne Pann tau schlågen, Mell un Netteln as Willkrut wassen tau låten, un dei dorgägen sünd, dat 'n Madding as Köder up'n Angelhåken treckt ward. Duersåmkeit (Nachhaltigkeit) is dei Devis', dat minschlich Daun sall wedder för'n lang Tiet vörhollen un so duerhaftig sien as dei Frädenswor tau Kaisers Tieden. Wind-, Sünnen- und Wåderenergie ersetten Atom- un Kohlestrom, Ierdwärme denn Åben, Sojabohnen un Lupinen warden tau gräune Schnitzel upfidummt, Håwermelk lööst dei Kauh af un so möten nu ok dei Leiwesgåwen taun Valentinsdach bäten biogräun warden.

Wat is an Blomen nich biogräun? Dei kamen nich ut Kenia!

Œwer wat för duersåme ("duersåm" is dat plattdüütsche Woort för "nachhaltig") Gåwen åhn böse Kåhlendioxid-Warmhus-Gase sall hei ehr un sei em nu so anbeiden, dat dorbi ok noch Freud un Vergnäugen upkümmt? Vörschlääch sünd taun Bispill: Wieldat Mannslüd Jäger un Sammler sünd, sall sei för em 'n Schnitzeljagd in Hus un Gorn organisieren un hei dorbi por "Bio-Gautschiens" finnen, dei hei nå un nå inlösen kann. Hei hengägen künn mit ehr Lütten Meddach inne Puuch äten, mit ehr ünner dei Dusch hüppen un sei dornå inne Puuch massieren. 'N Gautschien för 'n Kinobesäuk, för 'n Iesbåhn un 'n "Bungeejumping" orrer por Wellnessdach in'n Bio-Hotel wiern ok denkbor, äbenso sülben 'n Kauken backen orrer 'n "Candle-Light-Dinner" anrichten. Man kann sik ok gägensiedig mit 'n Billerbauk orrer 'n Musiksticken œwerraschen, 'n Tasch för Ackerschnacker prünen orrer as Fådenkünstler Biller as Erinnerung rutsäuken, upfädeln un sichtbor anbringen.

Bio-Ünnerwäsch? Oh, äh, ja, heel romantisch... Doch, wirklich...

As Vörschlåch heff'k denn noch den Henwies up duerhaftig Biowäsch funnen. För em dortau 'n ümweltfründlichen Haut orrer Mütz ut olle Kaffesäck un för sei 'n ümweltfründlich Handtasch ut Amsterdam, ok ut 'n ollen Kaffesack. Äbenso gifft dat Henwies up wunnerschöne Kattun-Ünnerwäsch orrer Alpaka-Decken. Nich tauletzt warden 'n Pop-Art-Portrait ('n målt't Bild von'n Aflichtung) un 'n romatisch 3D-Hartlamp ut'e Lüchtenwelt vörschlågen.

So beseihn, helpen disse duerhaftigen Gåwen taun Valentinsdach ok, dat dat 1995 up'e UN-Klimakonferenz in Paris fastlecht 2 Gråd-Enn' för dei Ierderwarmung mœglich ward.

Ok en möögliche Gaav: Schenk dien Hart!