vun Behrend Böckmann

Wenn't nich so löppt, as't lopen sall,
befinnt dei Minsch up jeden Fall,
un is sik denn ok ümmer wiss,
dat schullig wull ein anner is.
Disse Oort sik tau verhollen
hett Poletikers sihr gefollen,
un sei verkloren jedet Kind,
dat s' dei wohrsten Engels sünd,
dat s' dat Allerbeste gäben,
dormit wi demokratisch läben,
un so sünd wi dor ankåmen,
dat jederein sik säukt 'n Nåmen,
mit den man denn bestimmen kann,
will ik Fru sien orrer Mann.

Mann un Fru sünd reinlich scheden.
Bravo! So gefallt dat jeden.

Doch hier un dor bubbert 'n Hart,
will nich, dat Adam Eva ward,
doch dat schlööcht in unser Land
in Populisten von den Rand.
Dei würn twors demokratisch wählt,
doch dei Midd sik dormit quält,
näumt sei dei extremistisch Rechten,
mit wecker is kein Bund tau flechten,
dei as russlandfründlich gellen,
wo man deit up Kwiire schellen.
Un klor is: Wer up Kwiire schellt,
höört tau dei Bösen in dei Welt!

Up Queere, sech ik, nich up Queen!
Woso versteihst nich, what I mean?

Bi uns sall't demokratisch sien:
as einst dei Muer in Berlin,
gifft dat 'n Muer in't Parlement,
dei Gaude vonne Bösen trennt.
Ob dei Brandmuer sik höllt
orrer mål tausåmenföllt,
ward dat Volk mit Wåhlen richten
as tau Leipzig einst mit Lichten.

Dei Gauden wiern an'n Hindukusch,
späl'n för Nawalny einen Tusch,
gäben Waffen un väl Geld
an den Redder von uns Welt,
den Duzbrauder Wolodymyr,
dei beddeln deit mit väl Gedür,
dat Düütschland em dei Taurus gifft,
nich wiederhen so nehrig blifft,
dormit hei kümmt an Moskau ran
un Putin düchtig ketteln kann.

Noch is Putin sülwst kein Drohn,
oewer fleigen kann hei schon!

För Demokraten inne Midd
is Putin blot igittegitt,
un geiht bi uns wat in’e Grütt,
kricht Putin glieks die Räken mit,  
denn düssen bitterbösen Mann
man allens ünnerschuben kann:
Is dei Strom wech, dat Kophus dicht,
geiht man mit Putin tau Gericht.
In'n Amt springt nich dei Räkner an,
gliek is Putin wedder dran;
kreist 'n Drohn œwer Berlin,
kann dei blot von Putin sien,
mit Sägen von den leiwen Gott
lecht Putin sien grot Schattenflott –
wenn dei Kreml dat so will –
Verbinnungskabel einfach still.

Löppt in't Leven wat verdwars,
secht wi all: De Putin war's!

Måken Fäknjus ehre Runnen,
sünd's in Moskau wull erfunnen,
in Moskau wür dei Supp ok kåkt,
dei Trump taun Präsidenten måkt.
Scholz kreech up't Plakat 'n Bort,
ok dat is so dei Putinoort,
ok höllt hei sik besonners schlau
un lannt 'n gräunen Supergau:
Schum, dei süss måkt Ritzen dicht,
ward 'n Fall för dat Gericht,
denn vör Korten wür bekannt,
dat Schum is in'n Utpuff lannt
un väle Wågens bläben ståhn.
Tau Faut mösst dei Besidder gåhn,
un hei keech 'n groten Schreck,
denn Habeck grient an Achterheck.
Man hett dei Russen in Verdacht –
doch steiht all dat in Putins Macht?

In Putin siene Schattenflott,
dor stekt ein Schüddelriemel binn —
wo schön klingt doch de "Flattenschott"!
Bloß leider hett dat gor kein' Sinn.

Un wenn dei Wahl-o-Mat mi secht,
„Dei AfD is för di recht!“,
denn möt ik ganz sachtens frågen:
Hett Putin hier denn ok dat Sagen?
Kann sien Wark von Online-Trollen
mi ok na rechtsbuten rollen?
Hett sien Geheimdeinst dat utheckt,
dat in mi binn ein Nazi steckt?!
Fraag mi, woans, woso un ob?!
So langsam küselt mi dei Kopp...
Schriff ik dei Schuld mi sülven to?
Nienich! Dei Schuld hett Putin! So!