 |
|
vun Behrend Böckmann Palästina licht dor, wo dei Tieträknung mit dei Geburt Jesus Christ anfüng, un wier einst dat Rebeit, wat hüt den Staat Israel, den Gazastriepen, dat Westjordanland un ok Deile von Syrien, den Libanon un Jordanien utmåkt. Un dor läwten dei Kanaaniter, dei sik af't 13. Johrhunnert v. Ch. „Hebräer“ näumten; un Hebräisch wier ok dei Språk, in wecker dat Olle Testament affåt't wür. Ierst as dei babylonisch König Nebukadnezar II. in't Johr 586 v. Ch. den Tempel von Jerusalem kort un klein måkt un dei Hebräer in't Babylonisch Exil keemen, wür nå un nå Aramäisch dei Ümgangsspråk un Hebräisch dei Språk för dei Liturgie un för Teksten von Denker, Dichter un Afkåten. As Jesus üm dat Johr Null in Bethlehem up'e Welt keem, dunn wür dat Hillig Land von Rom regiert. Jesus wier von Geburt an 'n aramäisch schnackender Jud, 'n Aflegger von Abraham as den Urvadder von't Volk Israel, dat blot „Jahwe“ as sienen alleinigen Gott kennen däd. Tau disse Tiet wiern dei Römer in't Land an'n Jordan inmarschiert un näumten dat „Palaestina“. As sik dei Juden twüschen 66 un 74 nå Ch. gägen dei Römer upböömten, würn's von dei niegen Herrn ut ehr Land jåcht. Ok Jesus un sien Adepten verleeten dat Hillig Land, treckten inne Welt un sünd so dei Anfang von Christendaum mit ehrn eigen Gottvadder, Sœhn un Hillig Geist.
As dei Christen denn tau Macht un Anseihn kåmen wiern, hemm's in't 11. un 12. Johrhunnert mit ehr Krüztööch versöcht, in't olle un einstig Reibeit von Palästina christliche "Krüzfohrerstaaten" tau grünnen. Dat güng bannig dornäben, denn dei muslim'schen Araber mit Allah as Gott un den Propheten Mohammed harrn all 691 den Felsendom up'n Tempelbarch von Jerusalem hensett't un sik in't Hillig Land ok militärisch so inricht't, dat s' dei Krüzfohrer-Christen düchtig dat Jackvull gäben künnen. Un so wür Palästina as Rebeit vonne islamischen Sunniten nå un nå Deil von't mächtig Osmanisch Riek, dat sik dörch dei Innåhm vonne Inglänner bet an't Enn' von'n 1. Weltkrieg höll. Nå'n 1. Weltkrieg hanneln dei Siegermächt in Paris ünner sik ut, woans man mit dei Verlierer ümgåhn wull, un beschluten 1922, üm den Fräden tau säkern un üm Rüstung un Afrüstung tau kontrolliern, den „Völkerbund“ mit Sitz in Genf tau grünnen. Disse niege Völkerbund sett't Ingland as Schutzmacht för Palästina un Mesopotamien in — un so harr Ingland nu dat Seggen in sien Schutzrebeit (Protektorat). Dei hütig Libanon un Syrien würn Frankriek as Schutzmacht von'n Völkerbund tauspråken. Inglänner un Franzosen hemm' sotauseggen ehr eigen Int'ressen up'n Puckel vonne arabischstämmig Bevölkerung un dei jüd'schen Inwannerer dörchsett't. So ward all 1923 ünner dei inglisch Schutzmacht in Tel Aviv — dat in't Johr 1909 as Vörurt von Jaffa (Jaffa-Appelsinen gellen as dei besten inne Welt) buucht woor un in dat sik mihr un mihr Juden ut alle Welt ansiedeln —, in Tel Aviv also hemm dei Inglänners mit 'n sülfstännig Verwaltung dat Muster för den taukünftigen Staat Israel lecht. Doch dei Inglänner räken wull nich dormit, dat dat dei arab'schen Palästinenser nich geföllt — dorbi harrn sei sik dat eigentlcih denken kunnt. Un so kümmt man von Anfang an nich gaut miteinanner ut. Inwannert Juden un ansässig Araber liggen duerhaft in'n Striet, dei arab'schen Palästinenser gäben den inglischen Mandatsdräger dei Schuld an dissen Taustand un bringen so dei Schutzmacht inne Predulch.
An'n Enn' von 2. Weltkrieg läben in dit Rebeit all 30 Purzent Juden — un dei Inglänner as Schutzmacht kriegen dat nich hen, dat Araber un Juden frädvull näbeneinanner läben, taumål dörch dei Taustänn' in Europa mihr un mihr Juden in Palästina 'n niege Heimat säuken. Doch dat gifft 'n Problem, denn dor, wo dei Juden sik ehrn Staat Israel wünschen, dor läben nu all so anne 2000 Johr dei Palästinenser, un ok dei Muslime hemm' hier ehr Hillig Städen. Un so finnen nich all Araber dei Ansiedlung von Juden ganz koscher; sei kriegen sik mit dei Inglänner un inwannerten Juden inne Plünnen, un Ingland gifft sien Palästina-Mandat, dat miehr un miehr tau'n Last warrt, ielig as ein hitte Kartüffel an dei intwüschen grünnt UNO (as Nåfolger von'n Völkerbund) af. Un denn beschlütt dei UN-Generalversammlung an'n 29. Näwelmånd 1947, ut Palästina för knapp 600.000 inwannert Juden un dei ansässigen 1,3 Milljonen Palästinenser twei Staaten tau billen. Dei Juden süllen denn 56% vonne Fläch kriegen — un dei Palästinenser, dei bet dorhen tau 90% dei Fläch beseeten, sik nu mit 43% begnäugen. Dei Rest von 1% üm Jerusalem rüm süll ünner internatschonale Verwaltung stellt warden. Dei Juden stimmen dissen Plan tau, denn för sei wier dat ja ein Winst; dei oltansässigen Palästinenser un ehr arab'schen Nåwern sünd dorgägen, denn sei harrn ja bethertau meist allens hatt un seihn dat as ehr eigen an. Liekers röppt dei israel'sche Poletiker David Ben-Gurion an'n 14. Mai 1948 — hei wier tau dei Tiet Vörsedder von'n Jüd'schen Exekutivrat in Palästina — den Staat Israel in't Stadtmuseum von Tel Aviv ut. Dei arab'schen Nåwerstaaten Ägypten, Jordanien, dei Libanon un Irak sünd vergnatzt, denn sei wullen, dat 'n palästinen'scher Staat entsteiht. Un so rücken's gliek an'n anner Dach mit Truppen in den an'n Dach tauvör grünnten Staat in —— un verliern dissen iersten israel'sch-arab'schen Krieg, dei ok as Unabhängigkeitskrieg bekannt is. Mit dei Staatsgrünnung wür fastlecht, dat dei Palästinenser up 40% von't Westjordanland mit Ostjerusalem un den Gazastriepen ehrn Staat grünnen künnen. Œwer dei Palästinenser un arab'schen Nåwern seihn dat anners, sei wulln den Staat Israel oewerhaupt nich akzepteern; un so keem't gliek taun Krieg, un Israel lött mit Hülp von Treckvadder Amerika dei Palästinenser dat fäuhlen. Israelisch Truppen nehmen in't Westjordanland dei Urte Lydda un Ramle in un jågen twüschen 50.000 un 70.000 palästinee'sche Araber in't jordaan'sche Exil.
So höll sik Israel gliek in't Johr 1948 nich an dei UNO-Order. Un dei Araber hemm' wat gägen Israel, sünnerlich taumål Israel ok in't för dei Palästinenser vörseihn Rebeit Juden ansiedelt. Un so kümmt Israel dörch den Ümgang mit dei Palästinenser un ünner dei Bedingungen von'n weltwieden „Kollen Krieg“ nich tau Rauh: 1956 bräkt 'n Krieg dörch dei Suezkris' ut, 1967 kümmt dat tau den Söss-Dåch-Krieg, 1973 gifft dat den Jom-Kippur-Krieg, 1982 den iersten Libanonkrieg, 1991 kümmt dat taun Golfkrieg, 2006 denn dei tweite Libanonkrieg, 2009 dei ierste Gaza-Krieg un nu 2023 dei tweite Gaza-Krieg. Dei Palästinenser un dei arab'sche Welt sünd untaufräden, un dormit Palästina inne Welt hürt ward, wür mit Hülp von'n ägyptischen Präsidenten Gamal Abdel Nasser in'n Maimånd 1964 dei Organisatschon för dei Befreiung von Palästina (PLO) grünnt. Doch dei Wech is lang un hart. Besonners bekannt wür up dissen Wech Jassir Arafat, dei drüdde PLO-Baas un af 1996 bet tau sienen Dod in't Johr 2004 dei ierste Präsident vonne palästinensisch Autonomieregierung. Nå den Iersten Palästinenserupstand ("Intifada") von 1987 hett Arafat dat wull henkrägen, dat Palästina un Israel so miteinanner ümgüngen, dat dei PLO 1988 den Staat Palästina utraupen künn. Un dei Staat Palästina mit 'n Autonomie-Status ward von 138 UNO-Maten anerkannt; Israel, Amerika, dei Schwiez, Düütschland, Österriek un anner westlich Länner daun dat nich, hemm' œwer diplomatische Verbinnungen tau dei Autonomieregierung. Un so keem dat denn, dat den palästinensisch Präsident Jassir Arafat un dei beiden israel'schen Poletiker Shimon Peres un Jitzchak Rabin in't Johr 1994 dei Fredensnobelpries tauspråken wür. In dit Johr würn ok dei palästinens'schen Autonomiegebiete (Westjordanland un Gazastriepen) inricht't. So keemen sik Israel un Palästina mål neeger un mål wedder inne Plünnen, dei Konflikt is so oolt as dei UNO-Twei-Staaten-Plan. Œwer dat rumoort, denn dei Ierste Intifada keem nich von allein, sonnern dor harrn Muslimsbräuder 'n „Organisatschon islam'scher Wedderstand“ billt, un dei setten sik in Gazastriepen fast, warden mit Geld un Waffen vonne Türkei, den Iran un Katar utstaffiert, dormit's denn gägen Israel vörgåhn kœnen. Un noch 'n tweit muslimische Terrorgrupp billt sik. Dat sünd dei Hisbollah, sei sünd noch bäder mit Waffen un Soldaten utstaffiert as dei Hamasterroristen un griepen von Tiet tau Tiet von'n Libanon ut Israel an.
Un ümmer denn, wenn Israel sogor gägen den UNO-Willen inne Palästinerrebeits einen Kibbuz nå annern inrichten däd un deit, flammt dei Konflikt wedder up. 2003 kümmt man 'n Twei-Staaten-Lösung wedder bäten neeger, denn is't wedder ut. Wat 1948 mit dei Staatsgrünnung von Israel anfüng, is hüt ümmer noch dei Born för den Arger un Groll, denn rund 750.000 Palästinenser würn ut't niege israelisch Staatsrebeit schasst un mössten för 500.000 inwannert Israelis Platz måken. Un Palästinenser, dei dat in Israel versäuken wullen un bläben sünd, hett dei israel'sche Regierung, villicht nå't Bispill „Bodenreform“ inne SBZ/DDR, vier Purzent von't Land låten un denn groten Rest von œwer 90 Purzent in jüd'sches Staatseigendaum un 'n jüd'schen Natschonalfonds ümwannelt. Denn besett't Israel dei för dei Palästinenser utwiesten Rebeits, ümmer mihr un mihr Palästinenser nähmen Rietut, dat Palästina-Frömdenwark vonne UN (UNRWA) tellt tau Tiet mihr as fief Milljonen Palästinenser, dei inne Frömde läben, dorünner ok gaut 175.000 bet 225.000 in Düütschland. Gägen den UN-Willen un den Palästinenserwillen hemm' sik 700.000 israel'sche Siedler in't Palästinenserrebeit Westjordanland dållåten un sorgen so dorför, dat 'n nich gaut upeinanner tau spräken is. Dor dei muslim'schen Palästinenser ümmer wedder mål upmucken, warden's von Israel mit Polizeigewalt taurechtstuckt; un dormit's nich nå Israel inrücken, buucht 'n nå't Bispill von'n Ulbricht sienen innerdüütschen „antifaschistischen Schutzwall“ hoge Tuuns un Muern üm dei Araberrebeits. Un wecker sik nich so verhöllt, as Israel sik dat denkt, dei lannt ganz fix achter Trallen. So sitten 5000 utwussen Palästinenser in, väle dorvon åhn Prozess; un hentau kümmt noch, dat jeden Månd bummelig twüschen twei- un dreihunnert Kinner upgräpen un fastsett't warden.
Ut den palästinee'schen Wedderstand billen sik ünnerscheedlich Gruppen, so dei Fatah, dei hüüt noch in't Westjordanland regeert un as "gemäßigt" gellt, oewer ok dei Hisbollah, dei sik in'n schiitischen Libanon billt hett (dei Palästinenser sünd Sunniten) un bannig militant is. Dei politisch Organisatschon in'n Gazastriep näumt sik Hamas un versteiht sik as „Organisatschon von'n islam'schen Wedderstand“. Sei hemm 2006 in ein Wahl in'n Gazastriepen dei Fatah besiegt un quasi rutsmeten; siet dei Tied gifft dat dor kein Wahlen miehr. Dei Hamas radikalisieren sik, as man hüt so secht, wenn einer denn dat riskieren deit, wat 'n normaler Minsch nich måken wür. Dei Hamas rüsten ok militärisch up, un dor dei Gazastriepen mit 365 km² nich mål dei Grött von Hamborg hett, buucht man as 'n Mullwörm 'n Tunnelsystem bet 40 m ünner dei Ierd, dat 'n wull mit dei Metro in Moskau un Paris verglieken kann — orrer mit den düütschen Regierungsbunker, dei nå 'n NATO-Order inne föftiger Johren in't Ahrdål/Rhinland-Pfalz klammheimlich mit kilometerlange ünnerierd'sche Gäng buucht wür; Gäng, in wecker man mit'n Fohrrad in dei 936 Schlåpkåmern, 897 Büros, fief Kantinen, dei ökumenisch Kark, dei Krankenstuf un dat Studio för't Kiekschapp, dei Plenarsäls un den Barbiersalon kåmen künn — ein Anlåch, utlecht för 3000 Regierungsbeamten, wenn dat taun Atomkrieg mit dei Sowjetunion kåmen süll. Doch dei Hamas hemm' sik radikalisiert, dat Ruder an sik räten, gåhn mit mihr Gewalt un Terror gägen Israel vör as dei Fatah un deilen nich mihr dei Ansichten vonne Autonomieregierung in Ramallah. Un ok dei UNO, dei dor ünnen ümmer noch 'n Wurt mittauräden hett, un sülfst dei besten Frünn' von Israel kriegen dat nich mihr hen, dat sik dei Striet lecht un Juden, Araber un Christen in Palästina so mit- un bieinanner läben kœnen, as uns dat Lessing dörch sienen klauken un wiesen Nathan weiten lött.
Dat gifft mihr as 10.000 dode Palästinenser, dei wull nich all Hamas-Maten wiern, un mihr as 25.000 Kinner, utwussen un oll Lüd fangen Blessuren in. Israel hett sik nu vörnåhmen, so gägen dei Hamas in ehr ünnerierdschen Tunnels vörtaugåhn, dat's all tausåmen „eliminiert“ warden orrer — üm mit Backhus tau schnacken —: so as böse Wülf „entnommen“ warden. Dei Gazastriepen is tau Israel un tau Ägypten dicht, dei Minschen ut Gaza-Stadt sallen sik bettau nå Süden begäben — un sünd so up'e Flucht, as wenn sik all von Hamborg-Volksdörp nå Hamborg-Altona begäben mössten. Dat fählt an Äten un Drinken, an Medikamenten un allens, wat 'n Minsch taun Läben brukt. Sülfst dei amerikan'schen Frünn, dei Israel dat Recht up Sülfstverdeffendierung tauspräken, finnen dat nich gaut, dat Israel tau Tiet nich mål dorför tau hemm' is, 'n humanitäre Paus tau måken, dormit Hülpsgäuder von Ägypten ut in'n Gazastriepen rinkåmen un Fluchtwääch von'n Nuurden nå'n Süden inricht warden. Dei arab'schen Nåwern hollen dat israelisch Hanneln för 'n Verbräken. Düütschland süht dat dörch sien Geschicht bäten anners, denn dei Verbräken an söss Milljonen Juden twüschen den as Progromnacht bekannten 9. Näwelmånd 1938 un dei Befrieung von't KZ Auschwitz dörch dei Rode Armee an'n 27. Hartung 1945 lasten ümmer noch up uns. Wi hemm' Juden 'n niege Heimat anbåden, un wi hemm' Araber un Palästinenser as Frömde upnåhmen, dei wägen dei israelisch Poletik ehr Heimat verlåten hemm' un sik nu ut Groll tausåmen gägen Israel upböömen. Doch uns Poletikers möten hüt un in'n Momang dei israel'schen Poletikers un Israel stråken un dörpen nich taulåten, dat sik dei Araber up'e Stråt för „Frieheit för Palästina“ insetten. Dei ganze Nahoost-Regioon fohrt al siet lange Tied in ein grote Sackgass. Un wat denn?
11.11.2023 |
'N niege unendlich Geschicht
