Naa, welk Stadt?

Dat Stadtbild

vun Behrend Böckmann

Kanzler Fiete Merz höllt Migranten för'n Gefohr in't Stadtbild, denn väle Börger hemm', so Kanzler Merz, vör Frömde Bang, sik bi Düsternis in Båhnhöff orrer Parkanlagen uptauhollen; un wecker dat nich glöben will, den rådt Merz, dei süll sik mål mit junge Frugens ünnerhollen. Dat nähmen em nu dei jungen Frugens krumm, gåhn up'e Stråt un verlangen sogor, dat hei den Haut nähmen sall. Un Merz windt sik nu as 'n Maddick, dat hei dat so un so meint un gor nix gägen Frömde hett, wenn's sik denn ornlich benähmen un 'n Arbeit någåhn. Œwer dat nähmen em nich all af, denn dat is ja Programm bi em, dei Tauwannerung von Minschen up niege Oort tau reguliern.

Bether wier dat Wurt "Stadtbild" Utdruck för dat, wat dei Minsch von'n Stadt, von bestimmte Buwarken, Stråten, Plätz un Parkanlågen för bewunnernswiert höllt.
Wat wier wull Dresden åhn Zwinger, Semperoper un Frugenskark, Berlin åhn den Fiernseihtorm, dat Bramboger Dur, dei Stråt Ünner dei Linnen un den Pariser Platz, Wupperdal åhn Schwäwbåhn, Güstrow åhn Schlott un Borwinbrunnen, Rostock åhn Rosengorn un Linnenpark, Hamborg åhn Michel, Elphi un dei Reeperbåhn — un Husum åhn den Näwel orrer Dak, den Theodor Storn in den Riemel "Dei Stadt" von 1852 so beschrifft:

An't griese Äuwer, anne düster See
Licht nich wietaf dei Stadt;
Wo Dak deit œwer Däker gåhn
Un Bülgen an dat Äuwer schlåhn,
Dat is uns griese Stadt.

Dat brust kein Bom, dat tremoliert
Kein Vågel tau Maientiet;
'n Wannergaus mit luden Schrie
Dei flücht in'n Haaarstnacht ierst vörbi;
An't Äuwer weiht noch Ried.

Doch hangt mien ganzet Hart an di,
Du grise Stadt an't Meer;
Wat as Kind wür måkt ut mi,
Rauht schmüsternd blot up di, up di,
Du griese Stadt an'n Meer.

'N Stadtbild verännert sik mit dei Tiet. Dei Kolonialworenhöker hemm' nå dei Kaisertiet upgäben, dei lütten Fisch-, Melk un Kees-, Iesenworen-, Gräuntüch-, Zigarrn-, Spältüch-, Bäcker-, Wäsch- un anner Lådens würn inne Marktwirtschaft dörch Ünnernähmenskäden in Diskaunter, Supermärkt un riesengrote Inköpszenter mit bet tau por hunnert Geschäften ünner ein Flach ümwannelt. Dei Knackwuststand von einst höllt sik noch inne Tanke, oft ünnerhollen Tauwannerte niege Happenbauden un beiden Döner, Pizza orrer Chinaäten an, un Fastfoodkäden, dei in väle Länner antaudräpen sünd, måken ok bi uns ehr Geschäft.

Ach, düsse Stadt is dat!

As ik vör väle Johren in Westafrika läwte, hett man mi mål för 'n "foté" — 'n Witten — un mål för 'n "Japonais" — 'n Japaner hollen, œwer nie nich as Deil von't Stadtbild. Dat Stadtbild wür bestimmt von Buwarken un Anlagen ut'e Kolonialtiet un dei Rundhütten in'n traditschonell afrikan'sche Ort. Un as ik mi as "foté" in mien "Tropentenu" (lichter Antoch) nauch Schwatte in "Boubou" (sihr langet Hemd) taun Fründ måkt harr, hemm's mi ok ehr Sähnen verråden: einmål bikrupen mit 'n witte Fru... Un so kåmen weck ut Lust tau uns, dei man afwiesen süll; un weck kåmen ut Not, dei denn ok Upnåhm finnen süllen.

Doch ganz gliek, wat för junge Mannslüd tau uns kåmen — väle sünd dorünner, dei von ehrn Globen un Kultur her 'n annern Ümgang mit Frugens un ok mit Recht un Ordnung gewennt sünd, un wenn denn uns Gesetze sei dat Nixdaun taun Plicht måkt, denn möt 'n sik nich wunnern, wenn's denn dei gaude Håhn sien willen, dei mank dei välen Häuhner up'n Häuhnerhoff selten fett ward orrer ok anners von sik räden måkt. Arbeid wier dei beste Medizin, so is dat taun Bispill in männig JVA mœglich, nich blot 'n Arbeid un 'n Utbillung nåtaugåhn, sonnern mit 'n Besäuk dei Kuschelstuw so as 'n Stunnenhotel tau nutzen. Dei Minsch is äben doch 'n biologisch Wäsen, dat hei dörch sien Sozialverhollen stüert. Wecker vonne Arbeit mäud is, dei kümmt nich so fix up dumme Gedanken.

Bild: WeAct/Campact. Klick up tau'n Vergröttern!

Un näbenbi bemarkt: Dat gifft ok nauch Düütsche, dei sik nich benähmen kœnen, dei nich arbeiden willen orrer bi Klemm un Lange anstellt sünd, dei Drogen- un Kœmbräuder sünd, up'e Stråt orrer as Mietnomaden läben, Börgergeld afsåhnen, mit 'n Knief anner angriepen, Blaumen up'n Kirchhoff mausen un up'n Markt vör Kniepen dat nich mihr uthollen un gägen'n Huswand dat Wåder aflåten... Un wisslich gifft dat miehr Düütsche as Migranten, dei dei Stüer bescheiten daun un sik dei Näs vergüllen. Dor kennt Fiete Merz bestimmt ok welk!

Nich allens up dei Frömden schuwen, dei in dat Stadtbild nix tau säuken hemm'; un 'n Kanzler süll sik an'n Riemen rieten un dat Stadtbild nich taun politisch Losungswurt måken.