Dei UNO reformiern

vun Behrend Böckmann

Uns feministisch Ministersch för Butenangelägenheiten Annalena Baerbock höll sik Enn' September in Amerika up. Sei wull all rutkriegen, woans sei sik för den Fall benähmen möt, wenn Trump dei neechtsen Wåhlen winnen süll. Œwer sei wull ok inne UNO-Vollversammlung up'n Putz haugen, denn nå ehr Ansicht is dei Säkerheitsrat oltmodsch un nich mihr tietgerecht.

Wenn dei Weltfräden un dei internatschonale Säkerheit hütigendåchs wohrt warden sall, denn möt dei UNO von Grund up an reformiert warden. Baerbock ward sik för Düütschland dorför in' Tüch leggen, dat dat UNO-System "gerechter, inklusiver un handlungsfähiger" ward. Dei UNO von hüüt is 'n UNO von't 20. Johrhunnert un möt mit Blick in't 21. Johrhunnert modernisiert warden. Den Fräden erhollen, dat blifft 'n Upgåf, œwer dat internatschonale Recht, dei Klima-, Gesundheits- un Entwicklungs-Poletik is nie tau dörchdenken. Dei Rechte von Mätens un Frugens un dei Duerhaftigkeit inne Entwicklung sünd ok nie tau dörchdenken. Un man möt as UNO, so Annalena, wat daun gägen dei Klimakris un för dei Gesundheit weltwiet — un dei internatschonale Finanzwelt nie upstellen, so dat dei Partner in Afrika, Lateinamerika un Asien ok wat dorvon hemm'.

Wohrschuu! Wer dei Welt einsiedig höllt, kann licht dat Oewergewicht kriegen un ümfalln!

Wieldat nu Düütschland föftig Johr UNO-Maat is, gifft dat in New York 'n lütte Fieer mit unsen Kanzler Olaf Scholz, Ümweltministersch Steffi Lembke un Entwicklungsministersch Svenja Schulze, denn an'n 18.09.1973 würn dei BRD un dei DDR togliek UNO-Maat — also is Düütschland sotoseggen ein duppelte Jubilar. Uns BRD is nich blot in Brüssel 'n gauder Geldgäber (2020 wiern dat ca. 28 Mrd.), sonnern lannt ok in New York achter dei Verenigten Staaten up Platz twei (2021 mit ca. 6,7 Mrd. US $). Tja, von Alexander Woollcott (ein von Dorothy Parkers Algonquin-Krink von Lästermuulhelden) gifft dat dat Bonmot: "Kriege sünd Gott sien Aart, Amerikaners Geografie to lehren." Datsülvige gellt för Düütschland denn woll mit Geld: Wi lehren Geografie, wenn wi kieken, wor uns Geld henflütt.

Blifft noch antaumarken, dat dei Medien Scholz för kläuker hollen, denn hei telefoniert noch af un an mit Putin. Dei Baerbocksche lött dat hengägen sien — för dei niegen Gräunen, dei Militärgräunen, is dat binah Landsverråt. Baerbock höllt 'n gräunen Anstrich för dei UNO för väl nödiger. Wenn'n kiekt, wo dei Gräunen sik entwickeln, mutt'n sogår dor noch bäden, dat dat miehr warrt as bloß ein Anstrich — dat ok noch ökologische Substanz nåblifft. Nich bloß in Såken Pazifismus smieten dei Gräunen ja meddewiel einen Grundsatz nå den annern oewer Bord — ok in Såken Ökologie.

Woans heit dat in'n Lüdschnack: „Niege Bessen kihren gaut“ orrer „Wenn Schiet wat ward...“ Un dat ward miehrstens secht, wenn 'n gaudet Enn' nich in Sicht is.