Schampus för dei Pangschonäre...

vun Behrend Böckmann

Dei olle rod-gäl-gräune Taukunftskoalitschon kreech sik dat Strieden — dei einen wullen dei Schullenbrems inhollen, dei annern wullen s' upweiken, un doran is dei Koalitschon vörtiedig inne Brüch gåhn. Nu hett dei niege schwatt-rode Koalitschon mit den klangvullen Nåmen "Inståhn für Düütschland" ("Verantwortung für Deutschland") all wedder Striet üm't Geld, denn väl Poletikers hemm' up eins Bang, dat dat Geld för dei Renten utgeiht un dei ümmer öller wardend Gesellschaft sik bi dei neechsten Wåhlen von Schwatt-Rod afwennen künn.

...un dei sik dat leisten koent...

Strietpunkt is taun einen dat tau Tiet as 'n Oort Rent uttåhlte Börgergeld för düütsche un ukrainsche Börger, dei ut 'n bestimmten Grund nich arbeiden kœnen orrer gor nich arbeiden willen, un taun annern 'n nödige Rentenreform. Denn wiern dat 1960 noch söss Lohnarbeiters, dei för twei Rentner stüern mössten, so sünd dat in'n Momang blot noch twei Arbeiders. Dat sall sik denn ierst ännern, wenn dei Boomer-Generatschon blot noch Geschicht is. Un dei Staat will nich ümmer mihr Geld för dei stabile Rent tauscheiten. Ok wenn dat Rentenöller af 2012 schriddwies von 65 up 67 Johr fastlecht wür, kriegen gaut 20 Milljonen Rentners 'n normale Öllersrent von 48 Purzent von'n aktuellen Dörchschnittslohn, wenn's denn 45 Johr inne Rentenkass intåhlt hemm'. Un wecker mit weniger as 48 Purzent taurechtkümmt, dei kann ok ihrer mit bäten weniger Rent dat Öller geneiten.

...dei annern koent Leergaud sammeln!

Wecker noch nie nich Dackpannen lecht hett orrer inne Meddachssünn Asphalt up'n Stråt upbringen möst, dei hett klauk räden, dat 'n Minsch, dor hei ümmer öller ward, nich blot 45 Johr, sonnern por Johr länger schuften süll un so sülben dei Rentenkass entlasten däd. Anner meinen, dei Minsch in't Rentenöller künn näben sien Rent noch 2000 Euro "Aktivrent" stüerfrie hentau verdeinen. Striet gifft dat ok dorœwer, ob man den Acht-Stunnen-Dach bibehollen orrer afschaffen süll un ob Düütschland tauväl Fierdåch bi bummelig 250 Johrsarbeidsdåch hett. Wenn knapp 'n Drüddel von all Arbeiders blot för por Stunnen (also Deeltied) 'n Arbeit någeiht, wier ok hier wat tau verännern. Dei andacht' Müdderrent wür dei Rentenkass belasten, dei Abschaffung vonne Witwenrent dei Kass entlasten…

Un in all dissen Striet mischt sik nu Linnemann vonne CDU in un höllt dat wull ok mit Blick up dei neechsten Wåhlen för nödig, dei "Verbeamtung" intaugrenzen orrer ok tau reformiern — denn Beamte kriegen as Staatsdeiner 'n staatlich finanziert Pangschon nå dat letzt Gehalt un kåmen in'n Schnitt up 3.240 Euro (Rentner in'n Schnitt 1565 Euro). Un ok wenn all von't Grundgesetz her gliek sünd, so gifft dat ümmer noch twei Kassen, dei Rentner un dei Pangschonäre.

Dei Gerechtigkeitsfrååg brennt ganz åpen in uns Sellschåp — an väle Stellen sleit dei Flamm hooch, an't hööchsten bi't Wohnen un dei Mieten, bi dei Stüergerechtigkeit un dei soschåle Scheer, dei ümmer wieder opgeiht. Dei Frååg nå dei Rentengerechtigkeit is dei neechst grote Bustell. Un sei warrt dei Generaschonen gegen'anner opbringen — dei Jungen gägen dei Olen —, wenn nich fix wat dån warrt.

Sei hemm kein Lust, dei Renten allein tau betahlen!