Dei Südseereis

vun Behrend Böckmann

Nu harr sik dei Baerbocksche as feministisch gräune Ministersch för Butenangelägenheiten väl vörnåhmen un wull sik in'n Austmånd 'ne Wäk inne Südsee uphollen, üm taun einen noch bäten Frugensfautball tau beläben, un taun annern wull's dei Regierungen von Australien, Niegen Seeland un Fidschi bewägen, sik wiederhen gägen Moskau uptauböhmen un noch mihr för dei Ukrain tau daun.

Mit 'n Flieger vonne Bereitschap un föftig Mann Angturåsch geiht dat inne Luft, måkt 'n Twüschenlannung in Abu Dhabi, üm Sprit för den Wiederflauch tau tanken – un denn... denn gåhn dei Lanneklappen nich tau, dei Fleiger dreiht 'n Runn œwer't Wüstenemirat, lött 80 t Kerosin einfach so af un kann denn wedder lannen.

Dei tweite Anloop verlöppt nich anners, noch eins 80 t Kerosin einfach so verschüdden un wedder lannen. Nu is dei Reis ut. Nicks mit Frugensfautball, nicks mit diplomatisch Ünnerhollungen, nicks mit dei Rückgåf von Kulturgäuder ut'e Kolonialtiet anne Urbevölkerung, nicks mit dei Botschaftsfieer inne Hauptstadt Suva up Viti Levu (dei gröttst von mihr as 300 Inseln, dei den Staat Fidschi billen), wo inne düütsche Residenz (den Sitz von'n Diplomaten) dei utbillt Diplomat Dr. Andreas Prothmann (Johrgang 1960, mit Erfohrungen twüschen Moskau, London un New York un tauletzt düütscher Botschafter in Duschanbe/Tadschikistan) mit dei böbelsten Fidschianer un dat ganze fidschiaansche Kabinett ümsüss up Annalena täuwt hett.

Dat Inselriek hett sik 1970 von't inglisch Mudderland löst, beläwt einen Putsch un noch 'n Putsch un gifft sik nu demokratisch, wull ok, dor dei Klimawannel för dei Inseln taun Gefohr ward un man as Dreihkrüz twüschen China un dei westlichen Länner 'n Wurt miträden kann. Dei Baerbocksche secht: „Im Indo-Pazifik haben wir nicht nur enge Freunde und Partner. Die Region wird die Weltordnung des 21. Jahrhunderts prägen.“ Also möt 'n dei Regierungen, dei uns westlich Frieheit un Demokratie för gaut befinnen, bäten Honnig üm't Mul schmeern, dormit's sik nich so benähmen as dei Putschisten in'n Niger in Westafrika.

Inne Südsee is wull gaut Faut fåten, denn ok all dei düütsche Kaiser hett tau sien Tiet disse Gägend för bedüdend hollen un Samoa so gaut kolonisiert, dat sik öllere Minschen noch dorup besinnen, dat up Samoa „unser Düütsch“ schnackt wür. Ja, Fidschi licht nich wieder af von't einstig Düütsch-Samoa as Flensborg von Berchtesgaden. — Dunnemåls wull dei Kaiser up Samoa Faut fåten, üm mit sien Kriegsschäpen dichter an'n Japaner rantaukåmen, un dat hütig Düütschland will wull 'n Insel inne Südsee finnen, üm den Chinesen up'e Pell tau rücken. Un dortau richt 'n in dissen Südsee-Inselstaat mit knapp 'n Milljon Inwåhners 'n eigenstännig Botschaft in un bestellt 'n Botschafter, dei sik bestimmt nich blot üm düütsche Touristen kümmern sall, dei up Fidschi dükern willen.