Mudders Dag

vun Karl-H.Nissen

"Segg mal, Anneke," fraag Korl, "Mudderdag, is dat en wichtigen Dag för di?"

"Nee, is dat nich. Weest du, Korl, ik freu mi jümmers, wenn ik wat höör vun de Kinner. Dor mütt dat nich den Mudderdag för geven. Un doch hett disse Dag wat extras. Ik tööv dor al up. Ik verraad di, worüm: Alle Johr krieg ik an dissen Dag nämlich en Tomatenplant schenkt, för unsen Balkon. Ik heff ok al mal en poor Erdbeerplanten kregen. De hebbt aver nicht recht dragen. Kiek, un wenn ik de Tomatenplant denn plegen do orrer later ok mal en Tomatenfrucht plücken kann — orrer ene Erdbeer —, denn fallt mi in, wokeen mi de schenkt hett."

Korl höör sik dat an un he smuuster so 'n beten.

"Vertell, Korl, di is doch wat infullen."

"Ji kennt doch all mien olle Fründin Christine. Wat de allens kann. Ehr Goorn is püük, kaken un backen kann se best, feine Kunstwarken kriggt se trecht, ehr Huus is en Poppenstuuv. Letzt Johr, bi 't Gardinenwaschen harr se Malöör. Se hett so 'n lütt Tritt-Ledder, de bruukt se bi dat Afnehmen un dat Uphangen vun ehre Gardinen. Ik heff ehr mal enen langen Vördrag hollen över Unfallverhütung in'n Huushalt, dat hett se behollen.

Bi't Groot-Reinmaken müss je ok de Gardine vör dat Klofinster dal. Dor weer de lütt Ledder nich nödig, dor kunn se licht up den Klodeckel stiegen. Nu mag dat sien, dat so 'n Deckel för sowat nich dacht is. He hett dat nich uthollen. Mit ' n luden Knacks is de tweibraken, un Christine stünn mit de Fööt dor, wo de nich henhöört. Alleen keem se dor nich rut, ehr Klaas un de Nawersch müssen helpen. De en Foot weer afschüürt un blödig — un de Deckel weer hen.

Dat weer en poor Daag för Mudderdag. De Kinner harrn sik anmeldt, Mudder müß kaken, un dat mit dat Humpelbeen, un keen Klodeckel!

Un denn keem de Sünndag-Morgen. Mudder güng sik waschen, maak de Döör up un "Huuuuch". Wat süht se: enen nien Klodeckel, ut Holt, ganz stabil. Baben up stünn en groot Priemelpott un en lütt Pappschild:

"Allens Gode to 'n Mudderdag wünscht Di Dien Klaas."