Dat niege Schaulcurriculum

vun Behrend Böckmann

Ein Schaulmeister, dei gor nich dumm,
Drömt von dat nie Curriculum,
Un man künn åhn Œwerleggen
Glattwech "Lihrplan" dortau seggen.
So as dat wier all bi dei Ollen,
Ward Läsen, Schrieben bibehollen,
Denn Läsen wat 'n Amt so schrifft
Un woans man Antwurt gifft,
Dat ward den Minschen männig Dåch
Noch mihr as blot 'n grote Plåch.

Bi Utdruck kümmt't up Wür blot an,
Mit dei man üm sik schmieten kann.
Dorbi mœt man gor nich weiten,
Wat denn "dezidiert" deit heiten,
Wat sukzessiv wür eruiert,
För weck' Opschon dei Minsch votiert.
In Utdruck kümmt dat blot up an,
Dat man väl Teiken düden kann,
Dormit Verstännigung denn geiht,
Wenn man den Finger wiesen deit,
Orrer ein Bewerbung schrifft
Un sik as klauk un plietsch utgifft.
As Tausatz man noch wählen kann,
Woans man lecht sien "Facebook" an,
Un "simsen" steiht bald an'e Stell
Von'n Appelschuss ut "Willem Tell".

Dat Teikendüden geiht ganz licht,
wenn man in Teikenspraken spricht.
Sünnerlich dei Fingerspraak
is kein vigeliensche Saak!

Ok för den niegen Räkenplån
Ward so allerlei denn dån,
Un dor dei Kopp för't Räken schwach
Un kein Minsch mihr räken mach,
Kriecht jederein åhn grot Gewäs'
För denn Brägen sien Prothäs',
Un alle Minschen finnen's fien,
Disse lütte Räkenmaschin'.
Man tippt blot Knöp un kriecht fix rut
Wat måkt an'n Dach dei "Stütze" ut,
Wurväl kann dei Minsch utgäben,
Wenn hei mœt as Hartzer läben,
Un wat son'n Minsch verdeinen kann,
Wenn hei denn wier 'n Supermann.

An Superman gefallt mi nix
as sien rode Ünnerbüx!

In Ethik orrer Lebenskunn'
Måkt nieger Stoff ok siene Runn':
Man lihrnt, dat man sik "auten" deit,
Dormit denn alle Welt ok weit:
Ik bün anners as dei annern,
Bün gägen't Auto, bün för't Wannern.
Man lihrnt, wat man den Richter secht,
Wenn man hett bråken gellend Recht,
Woans man tau sik sülben finnt
Un't Komasupen œwerwinnt,
Wat passiert, wenn man mål kifft,
Un wat dat denn dorgägen gifft.

In Bio sünd Planten tabu
Bet up Hanf un den Anbu,
Ganz geheim in lütt Plantagen,
Gaut verstäkt in oll Garagen.
Un wat schlöcht ierst dat Schäukerhart
Wenn ut'n Kierl 'ne Fru denn ward,
Wenn dei Paul ward Paula heiten,
Un sei kriegen ok tau weiten,
Ob dei in'n Fru ümwannelt Mann
Noch Safersex beläben kann.
Ok dat väle vörkåkt Äten
Ward in Bio nich vergäten.
So sall dei lütte Minsch erfohren,
Dat hei all in jungen Johren
Von Adipositas ward quält,
Wenn den Lief Bewägung fählt.

Superman bedrifft dat nicht,
hei bewägt sik, wenn hei flüggt!

Dörch Physik kriecht man bald rut
Woans man häbelt Finster ut,
In wat denn dat Geheimnis licht,
Wenn man dörch tauig Dören sticht,
Woans man einen so afknallt,
Dat dat gor kein bäten schallt.
Man lihrnt nich väl von dat Atom
Un ok nich väl von niegen Strom,
Doch lihrt man von elektrisch Såken,
Woans man mœt 'n Kortschluss måken.
Denn wenn dei plietsche Muser weit,
Woans dat mit den Kortschluss geiht,
mœt hei sik nich so afplacken,
Wenn hei will 'nen Wågen knacken.

Wullt du'n Batterie kortsluten,
mutt dei Wedderstand na buten!

Solt an schellte Tüffeln gäben
Wier Chemie in Größings Läben.
Hüt is sik männig Minsch nich wiss,
Wat 'n Element wull is:
Is dat Iesen, is dat Wåder
Orrer Blaut in siene Åder?
Dat Flammen brennend Gase sünd,
dat wüsst vör Tieden jedet Kind.
Doch Füer dat is billungsfiern,
Annern Stoff harr man hüt giern,
Lihren sall'n dei Kinner hüt,
Wat man af un an so süht:
Man knallt 'n Buddel an ein Wand
Un gliek steiht dat Hus in Brand!

Füer is op jeden Fall
en grote Spåß för jed' un all!

Dor man Sprit nich drinken sall,
behannelt man up jeden Fall,
Woans in Gärung wat ward bröcht
Dormit sik dat in Kœm ümschlöcht,
Un man dat destillieren deit,
von dat dei Würkung denn utgeiht.
Schäulers ward ok anvertruucht
Woans man Trånengas sik bruucht,
woans man mit por Druppen Brom
sik erfüllt so männig Drom.

Mal so echt Krawall tau måken,
dat brukt Künn in mennig Såken!
För Krawall brukst orrig Plie.
Fule Lüüd beschicken't nie!

Ok dei Ierdkunn' hett sik wannelt,
denn dei Stoff, dei dor behannelt,
Is nich uns Eld' un Mildenitz,
Is nich dat fierne Lüderitz,
nich Dütsch-Samoa 1900,
ne, in Ierdkunn dor ward wunnert
œwer Länner dei dat gifft,
in dei dat Islamisten drifft,
wo sei lihrn denn sotauseggen
woans man mœt denn Bomben leggen.
Sünd wecker ut'e Oort dull schlåhn,
Warden's ok up Reisen gåhn,
Warden sik dorhen begäben,
Wo's ehr Bät'rung sall'n beläben.
Mit 'nen Päting reisen's denn
Tauierst eins nå Alaska hen,
Un ok ganz hinnen in Sibirien
Måken sei Beläwnis-Ferien.
Un wenn dat gor nich helpen deit,
denn't af nå Madagaskar geiht,
beläwt den Knast up't Sägelschipp
as kostenlosen Weltentripp.

Un dorbi lehrst von sülven schon
dei thermohaline Zirkulaschon!

Geschicht fangt bald mit Eva an,
dornah kam'n anner Frugens ran:
dei tweit, dor bün ik mi all wiß
Dei Königin von Saba is.
Ok Nofretete ward nich fählen,
Mit Salome ward man sik quälen,
Lihrn, wat dei Borgia hett dån
Un woans dat Sisi is ergåhn,
Dat in London läwt dei Queen
Un Kanzlersch Angy in Berlin.
Frugens, dei Geschicht hemm' schräben,
Sall'n den Ünnerricht beläben.

Dees Oort Geschicht kann man ok låten
Un sik dorför mit Kunst befåten,
Kann denn Lihrer düchtig brüden,
Wenn man deit denn Biller düden:
Up wecken Infall mœt'n kåmen,
Tau düden in denn witten Råhmen
'N blågen Punkt, doch nich ganz rund,
In'e Eck von'n gälen Grund?
Un sünd twei Strichen as 'n Läus
Nich 'n Bild von Joseph Beuys?
Mœten Schäulers würklich weiten,
Woans dei välen Målers heiten,
Dei eins läwten in Worpswäd',
Von dei noch hüt is oft dei Räd?

Ja, wo heit dei noch?

Die Schäuler sall hüt glücklich läben,
Von Båben ward em nicks vörgäben,
Hei sall doch tau sik sülben finnen
Un dorüm ok allein bestimmen.
Ja, Lust un Freud an jeden dach
Jedet Scgäulerhart giern mach,
Un ik gåh in up jede Wett,
Dat hei ok Lust up Fulheit hett.

Un welkein hett dat nich?