'N Geschicht von twei, dei sik nich rüken kœnen

Ein Blick deip in de Historie von Israel un Palästina von Behrend Böckmann

Hamas is 'n arabisch Wurt für Iewer, Kampflust, Hengåf un ok 'n Utdruck för "Islam'sche Wedderstandsbewägung" un Hamas näumt sik ok dei palästinensisch sunnitisch-islamistisch Organisation, dei sik 1987 in Gaza grünnt hett, sik von dei Autonomieregierung in Ramallah in't Westjordanland afsett un siet 2007 dei Regierung in'n Gazastriepen stellt. Mihr as 40 Staaten hollen dei Hamas för 'n Terrororganisatschon, denn sei hemm' vör, den Staat Israel tau vernichten, un låten nicks unversöcht, Israel up'e Pöll tau rücken.

Üm tau verståhn, worüm Araber un Juden nich gaut miteinanner utkåmen, möt 'n wiet inne Geschicht taurüchgåhn.

Dat Hillig Land, dat biblisch Land Kanaan, stünn tau Tiet von Jesus sien Geburt ünner röm'sche Verwaltung un kreech den Nåmen "Syria Palaestina", dormit nicks mihr an dei olle Heimat vonne Juden un dat jüd'sche Königriek erinnern süll. Un dei röm'schen Stattholler schassen dei Juden ut ehr Heimat, un sei wiern von dunn an heimatlos; narrens künnen's sik säker sien. So warden in't Johr 1096 in Worms twüschen 400 un 800 Juden von Volkskrüztoochmaaten dodmåkt, in Mainz wiern dat so anne 1000 Juden, un insgesamt keemen dörch disse Pogrome 5000 Juden tau Dod. An'n Valentinsdach 1349 ward in Straßburg dei ganze jüdsche Gemeinde mit 2000 Personen Opfer vonne Gewalt, 1298 kümmt dat tau dei "Rindfleisch-Pogromen" in Franken, dei œwerschwappen nå Schwaben, Hessen un Thüringen — un 5000 Juden finnen den Dod. Ostern 1389 finnen in Prag bet tau 3000 Juden den Dod. As Kolumbus 1492 Amerika entdeckt, warden Juden in Spanien malträtriert un in Mäkelnborg mössten in't Bisien von noble un ihrwürdige Minschen 27 Juden den Flammendod in Stiernbarch starwen; dei annern 265 mäkelnbörger Juden würn ut't Land verdräben. Dat wür 1510 in Berlin nåmåkt, 38 Juden würn bi läbennigen Lief dat Füer œwergäben, all annern Juden ut Berlin jåcht.

Üm 1884 gifft dat inne hütig Ukrain all 'n Bewägung "Nich bi'n Juden inköpen", denn dor läwten väle Juden un dei Ukrainer schulten afgünstig up disse Landslüd. Un as denn dörch dat Enn' von'n 1. Weltkrieg un dei Oktober-Revolutschon niege Grenzen in Europa entståhn, grünnen ukrain'sche Natschonalisten 1918 'n "Ukrainische Volksrepublik". Dei Regierung höllt sik twei Johr un geiht denn nå München in't Exil un höllt sik dor bet 1992. Dei düütsche Historiker Götz Aly (Johrgang 1947) hett dit Kapitel ukrain'sche Geschicht ünnersöcht un rutfunnen, dat dat inne twei Johr ukrain'sche Volksrepublik so an 1500 Judenpogrome geef, dat dei Hüser vonne Juden anstickt un so üm 10.000 Juden un ganze Judenfomilien up'e Stråt afmurkst, dodschlågen orrer dodschåten würn.

As Hitler-Düütschland 1941 mit dat "Ünnernähmen Barbarossa" œwer dei Sowjetunion herföll, wür ok dei Ukrain besett un väle Ukrainer wiern sik mit dei düütschen Besatzer einig, un so hemm' bet 1943 300.000 Ukrainer friewillig inne Wehrmacht un as Hülpsschandarmen deint un sogor bi Pogromen gägen dei jüd'sche Bevölkerung hulpen. So würn in'n Sommer 1941 vonne SS mit ukrain'sch Hülp rund 5000 Juden in Lemberg ümbröcht un in'n Harst geef dat denn dat Massaker von Babyn Jar mit 30.000 Dode. Man räkent dormit, dat dörch dit Tausåmenspäl von SS un dei ukrainschen Friewilligen 850.000 ukrain'sche Juden den Holocaust nich œwerläwten. Dei von Düütschland anzettelt 2. Weltkrieg lecht nich blot Dörper un Städte in Schutt un Asch, sonnern ok 70 Milljonen Dode schlåhn tau Bauk, allein 24 Milljonen Sowjetbörger un mihr as söss Milljonen Juden in Europa, dorvon warden vier Milljonen in Konzentratschons- un Vernichtungslager as Auschwitz, Buchenwald, Sachsenhausen tau Dode quält. Dei Vernichtung vonne jüd'sche Bevölkerung geiht as Holocaust orrer ok as dei Schoa inne Geschicht in un deit dat grote Unglück, dei Katastroph, den Völkermurd an mihr as söss Milljonen Juden in Europa bedüden.

Wecker jüd'sche Börger künnen sik dat leisten, nå Amerika orrer nå Palästina uttauwannern. Dor dei osteuropä'schen Juden taun Enn' von't 19. Johrhunnert inne Ukrain un ok in Russland leech anseihn un leech behannelt würn, wannern ukrain'sch un denn ok russ'sche Juden, dei nauch Geld harrn, nå Palästina ut. Dor harr sik 1897 'n zionistische Bewägung inne biblisch œwerlewert Heimat von't jüdisch Volk in dei Afsicht grünnt, in't Hillig Land 'n jüdschen Staat tau grünnen, wo tau dei Tiet Araber ansässig sünd. Sei wullen in dat Land taurüch, dat bet 536 dei röm'sche Provinz "Syria Palästina" wier un denn an muslim'sche Herrscher œwergüng. Dei Nåm Palästina wür gägen 'n arab'schen Nåmen utschudert un ierst an'n Enn' von'n 1. Weltkrieg wedder inführt. Dei Krüzfohrer, dei twüschen 1199 bet 1291 in't Königreich Jerusalem dat Seggen harrn, hemm' blot von't Hillig Land, von't verheitungsvulle Land schnackt. Dei gottgläubigen Krüzfohrer (Christen) kregen mit dei allahgläubigen Sunniten (Moslems) dat Strieden, dei Moslems siegen un herrschten nu dor, wat Palästina einst wier. Twüschen 1250 bet 1516 keemen dei Mamluken, ein œwer Ägypten un Syrien herrschend türkisch Militäraristokratie, an't Ruder, bet denn dat Land af 1516 Deil von't Osmanisch Riek wier un dat bet taun Enn' von'n 1. Weltkrieg bleef.

Dat düütsche Kaiserriek mit Österriek-Ungarn, Italjen un dat Osmanisch Riek (hütige Türkei) as dei "Middelmächt" dän sik af 1914 mit dei 1907 tau dei "Entente" (up düütsch: Invernähmen) verbünnten Länner Frankriek, Ingland un Russland bekriegen, bet dat an'n 11. Näwelmånd 1918 taun Waffenstillstand kümmt. Dei Russen wiern all ihrer an'n Enn', denn as dat 1917 tau dei "Februarrevolutschon" in Russland keem, mösst dei Zor den Haut nähmen un dei niege Regierung keem in' Julmånd 1917 mit Düütschland œwerein, 'n Waffenstillstand uttauhanneln un den Krieg mit 'n den Frädensverdrach von Brest-Litowsk tau beennen. Doch dei Krieg geiht wieder, Düütschland un sien Frünn' warden denn vonne "Entente-Mächte" besiegt, tau dei sik noch Amerika gesellt hett. Nägen Milljonen dode Soldaten un söss Milljonen dode Zivilisten sünd tau beklågen. 'N Frädensverdrach ward uthannelt un an'n 28. Rosenmånd (Juni) 1919 as Versailler Verdråch ünnerschräben. Tau glieken Tiet ward dei Völkerbund as Vörgänger vonne Vereinten Natschonen grünnt. Düütschland as Verlierer mösst all sienen Kolonialbesitz afgäben un dei wür nu Mandaatsrebeit von'n Völkerbund. För't Osman'sche Riek as Verbündte von Düütschland un dormit ok Verlierer geef dat 'n Extrakonferenz an'n 10. Austmånd 1920 in Sèvres bi Paris, dat Osman'sche Riek wür updeilt inne Türkei as Staat un dei Rebeits Libanon, Syrien un Jordanien kreegen Frankriek as Schutzmacht un dei Rebeits Palästina, Irak un Jordanien kreech Ingland as Schutzmacht.

Tau disse Tiet finnen all jüd'sche Inwannerer dat Rebeit üm't antike Jaffa an't Äuwer von't Middelmeer gaut, fangen dor mit Landwirtschaft an un bugen bald dei sihr bekannten Jaffa-Orangen an, dei von dunn an dei Wirtschaft posperiern leeten. Un Jaffa kreech 1909 den Vörurt Tel Aviv, den "Vörjohrshuckel", hüt dei "Witte Stadt" mit ehr välen Buwarken in'n Buhusstäl vonne 30er Johren. Ierst 1950 warden Jaffa un Tel Aviv tausåmenlecht. In disse Tiet ward Tel Aviv von'n Vörurt nå Jerusalem as gröttst Stadt in't palästinensisch Rebeit (knapp 'n Milljon Inwåhners) tau dei tweitgröttst Stadt (knapp 'n half Milljon Inwåhners) un musert sik taun wirtschaftlich, politisch un kulturell Zentrum.

As ik ja verkloort heff, güng man in't Zorenriek nich besonners fründlich mit dei jüd'schen Mitminschen üm — un so keem dat, dat all twüschen 1882 un 1903 so an 25.000 Juden Russland un Rumänien in Richtung Jaffa verleeten. Twüschen 1904 un 1914 keemen Utwannerer in't einst Hillig Land an un twüschen 1919 bet 1923 stimmt dei inglisch Mandatsmacht tau, dat sik 35.000 Juden, mierstendeils ut Polen un dei Sowjetunion, in Palästina ansiedeln dörpen. Twüschen 1924 un 1931 wannern noch eins 80.000 Juden ut Polen un dei Sowjetunion nå Palästina ut twüschen 1932 un 1939 setten sik nå dei "Machtœwernåhm" 200.000 Juden ut Düütschland nå Palästina af. Nå 'n Utbruck von'n 2. Weltkrieg schaffen dat twüschen 1939 un 1945 noch eins 70.000 Juden ut Polen, Düütschland, Ungarn, Tschechoslowakei un Rumänien, den Nazi-Terroer tau entkåmen, un so tellt dei jüd'sche Bevölkerung in't Palästina ünner inglisch Mandatsherrschaft taun Enn' von'n 2. Weltkrieg 600.000 Minschen. Un disse Minschen wullen nu ok dor läben, wo siet biblisch Tieden so an 400.000 Araber ehr Daun harrn. Man versöcht miteinanner uttaukåmen, ok wenn man sik hier un dor all üm Lännerien un Besitz dat Strieden kreech.

As dei 2. Weltkrieg ut is, lööst sik dei Völkerbund up, un dorför grünnen sik an'n 24. Saatmånd (Oktober) 1945 in San Francisco dei Vereinten Natschonen, dei dat inglische Palästina-Mandat œwernähmen un an 15. Mai 1948 mit dei Order utlopen låten, dat ut dat Mandatsrebeit Palästina twei Staaten entståhn süllen, ein jüd'scher un ein plästinens'scher Staat. An'n Dach dorför verkünnt dei jüd'sche Poletiker Ben Gurion as Vörsidder von'n inwüschen grünnten Jüd'schen Exekutivrat in Palästina dei Unafhängigkeit von den niegen Staat Israel. Ut dat einstig inglisch Mandatsgebiet entståhn näben Israel dei Gazastriepen, dat Westjordanland, Jordanien un Transjordanien.

Ben Gurion (1886-1973) keem in Polen up'e Welt, wannert 1906 nå Jaffa ut. Doch bald hemm' dei Osmanen em wägen sien politischen Aktivtäten up'n Kieker un wiesen em ut. Hei geiht nå Amerika, un as dei Luft wedder reigen is, kümmt hei 1918 nå Palästina taurüch un ward taun zionistische Führungsfigur, dei up'n Staatsgrünnung ut wier. Un hei harr an'n 14. Mai 1948 noch gor dei Staatsgrünnung von Israel utposaunt, dunn erklären Ägypten, Syrien, Jordanien, dei Libanon, Saudi-Arabien un dei Irak den jungen Staat Israel den Krieg. Dei duert denn ein Johr — un Israel nimmt Rebeits in, dei dei UNO nich för Israel vörseihn harr. Dei Araber warden dor Frömde, wo's tau Hus wiern, sei warden schasst un heimatlos. Palästinenser säuken Tauflucht in'n Gazastriepen, in't hütig Königriek Jordanien, in Syrien un in'n Libanon, in'n Irak un in Ägypten. 150.000 arab'sche Palästinenser warden israelisch Staatsbörgers, hüt gifft dat 1,4 Milljonen palästinensisch Israelis.

Dei tauwannerten Israelis harrn ehrn Natschonalstaat, dei Araber vör Urt nich. Stännig gifft dat Striet, dei von Tiet tau Tiet as Krieg föhrt ward. Israel siedelt in Rebeits, dei för dei Palästinenser vörseihn wiern, un dei Palästinenser låten sik dat nich gefall'n un blåsen taun Upstand. Dei Striet geiht so wiet, dat dei Palästinenser ünner Maat Jassir Arafat (1929-2004) — för den dat schwatt-witte Palästinenserdauk "Kufiya" dat Markenteiken wier — as Kopp von buten dei weltlich instellte Fatah in'n Kampf gägen Israel stüert un af 1969 dei Baas vonne dei palästinensisch Befrieungsorganisatschon PLO ward. In't Tausåmenspäl mit anner arabisch Länner, dei ok nich gaut Fründ mit Israel sünd, kümmt dat ümmer wedder dortau, dat sik nich dei Palästinenser un ok nich dei Israelis an dei UNO-Order von 1948 œwer dei Twei-Staaten-Lösung hollen. Israel prosperiert un dei Palästinenser möten dat afgünstig mit anseihn.

1994 is dat denn so wiet — dörch diplomat'sche un militär'sche Akschonen schaffen dat dei Palästinenser, dat's 'n Autonomiebehörd as 'n Oort eigen Regierung billen kœnen, un so keem Jassir Arafat nå 27 Johr Exil taurüch un billt in Gaza dei ierste "palästinensisch Regierung". Sülfst mit Hülp von Amerika as Weltschandarm kåmen Jassir Arafat as Baas vonne palästinensisch Autonomiebehörd, Ehud Barak as Ministerpräsident von Israel un Bill Clinton as USA-Präsident in't Johr 2000 nich œwerein, 'n eigenstännigen Staat Palästina tau grünnen. So bleef Arafat bet tau sienen Dod 2004 dei Präsident vonne palästinens'schen Autonomie-Rebeits, dei 1993 in'n Nåmen vonne PLO mit Israel œwer 'n Fräden so verhanneln däd, dat 'n sik gägensiedig anerkennen wull. Dorför kreeech hei 1994 mit dei israel'schen Poletiker Shimon Perez un Jitzschak Rabin den Frädensnobelpries. Œwer denn kümmt allens noch ganz anners.

In'n Julmånd (Dezember) 1987 grünnen vernarrte Muslimsbräuder in Gaza den "Islam'schen Wedderstand", tellen bet tau 80.000 Maaten un willen nu dei weltlich instellte Fatah mit Sitz in Ramallah in't Westjordanland den Rang aflopen un dei Geschäften inne Hand nähmen. Dat kriegen's denn ok för den 365 km² groten Gazastriepen hen. Von gaut 2,3 Milljonen Bewåhner läben 1,7 Milljonen as Frömde
in acht grote Frömdensiedlungen un warden von 13.000 Mitarbeiter von't UNRWA-Frömdenhülpswark mit allens, wat taun Läben nödig is, versorcht. Liekers läben 80 Purzent in Powertäh. Un as dei Hamas 2007 dei Wåhlen winnen, dunn beläwt dei Welt, wat "radikalisiern" bedüden deit. Dei Hamas-Adepten sünd all Middel Recht, Israel tau vernichten, un so buucht Israel taun eigen Schutz 'n hogen Tun üm den Gazastriepen. Un dei Hamas finnen spendable arab'sche Frünn, dei ok nich gaut up Israel tau spräken sünd, un bugen mit dei ehr Hülp den Mullwörm gliek 'n militärisch Tunnelsystem ünner dei Gaza-Ierd. Dor Israel siet 1948 rund 800.000 Palästinenser wägen politische Unstimmigkeiten achter Schlott un Riegel bröcht hett un mit sien Siedlungspoletik in't Westjordanland ok Öl in't Füer gütt, grippt von'n Libanon ut 'n anner "Gottspartei", dei Hisbollah, Israel sogor mit Raketen an.

Un denn kümmt dei 7. Saatmånd (Oktober) 2023. Wat för 'n Nacht. Dei Hamas schicken twüschen 2500 un 3000 Raketen nå Israel rœwer, rieten mit Bulldozer grote Löcker in den Grenztun un an'n Morgen gägen Klock söss knaddern twüschen twei- un dreidusend Hamas up Motorrö' in'n Kibbuz Beeri, anner Kibbuzim un Siedlungen, schmieten Handgranaten inne Hüs un Schutzrüm, scheiten wild üm sik - un binnen Korten finnen knapp 1300 friedlich Börger den Dod. Allein 360 Besäuker von't Universo-Paralello-Festival inne Neech von'n südisrael'schen Kibbuz Re'im œwerläben dissen Dach nich. Un dat gifft nich blot Murd un Dodschlach, ne, so an 200 Minschen von 'n Baby bet taun Greis warden as Geiseln in't Hamas-Tunnelsystem von Gaza verschleppt, un väle sitten dor bet hüt noch fast.

Hett Israel all väl mit dei Hamas beläwt, so bringt disse Angriff dat Fatt taun Œwerlopen. Dei Gazastriepen ward afriegelt un wedder gifft dat Krieg, denn Israel verkünnt, dat dei Staat kein anner Wåhl hett, as Gaza tau den Urt tau måken, in weckern dat momentan orrer gor för ümmer kein Hüsung mihr gäben ward, un dat 'n schwore humanitäre Kris dat einzigst Middel is, üm dei Hams bitaukåmen. Dei 365 km² grote Gazastriepen mit bummelig 2,3 Milljonen Inwåhners ward tau Lann, See un Luft blockiert, dor sall keinein rin- orrer rutkåmen, bet nich dei letzt Hamas upgifft. In dissen Kampf hemm' bet Hornung (Februar) 2024 an 30.000 Zivilisten den Dod funnen un mihr as 70.000 würn verwunnt. Un 'n Enn is noch nich aftauseihn, kein Stein steiht mihr up 'n annern, Wåder, Mähl un Brot sünd Gold wiert, Strom un Sprit äbenso, dei Schaulen sünd dicht, dei Krankenhüs gåhn dei Medikamenten ut, Hülpstransporte luern in Ägyten, dat's rinlåten warden. Un kümmt wat rin nå Gaza, denn kümmt dat ut Not tau Plünnerungen. So wür an'n letzten Dach in'n Hornung (Februar) 2024 'n Tross von 30 LKW mit Hülpsgäuder von Palästinenser in Not so plünnert, dat weck ünner dei LKW-Röö' keemen, anner einfach dodpeddt würn un disse Akschon ierst 'n Enn' fünn, as israelisch Flinten spräken.

Nich all sünd dormit inverståhn, woans Netanjahu as Staatschef gägen dei Hamas vörgeiht un dorbi unschullige Palästinenser dusendfach dorför bläuden möten.
Männigein fråcht sik, ob sik Netanjahu villicht dei taun Ogenspeigel nåhmen hett, dei
sik in Oradour un Lidice an unschullig Minschen vergåhn hemm'. Düütschland höllt sik taurüch, wat 'n Kritik an Israel angeiht, denn dei düütsche Geschicht kann dei Folgen von dat, wat as Antisemitismus orrer Judenhass inne düütsche NS-Poletik bestimmt hett, nich so einfach œwer Bord schmieten. Anners hengägen süht dat 'n Schwiezer Spälmann, dei bi uns in Bramburg läwt, dor nå Demeter-Rägeln 'n Buernhoff ünnerhöllt un af un an ok in't Kiekschapp tau seihn is. Dor hei keinen düütschen Pass hett, dörf hei sien Stimm' nich tau Landswåhlen afgäben, hett œwer so sien Bedenken, wenn Trump wedder an't Ruder kåmen süll. Un äbenso kann hei nich verståhn, dat Orban orrer Netanjahu, dei hei för "rechtskonservative Großreichsträumer-Idioten" höllt, wedder so väl Stimmen krägen hemm', dat's wiederregiern künnen. Un wenn denn noch Putin, dei sülben nauch Schiet an'n Hacken hett, dat Leid vonne Palästinenser in'n Gazastriepen mit dat Leid vonne Leningrader Bevölkerung wihrend dei Blockad' von'n 8. Harstmånd (September) 1941 bet taun 27. Hartung (Januar) 1944 vergleiken deit — von gaut 2,5 Milljonen Inwåhners hemm' rund 1,1 Milljonen disse Tiet nich œwerläwt, dor's an Hunger, Krankheiten un Küll storben sünd —, denn kann Düütschland œwer Putin herfallen un Israel bidden, humanite Korrodore intaurichten, Hülpskonvois rintaulåten, an dei Twei-Staaten-Lösung tau denken...

Wecker Schuld up sik låden hett, dei möt ok anner dei Schuld vergäben kœnen...