vun Behrend Böckmann

Dor seten nu dei Noch-Vizekanzler Robert un dei Noch-Kanzler Olaf as nattgåten Pudels inne Elefantenwåhlrunn' un gradulierten as Verlierer mit 'n gaud upsett't Mien tau't bös utgåhn Späl Wåhlen denn niegen Noch-Nich-Kanzler Fiete. Un Fiete glöwt sik säker tau sien, denn Macron, Trump, Selenskyj, Netanjahu, Starmer, Rutte un anner hemm'  all 'n Bückling vör em måkt.

Robert, dat wier nich tau œwerseihn, seet mit 'n Flunsch dor, as wier em dei Soltpott inne Supp follen. Un as hei denn wat säd, wüsst 'n nich, ob hei dei Wählers sien Schlapp inne Püschen schüfft orrer doch sien gräune Belihrungspoletik för schullig befinnt. Villicht hett Dr. phil. Robert Habeck bald bäten mihr Tiet un kann sik näben den Dichter Robert Musiol orrer den Komponisten Robert Schumann, den Dokter Robert Koch, den Techniker Robert Bosch orrer den Polarforscher Robert Scott, denn Räuwer Robin Hood, den fleigend Robert orrer as den Hilligen Robert, Schutzpatron för Salzborg un Bad Reichenhall, 'n bäderen Nåmen måken. Blot dat dei Salzborger Robert eigentlich "Rupert" heit. Man dat is ja villicht al ein bäter Nåm.

Robert orr Rupert — sien Fans leiwen Habeck ünner jeden Nåm!

FDP-Lindner hett liekso in'n Sack haugn. Hei warrt ja Vadder un kann denn ja 'n Babyjohr inschuven. Dordörch, dat hei von'n Kanzler vör dei Dör sett't wür, güng ja dei Koalitschon inne Brüch un Niewåhlen würn nödig – un nu hemm' wi Wählers dat so henkrägen, dat wi tau dei olle „Groko“ taurüchwannern kœnen un sik denn blot noch twei un nich drei strieden möten, woans man tausåmen inne Midd regieren möt, dormit noch mihr Wählers in't blåge Lager wesseln. Robert, dei „Bündniskanzler“ för alle Düütschen sien wull un sik mit 'n fründlichen Blick an'n Kœkendisch mit Wähler ünnerhollen hett, hett dat denn mit dat „Bündnis“ nich so henkrägen. Villicht dach hei, dat langt, dat sien Partei mit'n Ünnertitel ok noch "Bündnis 90" heit. Bi all dei grienend Fründlichkeit künnen sik väle Wählers nich mit sien Vörstellungen vonne Energiewenn' un den Kampf gägen den Klimawannel anfründen. Nich mål in sienen Wåhlkreis in Sleswig-Holsteen keemen dei Stimmen för 'n Direktmandat tauhop, un so geef dat blot 'n Platz up'e Landslist. Nich väl anners geiht dat den mäkelnbörger CDU-Maat Philipp Amthor, dei Jungspund mit 1950er-Scharm, dei al orrer nu doch nich as Justiz-Minister in't Kabinett Merz hannelt ward.

Nu hemm wi den Salat!

Dei gräune Frontmann Robert, dei dat Allerbest för Düütschland wull, gifft sik op'n Slips peddt, so as wull'n anner em wat andaun, låwt sik sülben œwer gräunen Klewer, un all, dei nich mit em œwerein sünd, dei sünd dei Sünnenbück. So versteiht sik dat ok, dat hei einen roden Poletiker 'n Noorslock un'n blåge Poletikersch 'n Lœgentant schellt. Robert gifft up un treckt sik taurüch. Ok Annalena as sien anner Hälft is mit feministsch Butenpoletik an'n Enn', œwer sei will nich upgäben un pliert mit 'n Posten in'n Bundsdach, up den in'n Momang noch Katharina vonne gräune Girlstrupp danzt. Sachs will Baerbock mit dei feministsch Butenpoletik noch bäten wiedermåken – völlig tau recht, denn väl hett sei in ehr Amtstied op düt Rebett nich beschickt, sei is dei Fruuns väl schüllig bläben. Dei afwählt Kanzler will keinen Ministerposten von Merz annähmen, blifft œwer SPD-Maat in'n Bundsdach. Lindner un Buschmann schmieten hen. Klingbeil lött al dörchblicken, dat hei nich blot dei Parteibaas, sonnern ok noch dei SPD-Frakschonsbaas in'n Bundsdach warden will. Merz leet för all, dei em taun Sieg verhulpen hemm', 'n „Rambozambo-Fieer“ in't Adenauerhus utrichten. Wat jümmer dat heiten schall – bi Merz mutt'n dor dat Pienlichste beförchten.

Heit "Rambozambo" bi Merz villicht: Käse-Igel un Prosecco?

Doch väle Wählers verståhn nich, dat hei ümmer noch von'n Brandmuer schnackt, wenn dei Blågen mit 20,8 % den rechten Rand un dei roden Linken mit 8,8 % den linken Rand utmåken. Lang höllt ein Demokratie sowat nich ut. Ein Partei mutt sik mal oppern un dei AfD inbetrecken, mitmåken låten – un wecker schall dat daun, wenn nich dei CDU? Klaar, nu geiht dat nich, wieldat Merz hooch un hillig sworen hett, hei wöör dat nich måken. Wier ok bäter, sei wöörn dat tauierst in ein Bundsland daun, dor is dei Schaden nich so groot as in dei Bundsregiern. Oewer dei AfD schull dei Schangs kriegen tau wiesen, dat sei nix bäter un dat miehrste schlechter måken as dei annern. Dat Volk will dat – sünnerlich in'n Osten. Denn schalln sei den Salåt ok kriegen. Un nåher nich quesen.

Kann oewer sien, dat uns dat erspoort blifft, wenn Donald Trump in dei neegsten Johr sien Land rünnerwirtschaft' un tau'n Autokratie ümmodelt. Dat warrt dei Lüüd denn ok von dei AfD kureern. Denn harr Trump doch ein bäten wat Gaudes... Täuv man af!