Dei vierte Schaustein op dei Titanic wier vun Anfang an ein Attrappe! Hei hett nienich smöökt! Sünd ja ok bloots drei Partein in dei Ampel wäsen, nich vier!

Dei Titanic Rod-Gräun-Gäl sinkt

vun Behrend Böckmann

In Fritz Reuter sien Reisegesellschaft, dei sik von Rostock ut up'n Wech nå Konstantinopel måkt, befinnen sik Lüd, von wecker secht ward: "Nu is ok hier dat Ei intwei!", wat soväl bedüden deit, as dat dat dei, dei nich ümmer gaut miteinanner utkeemen, inne Taukunft noch leger gåhn künn. Dat is wull nu ok dei Fall mit uns feministisch rod-gräun-gäle Taukunftskoalitschen, dei — as jedein Regeern bi Amtsantritt deit — verspråken hett, Schåden von Düütschland aftauwennen. Man künn ok seggen, wenn Barken un Kastannen Bläder kriegen, denn lüchten's tauierst in'n hellet Gräun, dat ward denn nå un nå ümmer düsterer — un irgendwenn höllt sik dat Düstergräun nich mihr, ward brun un schwatt un föllt bi Wind un Küll ganz deip nå ünnen up dei Ierd. Un dei Düütschen wiern vull Tauversicht, doch denn keem dei Œwerklauken Bläderfall. Un dissen politischen Bläderfall schullen wi inne Ogen von uns klauken Poletikers den bösen Putin mit sien "militärisch Operation" gägen un inne Ukrain un den Chinesen mit sien billigen E-Autos. Dorbi wier dat villicht einfach bloots dei Harst! Typisch för disse Theorie: Dei gälen Bläder sünd tauierst fullen, wieldess dei gräunen un dei roden sik noch wat länger hollen kunnen.

Hier wiern rode, gräune un gäle Bläder noch vereint!

Un nu marken dei Œwerklauken, dat's sik ganz dull verbiestert hemm' un dat dat so nich wiedergåhn kann: Dei Energiewenn' schmitt dei Wirtschaft taurüch, dei Inflatschon stellt sik den Upschwung in Wech, dei populistischen Kanten bringen dei demokratisch Midd inne Predulch... Man hett sik duerhaftig inne Plünnen un denn platzt dei verbiesterten Poletikers dei Krågen... Man höllt dat nich mihr ut, dei Kanzler hett dei Vertrugensfråch in'n Bundsdach stellt. Niewåhlen sünd nödig...

Upps, dei Gäle is hier al wech! Dei Gräune will wiedergahn, dei Rode oewer secht Stopp!

"Tscha, måk wat! Smittst di in Kampfmontur, denn hollt se di dat as unecht un affektiert vör..."

Dei Kanzler gifft sik in Demut ergäben — un drömt dorvon, wedder Finanzminister ünner Merz tau warden, wenn em dat so as einst den Genossen Martin Schulz gåhn süll. Lindner as Gäler glöwt, dat hei mit sienen Nåmen bi dei Niewåhlen mihr as fief
Purzent för dei Gälen ruthålt un denn dei Rull as Finanzminister spälen künn, dei einst Genscher as Minister för Butenangelägenheiten spält hett. Un Habeck sett sik an'n Kœkendisch un will so den Wähler verkloren, ik bün bi juch un för juch, wenn ik Kanzler ward, denn ward Düütschland vegan un gräun un gräune Kanonen un gräune Panzer warden för dei gräune Frieheit un Demokratie ballern... Un Habeck sitt in'n Shirt an Kœkendisch, wat son'n bäten an dat "Autfitt" von Fründ Wolodymyr in Kiew erinnert, wenn dei Åbend för Åbend sien Volk verklort, woans hei dei Ukrain redden will.

"... un smittst di fein in Schale, denn schamfeert se di as Elitisten un Œwerklauken. As Gräuner kannst dat nümsnich rechtmåken!"

För all disse Poletikers, dei sik hochmäudig, hochnäsig, inbillt un åpig gäben un vör nix Manschetten hemm' un sik mit ehr Daun dick daun, gellt wull dat Bibelwurt ut'e Sprüch Salomos' (Kap. 16, Vers 18): "Stolz führt zum Sturz, und Hochmut kommt vor dem Fall!"

Wecker tau hoch sticht, dei kann ok deip fallen, em orrer ehr dat so gåhn as dei "Titanic", dei för "unsinkbor" hollen wür, denn mit'n Iesbarch tausåmenstött, inne Nacht von'n 14. taun 15. Prilmånd 1912 binnen twei Stunnen un vierdig Minuten ünnergeiht un nu ümmer noch 3800 m deip up'n Grund von'n Nuurdatlantik licht.