Dei Sozis inne Predulch

vun Behrend Böckmann


Dei Sozis wiern sik ja ok nie nich einig, wenn't üm dei Fråch von Krieg un Fräden güng. In Rieksdach tau dei Kaisertiet wier Korl Liebknecht dei einzigste Sozialdemokrat un ok dei einzige Deputierte, dei an'n 2. Julmånd 1914 gägen dei Bewilligung von Kriegskrediten stimmt hett.

An'n 5. Lentmånd (März) 1933 würn 120 SPD-Deputierte in'n Rieksdach wählt, un sei wiern nå dei NSDAP dei tweitstärkst Frakschon. Dei 81 Deputierten vonne KPD wiern tau disse Tiet all dörch dei "Rieksdachbrandverordnung" buten vör un so güng man nu ok gägen SPD-Genossen vör. Man harr weck in "Schutzhaft" nåhmen, anner künnen noch Rietut nähmen un so hemm' blot noch 84 SPD-Maaten an'n 23. Lentmånd gägen dat "Ermächtigungsgesetz" stimmt. In'n Heumånd 1933 (Juli) würn denn all Parteien bet up dei NSDAP verbåden, dei nu dei Partei von't "Dusendjohrig Riek" wür un mit 'n Einheitslist in'n Näwelmånd 1933 pro forma Wåhlen afhöll.

Un ümmer geef dat 'n Fiend, gägen den Düütschland in't Feld trecken mösst: Wier dei Franzmann in'n 1. Weltkrieg dei Böse, so wier dat in'n 2. Weltkrieg dei Iwan. Hett Düütschland twüschen 1870 un 1945 in gaut 75 Johr drei Kriege von'n Tun bråken, so künn nå 80 Johr Fräden dat Füer wedder upflammen, denn Düütschland ward ja nu mit all sien abendlännisch liberalen Brauderdemokratien von Wladimir Putin, Xi Jinping, Kim Jong Un orrer Recep Tayyip Erdogan as ok den Populisten Donald Trump un noch anner so traktiert, dat 'n sik dorup instellen möt, mit 'n gaut utrüst Bundswehr Gefohren aftauwennen. Dorför wür nu dei "Tiedenwenn" utraupen un ok hennåhmen, dat, wenn mit Diplomatie nix mihr tau måken is, sik dorup instellen möt, sik so verdeffendieren tau kœnen, dat 'n nich sülben taun drüdden Mål 'n Jackvull kricht.

Œwer dei Sozis kåmen in ehr politischen Ansichten nich ümmer œwerein, denn dat gifft 'n linken Flœgel, den nå rechts schulenden Seeheimer Kreis un noch 'n Nettwark, dat wat gägen dei Flœgel hett. Un jeder Flœgel hett so sien eigen Vörstellungen, woans hüt dat Verspräken von 1945 tau düden is, dat nie nich wedder 'n Düütscher 'n Flint inne Hand nähmen un dat nie nich von düütschen Boden 'n Krieg utgåhn sall.

Un so is 'n sik ok nich einig, ob man den Ukrainekrieg blot mit Waffen orrer ok mit Hülp von Diplomatie tau Enn bringen kann. Dei Kanzler, ok wenn hei sik nich mit son'n roden Schål as einst dei Berliner Burmeister Momper seihn lött, so will hei doch as Frädenskanzler gellen un schenkt sienen prachernden Duzbrauder Wolodymyr partu keine Taurusraketen. Parteimaat Michael Roth as Vörsidder von'n Utschuss för Butenangelägenheiten in'n Bundsdach süht dat anners as dei Kanzler orrer dei linke Sozialdemokrat Ralf Stegner ut Sleswig-Holstein. Nich all inne SPD wiern mit Roth sien Ansichten taun Krieg inne Ukrain inverståhn un hemm' em dat ok fäuhlen låten. Nu is hei vergnatzt, gifft up un will nu bäten mihr Tiet för sik un sienen Mann hemm'.

Un dei rode Noch-Kanzler — sien Parteidach hett em ja hüüt dat Vertruun utspråken. Œwer ward hei as bedachtsåmer Frädenskanzler all sien Parteimaaten up sienen Kurs instimmen un ok dei Wählers verkloren kœnen, dat hei dei richtige Kanzler-Kannedat för Düütschland is, wenn uns Land nich taun drüdden Mål düchtig Feddern låten möt? So künn hei ok Elon Musk wiesmåken, dat hei nich dei "Narr" is, för den Musk em höllt.


Wenn Olaf Scholz man blots dei Ogenklapp anbehollen harr!
Dormit wier hei so beleevt, hei wöör glatt wedder Kanzler!


12.1.2025


na baven