Dei Unbelihrboren in Sassen un Thüringen

vun Behrend Böckmann

Dei Wåhlen in twei oostdüütsche Bundslänner sünd dörch, Brannenborg steiht noch bevör. Dor sünd nu dei Polit-Forscher schwor togang. Un Forscher heiten Forscher, wiel sei forsch sünd. Männichmål noch forscher as forsch. Dat gellt nich minner för dei Forscherinnen. Ein gaudes Bispill is dei Glücksforschersch un Professersch Hilke Brockmann, Johrgang 1965.

För unbelihrbor höllt Hilke Brockmann dei Sassen un Thüringer. In Nienborg/Weser up'e Welt kåmen, studiert s' Soziologie, Psychologie, Apentlich Recht un Politikweitenschåp un lannt œwer männig Twüschenstatschonen, ünner annern ok in Rostock, as Professersch för Soziologie anne Jacobs-Universität in Bremen un forscht dor, wat Glück is un woans Minschen dörch't eigen Taudaun glücklich warden. Un sei finnt nå johrelange Forschung rut, dat 'n Minsch glücklich is, wenn hei nauch Geld hett, mit 'n eigen Motorwågen in'n Urlaub fohren kann un wenn hei mit 'n Partner gaut taurecht kümmt un dat 'n Minsch, dei kein Arbeit hett un denn dei Kontrull œwer sien Läben verlustig geiht, nich glücklich is.

Forschungsobjekt!

Up 'n Tagung in Rostock stellt s' vör, dat bi ehr Forschungen rutkeem, dat Krääwtpatschenten nich väl unglücklicher sünd as gesunne Minschen. Un ünner ehr Verståhn von Glück finnt sei, dat Sassen un Thüringer unglücklich wählt hemm' — un schrifft 'n Artikel: "Dei Ostdüütschen in Sassen un Thüringen strieden leiwers dei Wohrheit af as dat s' sülben mit anpacken" un stellt fast, dat nå dei Wåhlen in Sassen un Thüringen 'n Deil vonne Ost-Wählers unbelihr- un unberäkenbor is; denn süss künnt nich angåhn, dat 'n Drüddel stramm rechts buten orrer das BSW mit 'n SED-Nostalgieprogramm wählt, sik för Putinfrünn' hollen un wat gägen Migranten hemm' un dei würklichen Taustänn' nich wohr hemm' willen. Un dei klauke Glücksforschersch fråcht: "Woans willen dei Minschen in Sassen un Thüringen åhn Migranten ,prosperiern' (komodig läben), wenn's dei Wohrheit nich inne Ogen kieken willen?" Un sei antert, dat dat åhn Tauwannerung nich mœglich is, denn dei mickrig Geburtentåhl vonne Biodüütschen lött dei Wirtschaft in Ostdüütschland barchdål gåhn un dei Rentensäkerheit schwinnen.

Hett hei dei Forschungsberichten läsen orr is hei sülven ok Forschungsobjekt?

Staats i-Punkt is dei Marienkäver dei Punktsieg in Såken Glück!

Wat klauk is doch disse Perfessersch! Dat erinnert son'n ollen Ostdüütschen an sien Studententiet un dei Vörläsungen un Semnoren tau dei Geschicht vonne Arbeiterbewegung, den Historischen un Dialektischen Materialismus un as i-Punkt den Weitenschåplichen Kommunismus, wo ok Perfessoren versöchten, den Sieg vonne sozialistisch Gesellschaft dörch dei bestännige Fründschaft tau dei Sowjetunion theoretisch tau begrünnen. Un dor œwerkümmt mi dat — un ik denk, dat disse Ort von West-Gelihrten sik hütigendachs as Politologen, Soziologen un ünner Ümstänn ok as Psychologen un sogor mit Hülp vonne digitalen Medien äbenso in't anner System inbringen un nu Putin för den bösen "Autokraten" un Selenskyj för den Demokraten un Redder vonne liberale Demokratie in Europa hollen. Un Börger, dei nich mit dei "Westbinnung" inverståhn sünd un nich mit in't EU- un Nato-Huurn blåsen, gellen as Putinfrünn, as Populisten mit rechter Gesinnung un warden as Fiende vonne liberale Demokratie afstempelt. So as dei Treuhand dorför sorcht, dat dei einstig DDR ünner "Niege Bundslänner" dei Kolonie vör dei Husdör wür, so hemm' doch väle Minschen in'n Osten dat Gefäuhl, dat s' von klauke un œwerklauke Helpers ut'e ollen Bundslänner œwer'n Läpel balbiert würn. Un disse Kränkungen sitten deip, ok wenn väle Gekränkte all œwer dörtig Johr jeden Dach Bananen köpen un ok dorhen fleigen kœnen, wo dei Bananen wassen.

So undankbor, düsse Ossis! Hemm Bananen un
sünd liekers noch nich glücklich! Pfui!

Glück warden sei, warden wi wirklich bruken in Brannenborg. Man Klaukschieter as dei Glücksforschersch Hilke Brockmann un Gliekgesinnte warden wull nich blot œwer't Blåge Wunner œwer dei Elw in Dresden wunnern, sonnern ok blåge Wunner inne Poletik beläben.