Rookmellers

vun Heinz Tiekötter


Dor ward Soken erfunnen, de bruukt keen Minsch, seggt Opa Fritz. Un du kümmst dor ok nich mit trecht. Sowat geiht di doch gegen den Strich. Un de Gesetzgebers twingt di liekers dorto, dat du dat anschaffst. Ok denn, wenn du dat süllmst för Untüüg hollst. Siet 2011 mutt in elkeen Huus un in elkeen Wohnung Rookmellers installiert sien. Ok in de, as bi Opa, de siet hunnert Johr ohne düssen Speelkroom utkomen sünd.

Oma Lene hett vun dat Gejaul so de Nees vull! Opa mutt nu buten vör de Döör sien Knaster smeuken. Smeukt he sik siene Piep binnen in'n Huus, fangt de Mellers ünner de Deek an to fleiten. Un dat is lang nich allens: De dorigen Dinger ünnerholt sik mit'nanner. De sett sik gegensiedig in Gang. Wenn Oma Lene Brootheringe in de Pann hett un de Meller in de Köök hett tweemol piept, denn sett sik dat foort. As neegst kommt de in de Deel, denn start' de in de gode Stuuv un as lestet sünd se all tohoop ingang. Dat gifft 'n richtiget Konzert. Tweemol stunn all de Füerwehr vör de Döör.

Oma hett nu jümmers bi'n Fischbroden dat Kökenfinster op. Müst di dat mol vörstellen, wenn dat buten Winter is! Steihst in dicken Mantel in de Köök. Anners sackst di dor doch een bi op. Un utstellen kannst de Sirenen ok nich. Dor müsst Opa toeerst de Ledder ut'n Schuppen holen un denn no de Deek hoochklattern, de Deckels afschruben un de Batterien rutnehmen. Verseuk dat mol, wenn di dat Fleiten ringsümher bregenklöterig mookt un keen Enn nümmt.

Un so'n richtige Hölp is Opa nich; He is nich koppfast. Em ward dor boben swinnelig. Dorüm müss Oma Lene hooch un Opa hollt de Ledder fast. Man dormit is dat nu ok vörbi; Oma hett markt: Opa kann mit sien Ogen nich an sik holl'n, wenn he Omas Been so dicht vör sik hett. He fangt an to kneistern. Un sowat is unschicklich. Jemmer Enkel Peter is'n fixen Keerl. He hett seggt, se sullen man öberall de Batterien rutnehmen, blots nich in de Deel. Wenn jichtenswo wat anfangt to sengeln, denn ward dat so un so dorhen trecken un denn markt se dat rechtiedig noog. Siet leste Woch fehlt de Batterie ok op de Deel. Dor hett sik de Rookmeller jeedetmol in Gang sett, wenn Opa vun Hoff rinkeem un hett hier siene Gummistebel uttrocken.


Bild braden Hiering: Susanne Beek/Pixelio
Bild Ledder: hier
24.3.2017


na baven