vun Behrend Böckmann

Dei Kring „Düütsche Språk e.V.“ hett 2001 den „Dach för dei düütsche Språk“ inföhrt un fastlecht, ümmer an'n tweiten Sünnabend in'n September up besonnere Oort un Wies uns düütsche un plattdüütsche (!) Språk tau ihren. An dissen Dach sallen sik uns Börgers dörch Akschonen up uns schöne un gaude språken un schräben Språk besinnen, sei as Deil von uns Kultur estemieren un son'n lütt bäten in sik gåhn, wenn s' gedankenlos dei välen inglischen un dinglischen Wür in'n Mund nähmen. Wi mailen, wenn wi einen 'n Nåricht taukåmen låten, wi chatten, scannen un scrollen un versäuken gor nich ierst, dorför ok düütsche Wür tau finnen.

Na gaud, düsse Techniken sünd uk nieg un stammen ut dat "amerikånsche Tiedöller". Wi schnacken oewer uk Denglisch, wenn wi al lang düütsche Wür för dei Såk hemm: Gåhn wi up Reisen, denn gifft dat 'n Service Point för Utkunft un Billjetts, wat fröher kort un gaud dei Schalter wier. Un strieken dei Lokführer orrer dei Piloten, denn ward dei Fohrt mit Toch orrer Fleiger nich mihr afsecht orr sträken, sonnern dei Tooch orrer Fleiger ward gecancelt (canceled). Disse Fall  kümmt so männigeinen Businessman orrer ok Businessfru (also dei Geschäftslüe) nich gelägen. Denn Businessman erkennt man all an sien Outfit, sienen Dresscode. Dat is 'n gaut passender Antooch mit gaut sittend extraglattet Businesshemd twüschen 50,00 und 150,00 Euros un gaut putzt un tauig Businessschnerenschauh ut Ledder twüschen 100,00 und 300,00 Euros (Grenz na båven is allerdings åpen). Pants orrer Boxershorts as Ünnerbüchsen sünd nicht Deil von't Outfit. För Businesswomen gifft dat ähnliche Outfitvörschriften. Dei Arbeider hengägen lecht sik 'n Workdress tau, Såken, dei dat as Kledåschen för'n Beruf  in'n Hannel  gifft. Son'n Businessminsch hett hüt ümmer 'n Tablet mit „Touchscreen“ dorbi, üm  tau chatten, scrollen, mailen, scannen....Un wenn't denn twüschen dei Fru un den Mann taun „date“, 'n Dräpen kümmt, denn hemm's ünner Ümstänn' ok „safer“ Sex, also Sex mit Gummi in'n Timmer, dat vördem ornlich putzt wür mit Clever Clean Wash & Dry — dat  is 'n niemodschet Wischemmel mit twei Kåmern, Feudel un den dortauhürigen Schrubber.

Hei vertellt ehr tauierst, dat hei näbenbi 'n Gamer, 'n Späler is; un sei outet sik (gifft sik tau erkennen) in Spaß as 'n Scammerin (Heuradsschwindlerin) — un denn vertellt hei iernsthaftig, dat hei bi't Ünnernähmen „Food ist unser Business“ (Äten is uns Geschäft) anstellt is. Un œwer sien Anstellung kåmen's nu up dei välen „Foods“ tau schnacken: Superfood as dat sünd taun Bispill Chiaküürns, Wholefood as Vullwiertkost, Fastfood as Fardigäten, Streetfood as Äten von'n Happenbaud up'e Stråt, Greenfood as veganet Äten, Every Foods as veganet Äten ut't Deipkäuhlschapp, œwer Foodsharing dörch dei Läbensmiddelredder*innen, Nonfoodartikel, den Foodstore as 'n Låden för Delikatessen un dat Ünnernähmen Refood, dat nich utgäben Äten ut Wirtschaften un anner aflopen Ätenworen in Bioenergie ümwannelt.

Nee, bi dissen Food-Schnack vergeiht mi heel un deel dei Aptiet...

Up eins möt hei scrollen un kriecht mit, dat sien Reis „gecanceled“, also afsecht orrer sträken wür un hei nu noch bäten Tiet hett. Un nu schnacken's œwer „Mobbing“ inne Schaul — einst hett dat Foppen orrer taun Narrn hollen heiten — un œwer „Bashing“,  jemanden inne Öffentlichkeit åhn Grund tau beschimpen orrer rünnertaumåken. Un ihrer as dat ehr Date tau Enn' is, hemm's noch den Schlåpantoch an'n Wickel — nee, nich dei gaude ole Pyjama, mit düt Wuurt sünd wi ja al lang bekannt; hüt is dat dei Shorty (Schlåpantoch mit 'n korte Büchs) un dei oltbekannte Homewear, dei Schlåpantoch för kolle Dåch.

Wi weiten ja all, dat Ingelsch eigentlich nicks anners is as ein plattdüütsche Dialekt, dei sik bäten versülfstännigt hett (so'n Aflegger wüürn sei hüt ein Spin-off nömen). Dormit trööst ik mi oftins, wenn mi dat wedder mal so richtig gägen den Strich geiht. Moeten wi wirklich allen Tüdelkråm von unsen Aflegger wedder re-importieren?! — Größing künn wull bäderet Düütsch schnacken, un bäderet Plattdüütsch uk; un ehr wier dit hütig niemodsch „Kauderwelsch“ bestimmt gägen den Strich gåhn.