Dei SPD un dat Pech mit Manifeste

vun Behrend Böckmann

Dat Manifest, dat dei Denker Marx un Engels 1848 för dei Kommunistisch Bewägung schräben hemm', ennt mit dei Wür: "Dei Proletarier hemm' nix tau verlieren as ehr Käden. Sie hemm' 'n Welt tau winnen, Proletarier ut all Länner, daut juch tausåmen!"

"Hach ja, ein' kricht ok nich jümmer, wat ein' sik wünschen deit!"

Un von disse Infäll stüert, grünnen Kommunisten 1847 in London 'n revolutschonären Geheembund; un an'n 23. Maimånd 1863 grünnt sik in Leipzig dei Allgemeen Düütsche Arbeiderkring, den dei hütig SPD för ehr Geburtsstunn' höllt.
Nå den Versäuk, Kaiser Willem I. ümtauleggen, geef Riekskanzler Otto von Bismarck dei Sozialisten dei Schuld un boxt in'n Rieksdach dei "Sozialistengesetze" dörch — un so wier dat mit dei Sozialdemokratie von 1898-1890 ierst mål vörbi.

Man verhålt sik, weit œwer ümmer nich so ganz genau, wat un wohen man as Midde-links-Partei mit Marx sien Gedankengaut stüern will, un denn kümmt dei Rosenmånd (Juni) 1933 un dei NS-Regierung ünnersecht dei SPD jedwed politisch Akschonen un brandmarkt sei as "staatsfiendlich". (Ja, uns' SPD, dei hüüt in Düütschland as dei staatsdragen Partei överhaupt gellt — un dei jüst wedder sik sülven gägen ehrn Willen un sogor gägen ehr Intress in dei Plicht nahmen hett, mit Merz en Regeern tau billen, bloots dat sei den Staat vör dei AfD reddt. Na good, in den Sinn — gägen Nazis — sünd se wirklich fiendlich.)

Nå'n Maimånd 1945 kümmt Discher Willem Pieck (Kommunist, 1876-1960) för'n Nieanfang ut't Exil in Paris un Moskau inne sowjetisch Besatzungszoon taurüch un deit sik dor mit Baukdrucker un Koopmann Otto Grotewohl (Sozialist, 1894-1964) tausåmen, dei mihrmåls vonne Nazis achter Trallen bröcht wür. Pieck sorcht för'n Nieanfang vonne KPD, Grotewohl för'n Nieanfang vonne SPD — un up Drängen von Stalin, so ward vertellt, beschluten beid, sik tau verbünnen, un grünnen denn an'n 21./22. Prilmånd 1946 dei SED mit dei twei Vörsidder Pieck un Grotewohl anne Spitz. Pieck ward denn mit dei Grünnung vonne DDR dei ierste Präsident un Grotewohl dei ierste Ministerpräsident.

Inne Westsektoren hålt Kurt Schumacher (Sozialdemokrat, 1895-1952) dei SPD inne Sellschap taurüch, will œwer vonne Kommunisten nix weiten, is gägen 'n Tausåmengåhn von Sozis un Kommunisten as inne SBZ, ward denn nå BRD-Grünnung dei Oppositschonsföhrer in'n Bundsdach un höllt Konrad Adenauer (CDU, 1876-1967) nich gråd för sienen besten Fründ. Inne Wenntiet grünnt sik denn an'n 7. Tüffelmånd (Oktober) 'n sozialdemokratisch Partei inne DDR, dei denn an'n 26. Saatmånd (September) 1990 inne SPD upgeiht.

Dei SPD in'n Westen harr sik al lang tau'n Volkspartei mausert, so üm 40 Purzent vonne Wählers gäben Willy Brandt (1969), Helmut Schmidt (1974) un Gerhard Schröder (1998) ehr Stimm' un sei kœnen mit einen Koalitschonspartner regieren. Olaf Scholz bringt 2021 weniger Wählers achter sik, möt mit twei Koalitschonspartner regieren. Denn platzt dei Koalitschon, Niewahlen sünd 2025 nödig — un kiek: dei SPD lannt bi 16,4 Purzent.

Up den Wech nå båben hemm' dei Sozialdemokraten un ehr Koalitschonspartner mit Gennern, Rägenbågen, Sexismus, Feminismus, Wokeness, Willkåmenskultur, Russenhass, Rüstung, Börgergeld un Kinnergrundsäkerung un anner Märken nich dei nödige Läus (Fahrspur) funnen un so dat praktiziert, wat Lenin all 1904 vonn russ'sche Sozialdemokratie säd: "Ein Schritt nå vörn un twei taurüch". Villicht höllt sik Lars Klingbeil för so'n Oort Lenin, hett hei dat doch schafft, SPD-Baas, Vizekanzler un Finanzminister in ein Person tau sien, ok wenn man blot 64,9 Purzent vonne Delegierten up 'n letzten Parteidach för em stimmten, wull ok ut den Grund, dat hei sik so schäwig gägenœwer Saskia Eskens verhollen hett. Un denn: Dei Verspräken, dei hei in'n Koalitschonsverdrach uthannelt hett, warden up eins nich inhollen — dei Minnestlohn kümmt nich as verspråken, mit den Strompries un dat Börgergeld is dat nich anners, för dei Rüstung is Geld dor, för Schaulen un Ollenhüs nich. Un dei Wirtschaft finanziert hei up Pump, denn bet 2027 löppt dei düütsche Schullenbarch up 850 Milljarden an. Un so willen s' wedder 'n Arbeiderpartei warden?

Liekers sünd Klingbeil un Pistorius in dei (Wahl-)Bevölkern teeemlich beleevt, as Ümfrågen wiesen. Ein Grund dorvör is wohrschienlich dei Bang vör dei Russen, dei opstunns dei Minschen in Düütschland wedder taufåt hett. Dei SPD stimmt in den Chor vun Bangmåkern in geiht so wiet, dat s' dat Volk verkloren, wenn wi nich allens för dei Verdeffendierung daun, denn ward dei Russ taun tweiten Mål dei Fåhn up'n Rieksdach in Berlin hissen. Un sei weddern gägen dei AfD un willen s' as gröttst Gefohr för uns Demokratie verbåden weiten — un marken gor nich, dat so'n Verbot sülben dei Gefohr sien kunn!

Un nu schellen sei mit SPD-Kriegsminister Pistorius mihr as 100 Genossen realitätsfrömd, dei dat Stegner-Mützenichsche "Manifest" ünnerschräben hemm'. Dorbi räden Stegner, Mützenich un dei annern Ünnerteiknerschen un Ünnerteikners dei russ'sche "militärisch Operatschon inne Ukrain" nich lütt, sonnern verlangen blot, dat Fräden nich blot dörch Waffen, sonnern ok dörch Diplomatie un Verhanneln mœglich warden künn, dat 'n nich ümmer mihr Geld för dei Rüstung verschwennen un sik dei Statschonierung von niege amerikan'sche Middelstreckenraketen in Düütschland œwerleggen süll. Un ut dei Käden, von wecker Marx un Engels schnacken, ward in't Stegner-Mützenichsche "Manifest" dei Fräden nå Willi Brandt: "Fräden is nich allns, œwer allns is åhn Fräden nix."