Prinz Putschi, uns Buttschi!

vun Claus Günther

"Minsch, wat harrn wi uns freit un höögt, harr disse Putsch bloots funktschoneert!
Heel Düütschland weer wedder vergnöögt! Tominnst hefft wi dat utprobeert.

En Prinz vun Gottvadder sien Gnaad harrn wi för Düütschland in'n Bott.
Güng scheep, un dat is jammerschaad … Wieder geiht de ole Trott.

Tweetheuchste Adelsklass, o Mann! Prinz Putschi, mien Buttschi du:
'Heil Hoheit!', so snackt een di an. ‚De Kanzler bün ik för ju!'

Schiet op Stüern un op "Soziol", wi Rieksbörgers köönt dor op speen!
Vadder Stoot, de kann uns mol — samts Bundsrepublikvereen!

Kaisertied vör veerteihn-achtteihn, för düt Riek sett wi uns in.
Een Volk! Een Riek! Een Fö-Fö-Fö-Börgervereen! Beten Putsch un veelfack Winn!"

"Rieksbörgers in Wehr un Wapen — wohr di, Scholz, de Storm brickt los!
Bismarck leet en Reken apen. Kanzler, nu warrt wi de Boos!

Scheun, dat mag woll Dode geven (en poor hunnert sünd nich veel),
Rieksbörgers warrt dat beleven: De Rieksdag is dat grode Teel!

Kiek, opletzt warrt wi regeren: Prinz Putschi un en Richterin.
En Ex-Oberst warrt marscheren, en Jurist mookt ok noch Sinn.

En Schandarm warrt uns flankeren, en Doktersche mookt uns gesund.
Hoheit schall dat nich generen — in Tokunft geiht't in Düütschland rund!

Passt op, nu kümmt de grote Dreih! Demokrotie is in'n Ammer!
Dat gifft di villicht en Bohei! An'n Enn aver Kattenjammer.

Jichtenseen hett uns verraden. Welken weer dat? De or du?
Freuher roken wi den Braden. Buten rechts weer meist ‚tabu.'"

De Akschoon, de sorg för Opsehn. Rieksbörgers mookt bannig Wind.
Aver nu hefft se dat Nasehn. Mehrsten Lüüd hefft seggt: "De spinnt!"

"Uns Tokunft is —" Nu mol sachte. De Polizei bröcht dat to Enn
(welk Reveer? Weer woll dat achte). "Hier joon Zell, de hett veer Wänn!

Joon Falschgeld un dorto joon Päss — weg dormit, wat schall de Schiet!
Frie Börgers un en frie Press: Dat is dat Best in unse Tied!"

Dörchknallte Terroristen hefft nix to söken hiertolann.
Wi rüümt op mit de Putschisten! Joon Spinnkrom, de mookt wi toschann!

Düütschland weet, woneem Gefohr is. "Rechtsiets Oog: höhnerblind!" (Nu swieg!)
Wi all wüllt Freden, dat is wiss, un nienich, nienich wedder Krieg!