Dei Ogenklapp

vun Behrend Böckmann

Wat is uns Kanzler up sik stolt,
wenn hei joggt in düstern Holt,
hett 'n Wöddel œwerseihn,
stolpert dull, dunn wier't gescheihn.

Ok keek ut't Mosch 'n Stubben rut,
up den föll hei mit siene Schnut,
un so hett hei nu Blessuren
von dat Kinn bet an dei Uhren.

Britta künn dat gor nich fåten
un denkt, hei süll dat Joggen låten;
wat hett dei Fru sik dull verfihrt,
dat ehr Olaf so lädiert.

As sien Dokter seech den Schåden,
däd hei unsen Kanzler råden:
Üm dat blåge Och tau schonen,
wür 'n Ogenklapp sik lohnen.

So'n Schiet! Hei bruukt sien rechtes Och!
Hier treckt hei jüst dei Braue hooch.

'N Ogenklapp hett dat nu dån
as einst bi den Mosche Dajan;
dei Kriegsminister wier bekannt
in sien jüdisch Heimatland.

Dor is hei in Dreidüwels Namen
mit'n blages Ooch noch dorvun kamen!

Ok wenn man dat nich glöben mach:
Olaf sitt in'n in Bunnesdach,
up't rechte Och mit Ogenklapp
un't linke Och kiekt inne Mapp.

Dat höltern Been deit em twoors weh,
man noch veel miehr dei FDP...

Un inne Mapp as Termin steiht,
dat dat gliek nå München geiht,
wo niege Wågens ward'n vörstellt,
dei man bucht vör düret Geld.

Von Weihdåch wiest hei keine Spur,
will ok noch up Wahlkampftour —
wat hett uns Kanzler doch för'n Maud!
Dei Ogenklapp, dei lett em gaut.

Ein Papagei dörf ok nich fählen,
natüürlich ein von dei Blau-Gälen.
Dat Lindner-Veih sitt Scholz an't Ohr
un dröhnt em "Schuldenbremse!" vor...