vun Behrend Böckmann

As dat Luther (1483-1546) in'n Sinn keem, sik leiwers an den Globen an Christus tau hollen un sik von den Sünnen-Aflasshannel in't Sassenland dör den schlitzuhrigen dominikanschen Kuttendräger Tetzel (1460-1519) aftauwennen, wull hei dei röm'sch-kathool'sche Kark reformieren un wedder tau dat måken, wat Kark sien süll. Un hei pinkert an'n 31. Oktober 1517 95 Thesen anne Döör vonne Schlottkark tau Wittenbarch un deilt dei Welt so sien Programm as Reformator mit. Dei Karkendör wier sotauseggen sien Bundsdach, in weckern Friedrich Merz — nich as Kuttendräger, sonnern as Kanzler — nå mihr as 500 Johr låters verkünnt, mit Reformen dei Bundsrepublik von Grund up tau sanieren, üm dat Häbenriek up Ierden tau erhollen: Gesundheits-, Renten-, Stüer- un Asylreform, den Husholt, dei Wirtschaft un dei Verwaltung will hei reformiern, äbenso den Wehrdeinst. Un dat mierste Reformierte süht nå Flickwark ut, nå 'n Plünnenteppich, dei den lütten Mann mihr tau schaffen måkt, as dat hei wat von "Entlastung" markt.

So beseihn hett Luther wull bäten bäder as Merz reformiert. Luther leet den Papst Papst sien, grünnt mit sien willigen Kollegen dei lutherisch-reformierte Kark un is dorför, dat sik dei ierdischen Freuden hier ünnen un nich ierst nå 'n Dod in'n Häben afspälen. Hei sülben will nich mihr as Einspänner läben un friecht 1525 dei blåchbläudig Katharina von Bora, dei ok von't Läben in'n Kloster dei Schnut vull harr. Un Tetzel, dei in't Sassenland den Sünnenhannel up'e Spitz dreef un so as 'n Marktschrieer utreep: "So as dat Geld in'n Kasten klingt, dei Seel denn in den Häben springt!" — dissen Tetzel kricht 1519 dei schwatte Dod taufåt, un keinein weit, wohen sien Seel sprungen is.

Bi all dit Verglieken vonne Reformatoren Luther un Merz kümmt man bi't Simmeliern nich ümhen, Luther för plietscher as Merz tau hollen. Denn Merz hett 'n Tetzel as Fründ, einen, dei äbenso as dei würkliche Kuttendräger Tetzel vör Tieden föfti-föfti måkt hett. Denn so as dei Kuttendträger Tetzel Geld för Papst Leo X. sienen Peitersdom in Rom indrieben wull un dorbi dei Hälft för sik behollen hett, so röppt dei Tetzel von hüt: "Gäwt mi Geld un ok Kanonen, ik gäf Know-how för beste Drohnen!" Ja, ik schnack von Selensky, dei finanziell afhängig von Düütschland is, nu oewer mit dei ukrainische Drohnen-Plie ein Middel funnen hett, Düütschland ok von sik afhängig tau maken — mit Drohnen-Plie un Kriegsangst, mutt'n seggen. Un Reformer Merz as düütscher Kanzler un sülfstwählte Föhrer von Europa gifft dissen niegen Tetzel in'n Päsidentenbunker ünnern Marienpalast ümmer wedder Milljonen un Milljarden gägen dat Verspräken, Europa vör Putin tau redden un unse liberale abendlännische demokratische Ordnung up ewig tau erhollen. Wecker is dei Afhängige? Kannst meist nich miehr seggen, un dei Milljonen fleten...

Drohnen: Wer hat's erfunden? Die Schweizer — äh, nee, die Ukrainer!

Œwer wat sall'n dortau seggen? Merz is äben noch 'n echter Katholik un kein Luther, œwer Korrupschon, Partisanenakschonen, stännigen Personalwessel un legen Ümgang mit Minnerheiten süht hei henwech. Wat is all Luther sien Besinnung up't Läben mit den Globen, dei Gautmäudigkeit von Gott, Jesus Christus un dei Bibel? Mit ümmer mihr Schullen för dei Rüstung gägen den bösen Russen will Merz sik un sien Angturåsch redden, wat so nich mihr tau redden is. So ward Düütschland nich saniert, sonnern düchtig ruiniert, denn 30.000 € Staatsschuld fallen hüt all as Last för jeden Börger an.