Wildswien un Popcorn

Vun Jens-Peter Bey

Wenn du in't Kino büst, kracht dat üm di rüm, as wenn du in de Krachmakerstraat wahnen deist. Dat mahlt un malmt un knistert to glieke Tiet, dor kann die dat Hören un Sehen vergahn. Un jüst dorför hesst du int Kino ja veel Geld betahlt. Filme kieken ahn Pop-Corn geit kuum, wenn du jünger as veerundveerdig büst un geiht gonnich, wenn du weniger as twintig Johr tellst. För ünner Vierteinjährige is dat Wegneien vun Popcorn een Minschenrecht, jüst so as dat Scheefdrägen vun Kappen un de Kostümierung mit Baggy-Büxen, de op halvi acht twüschen de Kneen schlottert un de Bruno Bananis ton Vörschien bringt.

Gähnmais

Du wunnerst di, wat dat all mit Swattwild to doon hett? Is 'n lütt beten figelinsch. Popcorn warrt ut Mais makt. Gifft immer mehr Mais üm uns rüm, wieldat so veel Popcorn in de Kinos wegknispelt warrt. Sünnerlich för langwielige Filme hebbt se all Gähn-Mais tücht. De Swattkittels föhlt sik sauwohl, wenn mannshoch dat Grön üm eer rüm is. Un wenn se sik sauwohl föhlt, sünd de Keiler un Bachen dorbi för lütte Frischlinge to sorgen. Duert nich mehr lang un all de Wildswien-Rotten künnt sik wedder in den Mais versteeken un de Jägerslüüd vernarrn holn. Woor di weg, wenn de Bache eere lütten Stripenbuttjers verkloren deit, wat dat feinet in dien Vörgoorn to freten, to wöhlen un to suhlen gifft. Leg di ok nich mit een Keiler an. Siene Tähn heet nich umsünst Hauer. De hett ok keenen Respekt vör dienen Tiguan-Kinnergoorn-Yuppi-Jeep un verbuult em so fix, dat du op Madam eern Tweetwagen ümstiegen musst.

In Momang sünd de Swattkittels all een beten gnatterig. Se versökt sik mit den ÖPNV antofrünn. In Hamburg is dat jüst bös scheef gahn, schrifft mien Blatt. De Uddls hebbt op den U-Bohnhoff Bökenkamp een Wildswien dootschotten. Ok een Bürobesöök in Volksdörp kunn eerst mit MP un Jägerflint to en truriget Enn bröcht warrn. Nu frag ik di: Wat hett een Wildswien ok in't Büro to söken. De Dierten sünd all een lütt beten mall. Un Schuld is de Minschen ehr Jieper na Popcorn. Glöv ick.