MV tut gut – MV wau (#MVwow)

vun Behrend Böckmann

Siet korte Tied gesellt sik tau dei analoge Reklåme „MV tut gut“ dei digitale Reklåme „MV#wow“, üm noch mihr Minschen as Besäuker nå Mäkelnbörg-Vörpommern tau locken. Dat Teiken # heit "Hashtag", wat nicks mit Drogen tau daun hett ("Hash" weckt bi dei öllere Generschoon villicht falsche Höpen!). Wi haschen nich in MV, wi sünd nüchtern.

Tau dissen Infall keem't „Landsmarketing“ in Verbinnung mit 'n Rostocker Agentur in'n Updrach vonne Schweriner Staatskanzlei, dei ja nu Patrick Dahlemann (Johrgang 1988) ut Vörpommern vörsteiht. Hei hürt ok tau dei niege Sort von Poletikers, dei dat Studiern upgäben hett un as 'n Pogg in't Bodderfatt von Stuft tau Stuft up'e Poletikledder kladdert: von'n Schnupperkurse in'n SPD-Wahlkreisbüro, bi dei SPD-Landdachsfrakschon, in'n Bundsdach, in Brüssel un in New York, lannt hei inne Stadtverwaltung Strasborg, ward 2016 Parlamentarischer Staatssekretär för Vörpommern un is af 2021 Baas vonne Staatskanzlei Mecklenburg-Vorpommern.

So beseihn, hett hei dat noch wieder bröcht as sien ok ut Vörpommern bürtige kathoolsche CDU-Kolleg Philipp Amthor (Johrgang 1992). Un wat is 'n stolt, dat dat niege Biller gifft, up wecker „MV#wow“  lüchten deit – un denn dat: Kraunen, dei  œwer MV fleigen sallen, hemm' sik noch nie nich MV von båben ankeeken. Dor künn  man denn würklich „wow“ seggen. Un wat dat wull kost't hett, üm dei Welt dit mittaudeilen: Leiw Lüd, kåmt nå MV / denn hier bi uns is all'ns wau (wow ). / Wau (wow) is't anne Wåderkant / un wau (wow) is't ok in't Binnenland.

Ok hei mutt herhollen. (Schall dei Frisur eentlich eine Stirnglatze kaschieren?)

Lüd, dei bäten kläuker sünd as dei „wow“-Erfinner, hemm' rutfunnen, dat „wow“ 'n Wurt is, dat in'n würklichen Sinn kein Bedüdung hett un dat dei Minsch, wenn hei wat fäuhlt, gewohr ward orrer marken deit un denn vör Freud, dörch 'n Œwerraschung orrer ok ut Arger von sik gifft. Son'n Wür sünd taun Bispill: Oh, Pfui, Schiet, Dunnerwäder, Dunnerlittchen, Minsch, Oh lala...

Üm 1620 keem „wow“ orrer ok „who“ inne inglisch Språk as Tauraup up, üm sik in'n wietlüftig Rebeit nich ut'e Ogen tau verliern. So as wi villicht „Hallo“ raupen. Tau Anfang von't 19. Johrhunnert hett dei inglisch Buer sien Pier mit „wow“ tau Ståhn bröcht. Bi uns hett dat denn „Prrrr...“ heiten. 

"Mama, mööt wi folgen, wenn sei uns "Wow" raupen daun?" "Ach wat, mien Lütten, op sowat hüürn wi nich!"

Un denn keem dei Tiet, as dei Düütschen nich mihr von wunnerbor, grotorrig, dull, schön usw schnacken wullen un mit „wow“ einfach dat taun Utdrück bröchten, wat's fäuhlen, gewohr warden orrer marken.

Dor möt 'n blot seggen: Dei Infall mit „MV#wow“ is wow. För son'n Infäll möt 'n sik keinen Kopp måken, denn dei Diäten wassen åhn grot Taudaun von allein. Is dat nich „#wow“?