Schöne niege Welt

vun Marlou Lessing


Hach ja, allens warrt dürer, ok dat Porto hett ja to Johrsbeginn toleggt. Wieldat ik en lüttjen Verlag heff un mien Böker sülven versennen do, heff ik en ganzen Barg Fief-Cent-Breefmarken anschafft. Op so'n wat dickeren Ümslag mit'n Book binnen back ik denn tweemaal 1,10 € un een Fiefer op un schriff "Büchersendung" dwars bavenöver. Nu is de gode ole Bökersennen twoors eentlich afschafft, dat heet nu "Bücher- und Warensendung", un de Postler*schen kört dat "BüWa" af, avers ik bün al oolt noog, in düsse Saken konservativ to ween.

Af un an passeert dat denn avers, dat een ut't Butenland wat bi mi bestellt. Verleden Week weer't en Bookladen ut Öösterriek. — Schullst ja eentlich denken, dat so'n Bökersennen in't EU-Butenland dat Lieke kosten kunn as in't Binnenland, man nee. So wied sünd wi denn ja doch noch nich!

De Damens bi mien Postkiosk hebbt so'n plietschen Drucker, mit den se all Marken drucken köönt, avers nich de Marken för'n Book na Öösterriek. Snaaksch. Söben Euro sünstwat schall dat kosten, wenn een dat eenfach so schickt. Also dor is de Marke för'n Book doch billiger, meen ik mi to erinnern!

Nu weer dat betherto keen Problem. Dor kunnst online gahn un di bi dhl.de en Marke drucken. Natüürlich bruukst dorto en Benutzerkonto mit all Schikanen — dat kennt wi ja. Dat harr ik mi ok anleggt — för de poor Maal, de ik dat betherto bruukt heff. Ik gah dor wedder hen. Man wat is nu?! De Siet, 'neem een de Marke drucken kann, is dichtmaakt — de Post hett sik dorför ganz wat Niegs un Schickes utfunnen: Warenpost International. Niege Kundennummer beantragen, niege Daten ingeven — okay... avers wat steiht dor?!

Wat? 200 Sendungen per Johr schall ik in't Butenland verschicken? Nixda!

Ik kann also gorkeen Breefmarke mehr online betahln un utdrucken.

Prima. Fortschritt.

Dor woor mi dat to bunt. Woso schull ik mi hier en Been utrieten?! Ik heff dat eenfach so frankeert as de annern Bökersennen an den Dag un in'n Breefkassen smeten. Villicht kriggt dat ja nüms mit, un dat bummelt so stiekum na Öösterriek!

Puustekoken. Dat Book keem torüch — mit düssen Opbacker:


Klick op to'n Vergröttern!

Nu heff ik endgüllig kapituleert, bün na'n Postkiosk un heff dat tosättliche Porto köfft. Winst maak ik mit dat Book denn nich mehr — ik harr dat ganze Porto nich vörweg op de Reken schreven. Harr ik dat daan, harr de Bökerladen dormit Minus maakt. Nu överlegg ik mi, wat ik en annern Breefdeenst utprobeern orr gor nich mehr in't Butenland levern schall. De Post op jeden Fall hett mi blangen ehrn Weg in den Foortschritt op de Streck liggen laten.


2.8.2022


na baven