schrievenSack un Asche?

Breef vun Heinz Rehn an den Vörsitter vun de SPD-Landdagsfraksjon in Sleswig-Holsteen


"Nicht in Sack und Asche gehen", so de Överschrift vun en Artikel, de an 1. Juli in de Kieler Nahrichten stohn hett. Parteikonferenz der Sozialdemokraten analysierte die Schlappe bei der Kommunalwahl, so de Ünnertitel. As ik dat leest harr, heff ik mi bannig argert un een Breef an den Landeschef vun de SPD schickt. Versteiht sik, in Hochdüütsch, denn he is je een Quitscher un versteiht keen Platt. Man hier heff ik mi dat Vergnögen maakt un de Saak mal in Platt översett.

tipp los!

Herrn Ralf Stegner
Vorsitzender der SPD Landtagsfraktion
Landeshaus
Kiel
Holtenau, den 02. 07.08

Sehr g...

Entschülligen Se bitte, aver ik mag nich lögen, dorum schriev ik keen Anreed, as man dat för geweuhnlich deit.

Ik heff de Wahlanalyse "Nicht in Sack und Asche gehen" in de Kieler Nahrichten leest un faststellt, dat bi de Versammeln blots um den hitten Brie rumschnackt worrn is. Keen Wort vun dat, wat möglicherwies vele Wähler vun de Urne afhool'n hett. Dorum, mit Verlööv, much ik Se, Herr Stegner, un all de Lüüd, de op de Regeerungsbank in unsen Landdag sitten doot, nu vertell'n, worum ik keeneen vun jüm wählt heff un in Tokunft wohl ok nich wähl'n warr.

As na dat schietige Theater, dat jüm uns na de letzte Landdagswoohl vörspeelt hebbt, de grote Koalitsjon dat Leiht in de Hand nähm, heff ik hofft, dat se nu, as Boss in den Landdag, en Deel vun de velen Probleme lösen ward, de sik dor in dat Landeshuus ansammelt hebbt.

Dat to gläuben weer dumm vun mi. Dat eerste, wat de niede Regierung dä, weer, erstmol an sik sülbst to denken. Nadem se al vele Johr Gehälter kasseert, de na uns Reken köönt seVerfaten een Rechtsbruch weern, hebbt se, nehrig as man eenmol, sik toerst mehr as twee Miljon in de eegen Taschen schüffelt. Un dormit hebbt sik de Politiker in den Landtdag een Ansehn toleggt, dat irgendwo mang 'Raubrittertum und Salonganoven' to Huus ween kunn.

Na ja, so sünd de Lüüd nu mol, de uns regeert, hefft ik dacht un hofft, dat se dorna an de Arbeit gung'n, de op se luer. Dat to gläuben weer wedder dumm vun mi. Wat keem, weer tomeets Parteistriederee, dat ik männichmol dach heff, dor snackt Lüüd, de süm Fief nich mehr op den Dutten hebbt.

Dorna worr'n vele Gesetze in Berlin un in den Landdag ännert. "Reformen" hebbt se dorto seggt. Un bekiek ik mi still al de Reformen, so seh ik een Bild. Ik seh de Lobbyisten bi de Arbeit, de Gesetze tohoop klütert, de alleen dorop anleggt sünd, dat de Leibeigenschaft in unsen Rechtsstaat wedder een gesetzliche Grundlaag kriggt. Höört sik een beten överdreben an, liekers hebbt jüst disse Reformen holpen, dat de Armen in de letzten Johrn armer und de Rieken rieker worrn sünd. Dat vele Kinner nich mehr satt to eten hebbbt un de Bosse vun de groten Ünnernehm'n sik ungeniert de Taschen vullproppen un den Rechtsstaat lächerlich maken köönt.

Ik weet, op dat Bild, dat ik dor sehn un utmoolt heff, fallt dat Licht blots vun een Siet.
Aver ik kann nix bi doon, so wiest sik mi dat Bild.

schrievenMien Leevdag heff ik swoor arbeit un heff vele Johr'n de SPD wählt, wat ik gläuvt heff, dat se wat för den lütten Mann doon wüllt. Vundaag aver warr ik männichmol slecht toweeg, wenn ik en Politiker seh, de den Sweet al op de Stirn steiht, wenn he ok blots vun wieden en Mikrofon süht, wat he sik sülbst geern snacken höört un gläuvt, dat dat, wat he seggt, richtig un wichtig is.

Dat Se, Herr Stegner, keen Freud an dissen Breef hebb'n, verstoh ik. Aver dat is nu mol dat Bild, dat de Arbeit vun de grote Koalitsjon op Straten un Märkte spegelt. Een Bild, dat vele Wähler, de den Reem in Tokunft recht wat enger snall'n mööt un togliek de Dickwänste lachen süht, noch lang sehn ward.

Ik grööt

Heinz Rehn


StempelAn 18.Juli 08 heff ik een Antwort kregen. Een Breef, den Ralf Stegner nich sülbst schreben, sonnern blots ünnerschreben hett.

In dit Schrieben lees ik: Dat de Afgeordneten in den Kieler Landdag süm Geld för de olen Daag nee regelt hebbt un nu sülbst dat Geld dorför torügg legg'n mööt. Worum dat aber den Mann op de Straat, de de Stüern betohlt, mehr as twee Miljon kosten deit, schrifft he nich.

Dorto, schrifft Stegner, hebbt de Sozialen in den Landdag düchtig arbeit un ok wat op de Been stellt. So wüllt se dorför sorgen, dat in Tokunft en Platz in Kinnergaarn dree Johr nix kosten schall un dat dat keen Studiengebühr in uns Land geben schall. Un se, de Sozialen, wüllt sik ok dorför insetten, dat dat de Lüüd in't Land wedder beter gohn ward. (Nu, de Will is so old as Partei. Doch de Tied hett uns wiest, dat de Will alleen nich noog weer.)

Un op't Letzt worr he sik freu'n, wenn ik, also ik, de Hein Rehn, em dorbi to Hand gohn wull. (Wenn dat man stimmt, denn wat ik em un de Lüüd in den Landdag al to Fröhstück in't Ohr flüstern much, wüllt de Politiker gor nich höör'n.)

Na, ja, un denn schull ik doran denken, dat de Sozialen vun uns Land dit Johr dorför sorgt, dat 'die in der Tat überzogenen Diätenpläne des Bundestages' nix worrn sünd. Ik weet nich, schall ik doröver lachen oder mi för Woot in dat eegen Achterdeel bieten? Mi dücht, nadem se sik sülbst in Kiel de Taschen vullproppt, klingt dat as: Hoolt se fast, de Spitzboven in Berlin!

afstempelt!Wiß, mien Breef över dat politische Doon, wat se in de letzten Johrn in dat Landshuus beschickt hebbt, ist vun en Standpunkt op de Straat sehn. Un — dor bitt keen Muus den Faden af — jedeeen Standpunkt hett en begrenzten Horizont. Dat de Lüüd in't Landshuus ok wat doot, kann keeneen afstrieden. Wo veel dorvun blots unsinnig Doon is, steiht op een anner Stück Papier. Un keen Snack, jedeen Dag bringt frische Probleme för den Landdag, de lööst warrn wüllt. Aver um dat to doon, hebbt se sik wähln laten, sünd se wählt worr'n un steekt sik dorför een good Stück Geld in de Tasch.

Wokeen den Breef an Stegner op Hochdüütsch lesen will, kann dat hier doon. För den Rest, so denk ik, snackt Stegners Breef för sik sülbst, un is keen Wort mehr wert.

Ik worr mi freun, wenn de een oder annere Leser mi sien Meen to dissen Breef schrifft.

Heinz Rehn


1.10.2008


na baven