De Oppers kriegt de Schuld

vun Meike Balzer-Fraun

De Naricht vun de niege Pisa-Studie hebbt wi all leest. Dat süht nich good ut un is en so eernste Saak, dat wi oprichtig na Lösungen söken schulln.

Un wat schrifft mien Bladd?

"Deutsche Schüler schlecht wie nie."              

Bremer Nachrichten (BN) von'n 6.12.23
                                                                                             

Wat denkt sik so’n Schrieversminsch, wenn he/se uns Kinner an’n Nikolausdag düssen Satz üm de Ohren haut? Jüst de jungen Minschen, de ehr „Köpfe … der Baustoff unserer Zukunft und (wollverstahn! ) der Motor unseres Wohlstands“ sünd — so schrifft dat Bladd wieder.

In den Text avers geiht dat denn egens un alleen üm de groten Mängel in de Billenspolitik. Dat hefft uns Jungs un Deerns ja nu würklich nich vermasselt!

"Große Mängel in der Bildungspolitik" harr en passlich Överschrift ween kunnt.

Hier so’n poor Bispelen, wat uns Kinner in ehren Alldag uttostahn hebbt — Narichten blot vun hüüt un ut uns Rebeet, also ‚regional und saisonal‘! Deelwies steiht dat in datsülve Bladd:

1. Männicheen Frietietshuus warrt woll dichtmaakt.     (BN S.9)
2. Streik un Snee in de Wesermarsch. Dat heet: Ünnerricht to Huus.    (BN S.12)
3. Vunwegen dat Wedder blieven in den Landkreis Osterholz hüüt alle Scholen dicht.
4. In Bremen warrt dat hüüt woll in alle Scholen Ünnerrichtsutfäll geven, wieldat de Lüüd streikt.

Gegen Snee un Ies kann nu ja ok de beste Schoolmeester nich an. Man schöön weer dat doch, wenn dat överall de technischen Middels geven dee, mit de all de Schoolmeesters all ehr Schölers ok mal opstunns tofaat kriegen kunnen för so’n richtig godet ‚Home Schooling‘. So’n Mail mit’n poor Opgaven is tominnst beter as gor nix, man bringt faken nich veel.

Ik glööv, üm de Technik dor frag ik mal den Nikolaus. He is doch de grote Kinnerfründ.

Eernsthaftig: Oplaatst siet Corona harr doch de Billenspolitik för de Technik mal düchtig wat doon müsst! Wi bruukt de Technik! Ünnerrichtsutfäll sünd ja nix Besünners mehr, sünd Alldag worrn.

Dorüm de Streiks — dorüm wedder Utfäll. Dat’s en Düvelskrink. Un op dat Wedder is ja ok lang al keen Verlaat mehr op.

Alltohoop mutt ik seggen: Dat Unrecht vun so'n Överschrift schriegt to'n Himmel. De Schoolgebüüd sünd in'n Dutt, Legioonen vun Lehrerslüüd fehlt, dank den Föderalismus tarrt sik de Länner ok noch üm de Lehrersminschen, vun Digitaliseern is vörn un achtern nix to sehn, dat Geld geiht in de Rüstung staats in de Bildung, un as vör hunnert Johr entscheidt dat Öllernhuus, wat dat Kind en Billenskarriere maken kann orr nich. Un wenn denn de Pisa-Ergeevnissen afstörten doot, wat is denn de Överschrift?

De Schölers sünd dösig.

"Victim blaming" nöömt een dat: dat Opper de Schuld geven. Un wenn wi nich bald wat doot, is dat keen Wunner mehr, wenn de Dösigkeit wirklich tonimmt. De Kinner hebbt denn jümmer noch keen Schuld.