Ok düsse Dach hett al en inglischen Naam: Nine-eleven

Dei Dach för dei düütsche Språk
...an'n 11. September

vun Behrend Böckmann

Dei Kring "Düütsche Språk e.V." hett 2001 den "Dach för dei düütsche Språk" inföhrt un fastlecht, ümmer an'n tweiten Sünnabend in'n September up besonnere Oort un Wies uns düütsche un plattdüütsche Språk tau ihren. An dissen Dach sallen sik uns Börgers dörch Akschonen up uns schöne un gaude språken un schräben Språk besinnen, sei as Deil von uns Kultur estemieren un son'n lütt bäten in sik gåhn, wenn's gedankenlos dei välen inglischen un dinglischen Wüür in'n Mund nähmen. Wi mailen, wenn wi einen 'n Nåricht taukåmen låten, wi chatten, scannen, scrollen un versäuken gor nich ierst, dorför ok düütsche Wüür tau finnen. Gåhn wi up Reisen, denn gifft dat 'n Service Point för Utkunft un Billjetts (nee: Tickets), un strieken dei Lokführer orrer dei Piloten, denn ward dei Fohrt mit Tooch orrer Fleiger nich mihr afsecht, sonnern dei Tooch orrer Fleiger ward gecancelt (canceled).

Ünnertüüchs kann ok bi Businesslüüd ganz ünnerscheedlich utsehn. Düsse totaal unkomodig un unhygienisch utsehnde Ünnerbüx is t.B. en "String"

Disse Fall kümmt so männigeinen Businessman orrer ok Businessfru nich gelägen. Den Businessman erkennt man al an sien Outfit, sienen Dresscode. Dat is 'n gaut passender Antooch mit gaut sittend extraglattet Businesshemd twüschen 50,00 und 150,00 Euros un gaut putzt un tauig Businessschnerenschauh ut Ledder twüschen 100,00 und 300,00 Euros. Pants orrer Boxershorts as Ünnerbüchsen sünd nicht Deil von't Outfit.

För Businesswomen gifft dat ähnliche Outfitvörschriften. Dei Arbeider hengägen lecht sik 'n Workdress tau, Såken, dei dat as Kledåschen för'n Beruf in'n Hannel gifft. Son'n Businessminsch hett hüt ümmer 'n Tablet mit Touchscreen dorbi, üm tau chatten, scrollen, mailen, scannen....Un wenn't denn twüschen dei Fru un den Mann taun "date", 'n Dräpen kümmt, denn hemm's ünner Ümstänn' ok "safer" Sex, also Sex mit Gummi in'n Timmer, dat vördem mit Clever Clean Wash & Dry, dat is 'n niemodschet Wischemmel mit twei Kåmern, Feudel un den dortauhürigen Schrubber, ornlich putzt wüür.

Hei vertellt ehr tauierst, dat hei näbenbi 'n "Gamer", 'n Späler is, un sei outet sik (gifft sik tau erkennen) in Spaß as 'n "Scammerin" (Heuradsschwindlerin), un denn vertellt hei iernsthaftig, dat hei bi't Ünnernähmen "Food ist unser Business" (Äten is uns Geschäft) anstellt is. Ja, so'n Undöög vun Werbesprook gifft dat wirklich. Un œwer sien Anstellung kåmen's nu up dei välen "Foods" tau schnacken: Superfood as dat sünd taun Bispill Chiaküürns, Wholefood as Vullwiertkost, Fastfood as Fardigäten, Streetfood as Äten von'n Happenbaud up'e Stråt, Greenfood as veganet Äten, Every Foods as veganet Äten ut't Deipkäuhlschapp, œwer Foodsharing dörch dei Läbensmiddelredder*innen, Nonfoodartikel, den Foodstore as 'n Låden för Delikatessen un dat Ünnernähmen Refood, dat nich utgäben Äten ut Wirtschaften un anner aflopen Ätenworen in Bioenergie ümwannelt. Up eins möt hei scrollen un kriecht mit, dat sien Reis "gecanceled", also afsecht orrer sträken wüür un hei nu noch bäten Tiet hett. Un nu schnacken's œwer "Mobbing" inne Schaul — einst hett dat Foppen orrer taun Narrn hollen heiten — un œwer "Bashing", jemanden inne Öffentlichkeit åhn Grund tau beschimpen orrer rünnertaumåken.

Un ihrer as dat ehr Date tau Enn' is, hemm's noch Schlåpantööch an'n Wickel: den "Shorty" (Schlåpantooch mit 'n korte Büchs) un denn oltbekannten "Homewear", den Schlåpantooch för kolle Dåch.

Aver villicht fallt jüm denn doch noch wat anners in, un sei trecken sik dei Schlåpantööch ut... hüüt sechst dortau: Sei strippt.

Woto Schlåpantööch? Un woto Inglisch? Dat gifft doch Platt!