Anonyme Adonis

vun Behrend Böckmann

Kierls, dei von't Kino her sihr bekannt sünd un dortau noch wunnerbor utseihn un in dei man sik so Knall up Fall wägen dat "gröttste Sexappeal" verleiwen künn, dei kriegen von'n amerikan'sch Tiedung "People Magazine" dei Utteiknung "Sexiest Man Alive", sotauseggen wunnerschöne Mannslüd orrer ok smucke scharpe Kierls: Brad Pitt, Tom Cruise, George Clooney, Johnny Depp...

Un dor in uns mallig Welt binåh jedwed Utteiknung in gauden Sinn ok as Gägendeil vergäben ward, kürt dei "Emma"-Tiedung, dei dörch dei Feministin Alice Schwarzer sihr bekannt is, Mannslüd mit dei Utteiknung "Sexist Man Alive" (Sexist hier åhn "e" schräben), dei in ehr Ogen wull wat gägen Feminismus hemm': Rapper Kollegah, FDP-Redder Chrischan Lindner, Papst Franziskus, Olt-Punk Sascha Lobo, Spaßvågel Jan Böhmermann...

Tau Alice Schwarzer, dei tausåmen mit Sahra Wagenknecht dei Demonstratschon "Upstand för den Fräden" vör't Bramborger Dur tau Berlin in'n Hornung (Februar) 2023 afhöll, sünd Dusende kåmen un wiern sik mit Blick up dat Älend in'n russ'sch-ukrain'schen Krieg mit disse beiden Frugens einig: Verhanneln un Œwereinkåmen up beide Sieden is nödiger as ümmer mihr Waffen tau liewern.

Wat för'n coole Typ!

Doch dat kümmt bi all dei nich gaut an, dei Selenskyj för den Redder von uns åbendlännisch liberale Demokratie hollen, allen vöran sett sik Agnes Strack-Zimmermann vonne Gälen un Vörsiddersch von'n "Utschuss för Verdeffendierung" (Verteidigungsausschuss) för dei von Pistorius utposaunte düütsche Kriegsdüchtigkeit in un tut't mit Panzertoni Hofreiter vonne Gräunen un denn schwatten Kiesewäder nå ümmer mihr Waffen in't glieke Hurn. Un wenn man denn Kanzler nich so wiet bringen kann, dat hei Taurus-Raketen anne Ukrain afgifft, denn möt 'n dat in Europa versäuken, lött sik in 't Europarlement in Straßborg wählen, ward dor gliek wedder Vörsiddersch von'n Utschuss för "Säkerheit un Verdeffendierung", kann nu œwer Europa dat anschuben, wat's in'n Bundsdach so nich so henkreech.

Marie-Agnes Strack-Zimmermann (Johrgang 1958) kümmt ut gaude Verhältnisse, studiert, promoviert, bringt för'n Verlag Jugendbäuker an'n Mann, friecht 'n Verlagsminschen, hett mit em drei Kinner, is Größing von 3 Enkelkinner. Sei sall streng kathool'sch sien un sik sülben up't Motorrad setten.

1990 stiggt's inne Poletik in, ward in't glieke Johr FDP-Maat, ward 2008 Burmeistersch von Düsseldörp, is hier ok af 2014 Vörseddersch vonne Gälen
un kümmt 2017 œwer 'n Direktmandat in Bundsdach un nimmt dor kein Blatt vör'n Mund. Un sei deilt düchtig ut: taun Bispill stellt's Scholz as einen hen, dei ümmer so as 'n Autist Recht hemm' will, un mokiert sik œwer Merz, dei männig Frömden 'n "Sozialtouristen" näumt, un wischt so den einen un annern düchtig einen ut. Sei putzt sik ok nich so an as taun Bispill Kulturstaatsministersch Claudia Roth orrer lecht sik 'n Horpracht as Gesine Schwan vonne SPD tau, dei tweimål versöcht hett, Bundspräsidentin tau warden. Ne, sei is 'n Fru, dei sik so as 'n Mann verhöllt, 'n Wäsen, dat sik nich emanzipiern möt. Sei hett Büxen an un hett wull wat gägen Kledåschen, as sei ehr kathool'schen Schwestern an'n Lief hemm'.

Sexist Man, wirklich!

Dat allens hett nu Alice Schwarzer up't Kuurn nåhmen. So as Tom Cruise den Piloten Maverick in den amerikan'schen Akschonsfilm "Top Gun: Maverick" spält, so höllt Alice Schwarzer dei Poletikersch Agnes Strack-Zimmermann för 'n Maverick ut Düsseldörp, dei as ierste Fru inne Geschicht von dei Negativutteiknung "Sexiest Man Alive" disse Utteiknung vonne "Emma" tauspråken wür. In ehr Begrünnen gifft Alice Schwarzer von sik: "Disse Fru", sei meint Agnes Strack-Zimmermann in Büxen un ehrn Helmhorschnitt, "wiest uns, dat's nich den Vörnåmen wesseln, kein Hormone schlucken un sik dat Melkgeschirr nich afoperiern möt, um 'n würklichen Kierl tau sien. Un wat för einer!"

Dei Eurofighter stiggt up — mit väl Dampf!

Un wenn dat mit den Krieg inne Ukrain un ehr ewig Waffengerassel nich so trurig wier, künn man Strack-Zimmermann för 'n "feministisch Paradebispill" hollen. Œwer sei is as Mudder un Größing un as Maat in't "Parlamentum Europaeum" för mihr Waffen gägen den bösen Russen un verkünnt dat ok ludhals dor, wo ümmer sei dat kann. Strack-Zimmernmann, nich up't Mul follen, verkünnt in't Nett, dat's disse Utteiknung mit Dank annähmen un sülben bi Emma afhålen ward. Un sei deilt gliek wedder ut un höllt Emma vör, dat's doch 'n Tiedung von gistern is. Is Emma œwer nich, denn man glöwt, dat sik Strack-Zimmermann den von Tom Cruise spälten Kampfpiloten 'n Ogenspeigel nåhmen hett, dei dat mit Dod un Deuwel up russ'sche MiGs afseihn hett. So hett's nu ok den Ökelnåmen "StrackZi" orrer ok "Flak-Zimmermann" krägen. Un as Vörsiddersch von Utschuss för "Säkerheit un Verdeffendierung" stiggt's in'n Eurofighter un måkt 'n Runn in'n Häben, dei den Stüertåhler 80.000 Euros kosten deit. För'n Wåhlkampf wier sei sik nich tau schad, in 'n T-Schört mit den Updruck "Taurus für die Ukraine — zusammen bis zum Sieg" antaugäben. Un "… bis zum Sieg" klingt ja nu wirklich op ungode Wies na ehrgüstern. Väl miehr, as dei "Emma" vun güstern is.

Zack-Strimmermann is as Oma Courage Maat in'n "Födderkring Düütsches Heer" un inne "Düütsche Gesellschaft för Wehrtechnik", un sei ünnerhöllt Verbinnungen tau Rheinmetall un Thyssen-Krupp... Sogor dei eigen Lüd ökeln, dat's mit dei Stormknarr G36 tau verglieken is, denn dei ballert ganz dull un schütt denn wägen tau väl Hitt dornäben.

'n Beråder von Ex-Kanzler Scholz, so ward vertellt, hett mål von sik gäben: "Boah, dei Ollsch nervt!" Œwer dei Ollsch will nich ihrer Rauh gäben, bet Putin sien Truppen dei Ukrain verlåten un hei sülben in Den Haag vör'n Kadi steiht. Nå, denn man tau!