De Schippsmotoren-Jammer-Ballaad

vun Henning Eggers


En Reeder, de fünn kene Roh
mit de Motoorn vun MTU.
He stell denn üm op KHD,
de arme Keerl, o jemine...

Mit MWM güng dat nich beter,
sogor bi CAT harrn s' Kolbenfreter!
Un ok vun annern kunn man höörn,
dat de Motoorn sik sülvst terstöörn!


Dieselgenerator op en Frachter

Meist kort na frohe Dieselklängen
geev't Klappern, Krieschen, Krachen, Sprengen!
Dorna bleev för den armen Reeder
bloots Flöken, Hulen un Gezeter.

Wellenbruch un Lagerschaden,
Kolbenfreter, de sik jagen,
möt de Reeder denn betahlen!
Dat sünd wohre Höllenqualen!


Afgasrohr vun en Schippsdiesel

Vundaag is Diesel gänzlich "out".
De Redeer höört verbaast, benaut:
Bald schall he mit Elektro fohren!
Keen Afgas! — He truut knapp sien Ohren,

dor warrt all feddert, he schall seilen.
Dorgegen mutt de Mann sik steilen,
denn seilen bi so'n deegten Frachter,
dor höört doch orrig Knööv dorachter!


Frachter in Wilhelmshaven

Neenee, so'n Reeder hett dat swoor.
Ümwelt mutt schoont warrn, dat 's woll wohr;
man wat is all de Ümwelt weert,
wenn vun den Kraam nix funscheneert?!

Man eenstens warrt dat anners warrn.
Denn folgt op ehre Möhg de Aarn:
De Reeders warrt in'n Himmel kamen —
se all! Ok de nich so ganz Framen!

Dor dröfft se denn, ganz frie vun Lieden,
den himmlischen Verkehr bedrieven,
de Wulkenscheep, mit Wind bedreven,
de stüürt se över'n blagen Heven!

De Konstruktöörs vun de Motoren,
de hett de Satan sik erkoren:
To Höll lett se de Satan fohren
mit ehr kaputte Stink-Motoren!

Dor smoort se twüschen Kurbelwelle,
Kolben, Turbinen un Gestelle,
mööt Pleuel begen, Wellen geten
un dääglich twintig Kolben freten!

In överhittes Ööl mööt s' baden,
op glöhnig Utpuffrohren braden,
dör dicke Afgaswulken luern
un all ehr Schanddaten beduern!


14.9.2019


na baven