De Tied vun't Snacken is vörbi... oder nich?

Hebbt Se't ok höört?: Opletzt hett doch glatt Tony Blair sin Fründ Bush raden, noch'n beten tototöven, ehrdat he sin Krieg losmaakt. Wokeen harr dormit rekent? Woneem kümmt sowat her? Wi erfahrt dat faken nich, avers in annere Länner deit sik ok wat gegen den Krieg - un nich to knapp. Opletzt hebbt wi 'n Blick na Amerika sülvst smeten (Dat annere Amerika); nu heff ik en schönen frechen Artikel funnen, de mal wiest, wat sik in Grootbritannien so deit. Dat dat nich ümsüß is, hebbt wi al erfahren: Blair hett ümnahmen! Tominnst erstmaal rhetorisch. Dat maakt doch Moot, nich? - De Artikel is vun'n 6.1.03. Mehr över Akschoonen in Grootbritannien köönt Se ünner www.stopwar.org.uk lesen.

Marlou Lessing


De Tied vun't Snacken is vörbi
vun George Monbiot

De Rest vun Europa mutt sik doch wunnern, wat Grootbritannien villicht in'n Winterslaap gahn is? Ende düssen Maand will uns Premierminister de Entscheidung künnig maken, de he Maanden tovör fällt hett: dat Grootbritannien de USA op'n Kriegstoog in'n Irak folgen will. Wenn he dat seggt, warrt twee oder dree Weken later de Krieg anfangen.

Wenn de UN-Inspektoorn nich bet 27. Januaar noch wat finnt, warrt düt en Krieg ween, de ok nich den ringsten Vörwand mehr hett: en unprovozeerte Angriep, de eenzig den Zweck hett, den Riekdom un de Macht vun en Amerikaansche Kleptokratie to vergröttern. Wiet af dorvun, den Freden to feddern, kann düsse Krieg de eerst ween in en Serie vun Herrschapskriegen. De swaarste weltwiede Krise siet dat Enn vun'n Kolen Krieg is dree Weken vun us entfeernt, un de mehrsten vun us schient to fragen, woso nich wen anners wat dorgegen deit.

Dat kümmt nich faken vör, dat de Minschen vun de Britischen Inseln de Schangs hebbt, den Loop vun't Weltgeschehen to verännern. Bush weet, dat de Amerikaaners ehr Tostimmen to sin Krieg to'n Deel vun sin Vertruunswördigkeit in Översee afhangt: Ümfragen hebbt wiest, dat vele Kriegs-Ünnerstütters man bloots en "internaschonalen Angriep" hebben wullt; griepen de USA alleen an, denn würrn de Lü dat nich goodheten. En "internaschonalen Angriep" heet avers bloots: en Angriep tosaam mit Grootbritannien. Wenn Blair utstiegt, kann dat Bush dwingen, sik dat noch mal to överleggen!

Blair warrt avers bloots denn utstiegen, wenn he süht, dat de politische Pries för dat Wiedermaken mit Bush höger is as de Pries för't Ophöörn. Mit anner Wöör: Bush sin Krieg hangt vun uns Gliekgülligkeit af. "Wat passeert, passeert gor nich so veel dorwegen, wieldat poor Lü dat wüllt, man wieldat de mehrsten Lü sik nich verantwoortlich föhlt un dat lopen laat."

Dat gifft stückerwat Grünnen, woso de mehrsten Briten nich praat sünd to'n Hanneln. Niege Militärtechnik maakt en Inberopen vun Suldaten unnödig; de Jungmänner, de sünst de Kern vun'n Wedderstand harrn warden könen, köönt tohuus blieven un op jümehr Gameboys mit imaginäre Fienden kämpen. De Weerschap wasst noch; dordör warrt verdeckte Untofredenheit mit de Regeern still maakt; man wi föhlt, dat uns Jobs un Utsichten unseker sünd, un dorüm wüllt wi us nich ok noch Arger inhanneln.

Anschienen köönt ok mennig Lü eenfach nich glöven, dat düsse Krieg würklich passeert. Paradoxerwies würr us de Debatte veel nödiger schienen, wenn wi vun en würklichen Fiend würklich bedroht würrn. Man wenn Blair us vertelln würr, dat wi (in "De Herr vun'e Ringe") gegen Saruman vun Isengard kämpen schulln, de sin Orks gegen de goden Lü vun Rohan schicken wull, weer dat knapp weniger plausibel as de Drohung, Saddam vun Irak würr Bomben op Amerika smieten.

Düsse Faktoorn verklaart uns Flauheit. Se entschülligt ehr nich. Dat stimmt, dat uns Schangs, düssen Krieg optohollen, ring is. Beed Männer, Bush un Blair, schient entslaten, vörantogahn, mit oder ahn Grund un Bewies - schiet op Grund un Bewies. Man Protest is nich sinnlos, ok wenn dat nich foorts to'n Teel föhrt. Ok wenn wi den Angriep gegen Irak nich ophollen köönt, mööt wi klaarmaken, dat dat politisch so dür is, dat dat nie wedder passeert. Un dat heet, dat de normalen Demos nich mehr utriekt. Dat hett betherto veel resolute un good organiseerte Proteste geven. Düsse Proteste sünd wichtig, man de alleen bringt Blair nich in't Sweten. Wi mööt de Temperatuur hööger maken.

De Kernwaffen-Afrüstungs-Kampagne (Campaign for Nuclear Disarmament) hett al en modigen un bispillosen Schritt daan: Se sünd to Gericht gahn, dat faststellt warrt, dat en Angriep ahn UN-Resoluschoon illegaal weer. Man an'n 17. Dezember hebbt de Richter faststellt, se weern nich tostännig, de bestahn UN-Resoluschonen uttoleggen. - Nu, schient dat, hebbt wi bloots noch de Schangs, en massive, gewaltlose Störkampagne lostomaken. Landswiedes symboolsches Stillstahn vun'n Verkehr, t.B. för een Stunn; symboolsche Arbeitsnedderleggen; Straten un Regeernsgebäude blockeern, de Blair un sin Ministern nütten mööt - dat is dat Maat, in dat wi hanneln mööt. Hunnerte vun us warrt wohrschienlich verhaft, avers dat maakt de Saak bloots noch mehr publik. Man gewaltlos mutt dat ween, dat is levenswichtig: Nix deit de Saak mehr Schaden as Gewalt.

En freedvulle, brede un good teelte Argernis-Kampagne, ok wenn se de Minschen deelwies op de Nerven gahn much, dwingt se, doröver natodenken; keeneen kann denn mehr an den Krieg denken, ahn ok an de Opposischoon gegen den Krieg to denken. In uns Tied finnt wat statt, wat keen Bispill hett: Bush, vun Blair sin moraalsche Mitlöperie ünnerstütt, dwingt een Krieg ut een mehrst freedliche Welt. Laser-Projekschoon vun Parolen an Regeernsbauten is en gode Idee, nich?Dat Maat vun düsse Bedrohung mutt in uns Akschoonen to erkennen ween.

Allens düt warrt natüürlich dür ween. Man dat gifft en Punkt, an den du na din Övertügen hanneln muttst, süß nütt dat allens nix. Na de letzte Ümfraag wüllt 42% vun de Briten den Krieg stoppen, gegen 38%, de em ünnerstütt. 42% sünd mehr as 38% - avers wat daht de 42%? Wi ok? Wenn all uns Hanneln bloots dorin besteiht, uns Köpp vör't Kiekschapp to schüddeln, denn köönt wi Blair glieks 'n Blankoscheck utstelln. Sünd Se dor, dor buten? Oder töövt Se, dat wen anners wat deit?


översett vun Marlou Lessing



na baven